Morgunblaðið - 29.03.2007, Blaðsíða 11

MORGUNBLAÐIÐ FIMMTUDAGUR 29. MARS 2007 11
FRÉTTIR
Eftir Hjört Gíslason
hjgi@mbl.is
TÍÐARFARIÐ í vetur hefur verið
með eindæmum slæmt. Smærri
bátar hafa ekki komizt á sjó dögum
saman og stærri bátarnir hafa átt í
erfiðleikum og lítið komizt út í
kantana. Í brælunni um daginn
leitaði einn af stóru línubátunum
inn á Hvalfjörð til að fá frið við
veiðarnar.
„Við flúðum undan suðvestan-
rokinu sem var þarna fyrir utan og
inn á Hvalfjörðinn. Það var bara til
að gera eitthvað frekar en að fara í
land. Mig hefur reyndar alltaf
langað til að prófa að fara þarna
inneftir, en lét ekki af því verða
fyrr en það var ekki skipgengt fyr-
ir utan vegna veðurs,“ segir Ólafur
Óskarsson, skipstjóri á beitningar-
vélarbátnum Hrungni.
Skárra en að liggja í landi
„Þetta var svona til gamans gert
og til að athuga hvort maður fengi
eitthvað. Trillurnar hafa stundum
verið að fá dálítið þarna. Það gekk
hins vegar rólega. Ég held þó að
það hafi verið fiskur þarna, en það
var eins og eitthvert hrygningar-
ástand væri komið á hann. Það
sprautuðust út honum svilin, þegar
hann kom upp. Við fengum einhver
30 kör á þetta sem við lögðum
þarna og út á Flóann. Það var ekki
stórt, en skárra en að liggja í landi.
Maður hafði ekkert þarna út að
gera. Þeir lágu undir áföllum Jó-
hanna og Sighvatur úti á Eldeyj-
arbanka.
Þessi vetur er búinn að vera al-
veg hrikalegur. Allt síðasta haust
vorum við fyrir austan og lönd-
uðum á Djúpavogi. Það var hrein-
lega ekki skipgengur sjór dögum
saman. Svo eru búnar að vera anzi
þrálátar suðvestanáttir núna á
þessu ári, vægast sagt alveg öm-
urlegt tíðarfar. Maður man bara
ekki eftir öðru eins í háa herrans
tíð. Það er hins vegar ágætis veiði,
þegar tíðin er skikkanleg. Það virð-
ist vera alveg yfirdrifið nóg af
þorski, nánast sama hvar er. Það
er eiginlega vandamál. Okkur vant-
ar svo að fá eitthvað með þessu,
ýsu og aðrar tegundir. Það er orðið
aðalmálið í dag, að blanda þetta og
gengur hálf illa.
Það virðist vera rosalega mikið
af þorskinum á ferðinni núna og á
stóru svæði. Þetta er mjög góður
fiskur og virðist vel haldinn, lifr-
armikill og góður, sem við erum að
fá á þessum hefðbundnu slóðum.
Það er alveg hægt að fullyrða að
hann er ekki illa haldinn.
Við erum að öllu jöfnu úti í fimm
til sex daga. Það ræðst svolítið af
vinnslunni í landi. Við erum með
40.000 króka og leggjum fjórar til
fimm lagnir í túr. Það fer svona
rúmur sólarhringur í hverja lögn ef
ekki eru miklar tafir, festur og slit.
Veiðin hefur verið mjög góð og þeir
sem geta haldið sig í þorski, eru að
gera það mjög gott. Staðan er hins
vegar sú að það eru allir að verða
hálf uppiskroppa með þorskkvóta.
Það virðist algjörlega vanta ýsuna
á slóðina. Þeir hafa eitthvað mis-
reiknað sig fræðingarnir núna.
Þetta er enginn ýsuafli miðað við
það sem ætti að vera. Það er
vandamálið í þessu hvað lítið er af
ýsu á ferðinni. Þetta er mikil
breyting frá því í fyrra. Það hefur
alltaf verið miklu skarpari ýsuveiði
á þessum tíma, en hana vantar
núna. Við megum ekki vera með
meira en rúmlega helming af aflan-
um í þorski. Hitt verður að vera
aðrar tegundir.
En eins og tíðarfarið er búið að
vera, hefur ekki verið hægt að fara
eitt eða neitt, út í kanta eða annað,
til að leita fyrir sér. Þetta er búið
að vera svo ofboðsleg ótíð. Til að
gera eitthvað hafa menn þá frekar
verið í þorski til að hafa eitthvað
við að vera,“ segir Ólafur Óskars-
son.
Morgunblaðið/Hafþór Hreiðarsson
Fiskveiðar Í síðustu brælunni leitaði Hrungnir GK inn á Hvalfjörð.
Vægast sagt alveg
ömurlegt tíðarfar
Í HNOTSKURN
»Þorskafli nú er orðinn94.500 tonn, sem er tæp-
lega 60% af leyfilegum afla á
fiskveiðiárinu.
»Ýsuaflinn er 42.700 tonnsem er 46% af leyfilegum
kvóta, sem hefur aldrei verið
hærri.
»Veiðin hefur verið mjöggóð og þeir sem geta hald-
ið sig í þorski, eru að gera það
mjög gott.
ÚR VERINU
Eftir Elvu Björk Sverrisdóttur
elva@mbl.is
VÍSINDAMENN eru mjög margir
sammála um að besta leiðin til þess að
úthluta opinberu fjármagni til vís-
indaverkefna sé
í gegnum sam-
keppnissjóði.
