Fréttablaðið - 06.11.2009, Blaðsíða 74

50 6. nóvember 2009 FÖSTUDAGUR
FRJÁLSÍÞRÓTTIR Máli hinnar átján
ára gömlu Caster Semenya er
langt í frá lokið. Í gær var greint
frá því að Ólympíusamband Suður-
Afríku hefði rekið forseta frjálsí-
þróttasambands Suður-Afríku sem
og vikið stjórn sambandsins vegna
þess hvernig sambandið fór með
mál Semenya.
Caster Semenya vann til gull-
verðlauna í 800 metra hlaupi
kvenna á HM í Berlín í sumar. Í
kjölfarið fór Alþjóðafrjálsíþrótta-
sambandið fram á að hún myndi
gangast undir kynjapróf. Niður-
stöðurnar hafa ekki verið birtar
en samkvæmt upplýsingum sem
hefur verið lekið í fjölmiðla er
Semenya tvíkynja.
Leonard Chuene, forseti suður-
afríska frjálsíþróttasambandsins,
vildi í fyrstu ekki viðurkenna að
sambandið hefði látið Semenya
gangast undir kynjapróf fyrir leik-
ana í Berlín. Hann viðurkenndi í
september síðastliðnum að hafa
sagt ósatt og að Semenya hefði
vissulega gengist undir kynjapróf
áður en hún fór til Berlínar.
Suður-afrískur frjálsíþrótta-
þjálfari, Wilf Daniels, sagði svo í
samtali við fréttastofu BBC í gær
að það hefði sambandið látið Sem-
enya gera án hennar vitundar.
„Þeir sögðu Semenya að hún
væri að gangast undir hefðbundin
lyfjapróf en þetta var í raun kynja-
próf,“ sagði Daniels. „Hún fékk
aldrei að vita hver hennar réttur
væri og hvaða afleiðingar niður-
stöður prófsins gætu haft í för
með sér.“
Daniels segir að þar með hefði
hún aldrei fengið tækifæri til að
leita sér læknisaðstoðar og fá
þannig tækifæri til að taka þátt í
íþróttum á réttum forsendum.
„Nú eru allar þessar upplýsingar
fyrir augum almennings og afleið-
ingarnar eru það hrikalegar að ég
tel að hún fái aldrei almennilegt
tækifæri til að vera venjuleg kona
aftur og fá að keppa sem slík.“
Frjálsíþróttasambandið hefur nú
beðið Semenya og fjölskyldu henn-
ar afsökunar, sem og forseta lands-
ins og almenning. - esá
Forseti og stjórn frjálsíþróttasambands Suður-Afríku rekin vegna máls Caster Semenya:
Lugu að Caster um kynjapróf
CASTER SEMENYA
Fagnar hér sigri í
800 metra hlaupi
á HM í Berlín.
NORDIC PHOTOS/AFP
FÓTBOLTI Real Madrid sendi frá
sér yfirlýsingu í fyrrakvöld þess
efnis að Cristiano Ronaldo myndi
gangast undir aðra læknisskoðun
vegna ökklameiðsla sinna. Upp-
haflega var von á að Ronaldo yrði
frá í 3-4 vikur en hann meiddist
í leik með landsliði Portúgal 10.
októ ber síðastliðinn.
Ronaldo mun nú hitta Hollend-
inginn Niek van Dyjk sem með-
höndlaði sama ökkla í fyrra.
Ljóst er að einhver bið verður
á því að Ronaldo klæðist hvítu
treyjunni aftur og þá er einnig
óvíst hvort hann nær leikjum
Portúgals gegn Bosníu í umspili
um sæti á HM um miðjan mánuð-
inn. - esá
Meiðsli Cristiano Ronaldo:
Þarf að hitta
gamla lækninn
MEIDDUR RONALDO Spilaði síðast með
Portúgal gegn Ungverjalandi í undan-
keppni HM 2010. NORDIC PHOTOS/AFP
FÓTBOLTI Í gær var tilkynnt hvaða
leikmenn voru valdir í landslið
Úkraínu fyrir leiki liðsins gegn
Grikklandi í umspili um sæti á
HM í Suður-Afríku næsta sumar.
Umspilsleikirnir fara fram 14. og
18. nóvember.
Það kom á óvart að Andriy Vor-
onin, leikmaður Liverpool, var
ekki valinn í landsliðið. Olexiy
Mikhailichenko landsliðsþjálf-
ari sagði að Voronin væri ekki
100 prósent heill heilsu en gaf
ekki nánari skýringar á ákvörð-
un sinni.
Voronin var í byrjunarliði
Liverpool gegn Lyon í Meistara-
deild Evrópu í fyrrakvöld. Sjálf-
ur vildi hann ekkert tjá sig um
ákvörðun landsliðsþjálfarans. - esá
Úkraínumaðurinn Voronin:
Ekki valinn í
landsliðið
VORONIN Svekktur eftir að hafa brennt
af færi í leik Liverpool og Lyon í vikunni.
NORDIC PHOTOS/AFP
HAFNABOLTI Hið sögufræga lið
New York Yankees varð í fyrri-
nótt bandarískur meistari í
hafnabolta eftir sigur á Phila-
delphia Phillies í úrslitarimmu,
4-2.
Yankees vann leik liðanna í
fyrrinótt með sjö stigum gegn
þremur en Japaninn Hideki
Matsui fór á kostum í leiknum.
Hann skilaði sex stigum í hús
fyrir Yankees sem komst 5-1 yfir
í leiknum.
Þetta var fyrsti meistaratitill
Yankees síðan 2000 en liðið hefur
nú alls orðið meistari í 27 skipti,
langoftast allra liða í sögu deildar-
innar. - esá
New York Yankees:
Vann titilinn í
27. sinn
HIDEKI MATSUI Valinn besti leikmaður
úrslitarimmunnar og er fyrsti Japaninn
sem hlotnast sá heiður. FRÉTTABLAÐIÐ/AP