Menntamál - 01.12.1948, Blaðsíða 5

MENNTAMÁL
111
En eitt var það, sem ekki var af neinum vanefnum gert
eða tilsparnaði í skólans garð. Það var starfslið það, sem
að skólanum valdist. Þeir menn hefðu sómt sér vel við ríku-
legri starfsskilyrði með stærri þjóð. Til forstöðu valdist
sá maður, sem áreiðanlega verður talinn til fremstu skóla-
manna Islands í íslenzkri skólasögu. Séra Magnús Helga-
son stjórnaði skólanum í 21 ár, og sú skólastjórn var með
ágætum. Hann var hér brautryðjandinn, markaði stefnuna
og mótaði skólann í þeim aðaldráttum og grundvallarat-
riðum, sem hann hefur starfað eftir síðan og mun starfa
eftir framvegis, enda þótt námskröfur og námsefni og
ytri starfsskilyrði breytist. Það þrennt, sem hér virðist hafa
verið kjarninn í lífsstefnu hans og skólastarfi, vona ég að
verði leiðarljós allra þeirra, sem að íslenzkri kennara-
menntun vinna um ókomin ár: Ást á ættjörðinni, traust á
þjóðinni og trú á guð.
Fastir kennarar auk séra Magnúsar voru tveir í fyrstu,
þeir dr. Björn Bjarnason frá Viðfirði og dr. Ólafur Dan-
íelsson, báðir hinir ágætustu lærdómsmenn og afburða
kennarar í sínum greinum. Dr. Bjarnar naut ekki lengi
við. Eftir fjögra ára kennslu varð hann að hætta sökum
vanheilsu. Dr. Ólafur kenndi við skólann í 11 ár. En réðst
þá að Menntaskólanum
Stundakennarar skólans voru líka úrvalsmenn. Þeir voru
þessir: Jón Þórarinsson, sem þá var orðinn fyrsti fræðslu-
málastjóri landsins og átt hafði mikinn þátt í stofnun
kennaraskólans og ráðið miklu um tilhögun hans í byrjun,
Sigfús Einarsson tónskáld, söngkennari skólans í 31 ár.
Er það lengsti starfstími, sem nokkur kennari hefur
átt við skólann enn sem komið er; Þórarinn Þorláksson
málari, Matthías Þórðarsson, fornminjavörður, Matthías
Einarsson læknir og loks Ólafur Rosenkranz og Ingibjörg
Brands.
Þar með er talið fyrsta kennaralið skólans, og held ég
hiklaust, að það hefði sómt sér vel við hvaða kennaraskóla