Tímarit lögfræðinga - 01.04.1989, Blaðsíða 81

því verki lokið. Þar er raunar við mjög margvíslegan vanda að etja, sem ekki
er ástæða til að fjölyrða um hér.
Loks hafa verið fengnir menn frá Prentsmiðjunni Odda hf. til að segja til
um, í hvaða formi beri að afhenda tölvutexta til prentunar, og er það nú í
athugun. Tækni til textaflutnings er nú miklu fullkomnari en áður, svo að
vonir standa til, að vinnsla í prentsmiðju taki talsvert skemmri tíma en áður.
Aðalvandinn er nú sá að fá nægilegan vinnukraft til að lesa lagatextann yfir,
áður en hann verður prentaður.
Gerðardómur og ráðgjafarþjónusta Lagastofnunar.
Formaður verkefnanefndar, Stefán Már Stefánsson, hefur gert svofellda
grein fyrir starfseminni:
Með ályktun deildarfundar lagadeildar 28. febrúar 1986 var ákveðið að
setja á stofn sérstakan gerðardóm og þjónustumiðstöð Lagastofnunar Háskóla
íslands. Starfsemin hófst þegar á því ári. Alls hafa nú borist beiðnir um 20
þjónustuverkefni og gerðardóma. Af þessum verkefnum eru nú 18 til lykta
leidd.
Aðeins tvær beiðnir hafa borist um gerðardómsmeðferð, báðar frá einka-
aðilum. Annað málið varðaði skýringu á kaupsamningi, en hitt vörumerki.
Einn gerðarmaður var tilnefndur að fara með hvort mál.
Beiðnir um þjónustuverkefni hafa einkum borist frá opinberum aðilum. Má
þar m.a. nefna beiðni Fiskveiðasjóðs íslands, Félagsmálaráðuneytisins, Flug-
málastjórnar, Seðlabanka íslands, Háskóla íslands, Landlæknis, Stúdenta-
ráðs Háskóla íslands, Húsnæðismálastjórnar og Alþingis.
Til að leysa þessi verkefni hefur verkefnanefnd einkum valið kennara laga-
deildar. Hefur stundum reynst erfitt að fá þá til verka vegna annríkis við önnur
störf. Hefur verkefnanefnd þá snúið sér til annarra. Hún hefur sett sér þá
reglu að skipa ávallt tvo menn hið fæsta til að afgreiða beiðnir um þjónustu-
verkefni. Er að því stefnt að taka upp sömu reglu um gerðardóma.
Þess má að lokum geta, að nokkuð virðist hafa dregið úr starfseminni á
undanförnum mánuðum eftir talsvert kraftmikla byrjun. Engin sérstök eða
sjáanleg skýring er á þessu, en þó skal á það bent, að starfsemin hefur lítið
verið auglýst. Loks er rétt að vekja athygli á því, að starfsemi umboðsmanns
Alþingis kann að leiða til minni þarfar fyrir þjónustuverkefni Lagastofnunar.
Sigurður Líndal
forstöðumaður
75