Þetta segir Ein-
ar Steingríms-
son, prófessor í
stærðfræði við
Háskólann í
Reykjavík, en í
dag fer fram í
skólanum mál-
þing um fjárveit-
ingar til vísinda-
rannsókna. Einar er einn
hvatamanna að málþinginu en alls
stendur að því um tugur vísinda-
manna úr HR, HÍ og LSH. Geir H.
Haarde forsætisráðherra flytur
ávarp við opnun málþingsins og að er-
indum loknum munu fulltrúar stjórn-
málaflokkanna sitja í pallborði.
„Við viljum efla umræðu um það
hvernig eigi að fjármagna vísindi. Það
sem við ætlum að reyna að koma á
framfæri er að það sé gífurlega mik-
ilvægt að efla samkeppnissjóði og að
sem mest af því fé sem fer í vísinda-
rannsóknir fari í gegnum þá,“ segir
Einar. Þetta sé besta leiðin til að sjá
til þess að bestu vísindaverkefnin og
bestu vísindamennirnir hverju sinni
séu styrktir.
Fjárframlög hins opinbera hafi
hingað til að miklum hluta verið
eyrnamerkt ákveðnum skólum og
stofnunum. „HÍ hefur síðustu árin
fengið hátt á annan milljarð í bein
framlög til rannsókna,“ segir Einar.
HR hafi einnig fengið bein framlög
sem hafi hækkað smátt og smátt og
séu nú um 300 milljónir króna á ári.
Aðrir skólar hafi einnig fengið fjár-
famlög.
Þarf að fjórfalda framlögin
Helstu samkeppnissjóðirnir hér á
landi eru rannsóknasjóður og
tækniþróunarsjóður. „Þeir eru með
rúmlega milljarð króna til umráða á
ári,“ segir Einar. Óhætt sé að segja að
mjög lágt hlutfall þess fjár sem renn-
ur til vísindastarfsemi komi úr sam-
keppnissjóðum, eða á bilinu 10–15%.
„Í löndum eins og Finnlandi og
Bandaríkjunum, sem flestir virðast
sammála um að standi sig mjög vel í
vísindum, er hlutfallið margfalt
hærra.“ Sennilega þurfi að fjórfalda
framlögin til samkeppnissjóðanna og
það eigi vel að vera gerlegt.
Einar segir að í samkeppnissjóðun-
um komi saman vísindamenn úr ýms-
um áttum og meti umsóknir á fagleg-
an hátt. Jafningjamat sé gæðaeftirlit
vísindanna. „Það er ekki til neitt ann-
að gæðaeftirlit,“ segir Einar. Slíkt
fyrirkomulag sé heppilegra en að fé
sé úthlutað á fjárlögum til stofnana,
án þess að það sé hægt að keppa um
það.
Svo samkeppnissjóðirnir hafi nægi-
legt vogarafl þurfi að efla þá til muna.
Best að vísinda-
menn keppi um
fé til rannsókna
Einar
Steingrímsson
FRAMVEGIS verða farþegar í rút-
um skyldaðir til þess að vera með ör-
yggisbelti. Þetta kemur fram í drög-
um að reglugerð sem samgöngu-
ráðuneytið er með til kynningar.
Reglugerðin mun ekki ná til stræt-
isvagna.
Í reglugerðinni er gert ráð fyrir að
ökumaður, leiðsögumaður eða farar-
stjóri tilkynni um skyldu til notkun-
ar öryggisbeltis í upphafi ferðar, en
einnig telst hljóð- eða myndbands-
upptaka uppfylla skilyrði um þá til-
kynningu. Einnig er kveðið á um að
myndrænar upplýsingar um notkun
öryggisbelta séu í hópbifreiðum á
stað sem sjá má úr farþegasætum.
Að sögn Bjarna Birgissonar,
rekstrarstjóra Kynnisferða, eru
nánast allar hópferðabifreiðar í flota
landsmanna komnar með öryggis-
belti fyrir farþega. Skylt er að vera
með öryggisbelti í öllum rútum sem
framleiddar eru eftir 1. október 2001
og jafnframt hefur öryggisbeltum
verið komið fyrir í eldri rútum.
Gott að hafa skýra reglugerð
Samkvæmt upplýsingum Sigurðar
Helgasonar, verkefnastjóra Umferð-
arstofu, vantar talsvert upp á að fólk
noti belti í rútum og því sé gott að
hafa skýra reglugerð um þessi mál.
Frestur til að koma athugasemd-
um við reglugerðardrögin er til 2.
apríl nk. og geta þar hagsmunaaðilar
eða aðrir áhugasamir um málefnið
komið fram með skoðun á málinu.
Hægt er að nálgast reglugerðar-
drögin á heimasíðu samgönguráðu-
neytisins: http://www.samgongurad-
uneyti.is/frettir/nr/1175.
Allir verði með
öryggisbelti í rútum
Stekkjarbakka 6 - Sími 540 3300 - www.gardheimar.is
VORGLEÐI GARÐHEIMA
31.mars og 1. apríl 2007
Sæktu hugmyndir fyrir fallegan garð í sumar!
Frábær tilboð á vorvörum!
Sverrir Kristinsson, löggiltur fasteignasali
SKRIFSTOFUHÚSNÆÐI ÓSKAST TIL KAUPS
Við höfum verið beðnir um að útvega 800-1200 fermetra
skrifstofu- og þjónusturými á svæðinu frá Borgartúni
og að Fossvogi. Fleiri staðir koma til greina.
Nánari upplýsingar veitir
Sverrir Kristinsson lögg. fasteignasali.