Morgunblaðið - 26.01.2008, Page 60

60 LAUGARDAGUR 26. JANÚAR 2008 MORGUNBLAÐIÐ
TÓNLISTARMAÐURINN, mynd-
listarmaðurinn og rithöfundurinn
Philip Corner er meðal upphafs-
manna Fluxus-hreyfingarinnar og
hélt fyrir skemmstu merkilega
uppákomu með Nýlókórnum á Ný-
listasafninu. Þessi óhefðbundni kór
hefur á undanförnum 5 árum verið
virkur við flutning ýmissa óhefð-
bundinna tónverka og gjörninga og
er einn sinnar tegundar hér á landi,
ef ekki víðar.
Flutt voru gömul og ný verk eftir
Philip Corner sem hann og Hörður
Bragason skiptust á að stjórna.
Fyrsta verk á efnisskrá, „PeopleVoi-
ceSpace“ frá árinu 1962, skapaði
strax gott andrúmsloft þar sem
Nýlókórinn andaði djúpt og blés og
andvarpaði og lét almennt vel að sér,
áhorfendum og -heyrendum til mik-
illar fróunar. Að loknum þeim
stemmara tók við stórskemmtilegt
riflildi milli kynjahópa kórsins. Þeg-
ar hér var komið við sögu furðaði
undirrituð sig á því að svona uppá-
komur skyldu ekki vera tíðari hér á
landi, einkum sé mið tekið af núver-
andi framboði listviðburða miðað við
títtrædda höfðatölu.
Fluxus-hreyfingin mætti í stuttu
máli útleggjast sem list hins daglega
lífs. Flókin og innblásin list, runnin
af einum einstökum höfundi, telst
ekki til Fluxus. Fluxus-list skal vera
einföld og skemmtileg og allt að því
verðlaus, en til þessarar hreyfingar
teljast fjölmargir listamenn út um
allan heim, m. a. Viðeyjarvinkonan
Yoko Ono. Aðdráttaraflið var mikið
á umræddu kvöldi, enda var pláss-
gott rými Nýlistasafnsins, sem fagn-
ar nú 30 ára afmæli, þétt pakkað af
gestum. Meðal verka sem stóðu upp
úr þessa kvöldstund voru „frjálsari
12-tóna ruglingur“ fyrir hljóð-
færahóp. Þar mátti heyra nokkurs-
konar skopstælingu af 12–
tónaverkum frumkvöðulsins Anton
Webern, eða léttúðugt afbrigði af
rígbundnu kerfi sem átti þó upp-
haflega að frelsa eyru okkar frá
staðnaðri díatóník og tóntegunda-
miðju.
Nýjasta verkið á efnisskránni,
„Edda“, kom firnavel út hjá Nýló-
kórnum, en um var að ræða hljóð-
klasa, æpta og hvíslaða á víxl, þar
sem gerð voru skil þremur völdum
erindum úr Eddunni. Hugleiðingin
„Peace, Be Still“ keyrði áfram á ein-
um fallegum frasa, en eftir mínútu
fór þessi kanón að hafa allt annað en
tilætluð áhrif, a. m. k. hjá undirrit-
aðri, og snerist eftir rest upp í nokk-
uð þreytt og órólegt stagl sem
minnti helst á örþreytta foreldra
sem reyna að sefa æst börn sín eftir
erfiðan vinnudag. Með þjálfaðri kór
hefði útkoman ef til vill orðið betri,
en þá hefðu önnur frumstæð og
skemmtileg verk áreiðanlega ekki
heppnast jafn vel, til að mynda ofan-
greint rifrildi og Eddan.
En hvað sem öllu líður er Fluxus
klárlega ljós í tilverunni. Fleiri tón-
leikar með Nýlókórnum eru til-
hlökkunarefni.
Fínn Fluxus
TÓNLIST
Nýlistasafnið
Nýlókórinn og hljóðfæraleikarar fluttu
tónverk eftir Philip Corner. Stjórnendur:
Philip Corner og Hörður Bragason. Laug-
ardaginn 19. janúar 2008.
Philip Corner og Nýlókórinnbbbnn
Morgunblaðið/Jón Svavarsson
Nýlókórinn og Philip Corner „Með þjálfaðri kór hefði útkoman e. t. v. orðið betri, en þá hefðu önnur frumstæð og
skemmtileg verk áreiðanlega ekki heppnast jafn vel, [...].“ segir í dómi Alexöndru Kjeld .
Alexandra Kjeld