Fréttablaðið - 07.03.2008, Qupperneq 46

7. MARS 2008 FÖSTUDAGUR8 ● fréttablaðið ● útivera
Jöklarnir geyma fönnina og
þar er gaman að ferðast um
og njóta fjallalofts og útsýn-
is þegar vel viðrar. Hjónin
Benedikt Bragason og Andrína
Guðrún Erlingsdóttir hjá
fyrirtækinu Arcanum eru með
snjósleðaferðir á Mýrdalsjökul.
„Yfir sumarið erum við með fjór-
ar fastar ferðir á dag og fólk
gengur að þeim vísum. Á öðrum
árstímum þarf að panta en það er
undantekning ef fellur úr dagur.
Það er líka hægt að fara niður í
fjöru ef snjór er á jafnsléttu og
útlendingar hafa gaman af því
að koma á okkar svörtu strönd,“
segir Benedikt spurður um áætl-
anir sleðanna. Skyldu menn
aldrei vera ragir við að stjórna
þessum tækjum? „Jú, jú, það er
til,“ svarar hann. „En við gefum
góðar leiðbeiningar og það er
undantekning ef einhver gefst
upp. Við erum með frekar litla
sleða sem auðvelt er að stjórna
enda er þetta gert til að fólk hafi
gaman af því.“
Þau Benedikt og Andrína Guð-
rún búa í Sólheimakoti sem er
nánast við rætur Mýrdalsjökuls.
„Við búum á jörð sem heitir Sól-
heimar II og foreldrar Andrínu
bjuggu kúabúi á. Okkur finnst
Sólheimakot notalegra nafn og
við búum vélsleðabúi. Keypt-
um þessa starfsemi 2001 en ég
er búinn að vinna við hana síðan
1992. Ætlaði að vera tvær vikur
í upphafi og er enn. Fyrirtækið
var stofnað til að vera með ferðir
inn á hálendið og Mýrdalsjökull
var sem uppfylling en það hefur
snúist við og jökullinn er orðinn
aðalsvæðið. Svo erum við svo
heppin að vera með Kötlu gömlu
undir. Hún er ómælt söguefni og
hefur heilmikið aðdráttarafl,“
lýsir Benedikt og bætir við: „Það
sem heldur okkur gangandi eru
ánægðir viðskiptavinir og hvað
það er alltaf gaman.“
Arcanum á lítið hús sem er í
780 metra hæð. Þaðan er fagurt
útsýni í góðu skyggni að sögn
Benedikts. Spurður hvort hann
hafi aldrei lent í hremmingum
á jökli svarar hann því að vissu-
lega hafi hann lent í byl en aldrei
sé farið langt frá kofanum á þess-
um klukkutíma sem venjulegur
túr taki. „Við höfum verið lánsöm
með það að enginn hefur slas-
ast hjá okkur. Þar kemur reynsl-
an til og endalaus aðgæsla. Við
erum með átta tonna snjótroð-
ara eins og eru á skíðasvæðunum
og búum til braut sem við keyr-
um eftir. Þá er hægara að stýra
og engin hætta á að fólk villist af
leið auk þess sem allir eru örugg-
ir fyrir sprungum.“ Hann segir
farið á snjótroðaranum um jökul-
inn á hverjum degi til að jafna og
slétta brautina, jafnvel þótt eng-
inn gestur sé, enda þurfi þau að
fylgjast með jöklinum sem sé á
stöðugri hreyfingu. „Ég var nú
svo hræddur við jökulinn fyrst
að ég ætlaði varla að þora upp,“
viðurkennir Benedikt. „En okkar
lán byggist líka á því. Við berum
virðingu fyrir jöklinum og um-
göngumst hann með kurt og pí.“
Þótt erlendir ferðamenn séu
í meirihluta viðskiptavina að
sögn Benedikts eru sleðaferð-
irnar líka vinsælar af íslensk-
um starfsmannahópum og einnig
segir hann landsmenn koma með
útlenda vini sína. „Áhugaverðir
staðir eru svo nálægt okkur Ís-
lendingum að okkur finnst við
alltaf hafa möguleika á að fara
seinna,“ segir hann. „En fólk er
rosalega ánægt þegar það kynnist
þessu og kemur gjarnan aftur.“
- gun
Söguefni með aðdráttarafl
Brunað um ísbreiðuna.
Heimsókn í íshelli eykur á ævintýrið.
Við skálann eru leiðbeiningar gefnar áður en lagt er í hann. Benedikt Bragason og Andrína Guðrún Erlingsdóttir reka fyrir-
tækið Arcanum sem býður snjósleðaferðir á Mýrdalsjökul.
Fjölbreyttar sumarleyfisferðir
með Útivist í sumar. www.utivist.is