Bændablaðið - 21.02.2013, Blaðsíða 12

Bændablaðið | Fimmtudagur 21. febrúar 201312
Fréttir
Þann 1. september næstkomandi
taka gildi lög sem kveða á um
að hlutfall hvors kyns skuli
vera að lágmarki 40 prósent
í stjórnum lífeyrissjóða og
fyrirtækja þar sem starfa fleiri
en 50 starfsmenn á ársgrundvelli.
Endurskoðunarfyrirtækið KPMG
tók saman tölfræði um þau
fyrirtæki sem falla undir löggjöfina
1. september síðastliðinn, þegar ár
var til stefnu þar til lögin tækju
gildi. Niðurstöðurnar voru sláandi.
Einungis 47 prósent fyrirtækja
uppfylltu þá skilyrðin og aðeins
42 prósent lífeyrissjóða. Samtals
vantaði 223 konur í stjórnir til að
uppfylla skilyrði laganna. Ekki
skal þvertekið fyrir að einhver
breyting hafi orðið á síðan KPMG
tók umræddar tölur saman en
ekki myndi pistlahöfundur veðja
stórum fjárhæðum á það.
Um nýliðna helgi var
Edduverðlaunahátíðin haldin í
Hörpu. Einungis þrjár leikkonur
voru tilnefndar til Edduverðlauna
fyrir leik í aðalhlutverki á móti
fimm körlum. Kristín Jóhannesdóttir
leikstjóri, sem hlaut heiðursverðlaun
kvikmyndaakademíunnar, gerði
þetta að umtalsefni í þakkarræðu
sinni og gagnrýndi harðlega. „Mig
óraði ekki fyrir því þá, að þrjátíu
árum síðar væri ekki hægt að nýta
lágmarkskvóta í flokki kvenhlutverka
til Edduverðlaunanna,“ sagði Kristín
og bætti við: „Hvað á þetta að þýða?
Þetta er ekki aðeins ójöfnuður og
óréttlæti, heldur hættuástand
sem hamlar eðlilegri framþróun
greinarinnar. Og það sem meira
er, samfélagsins alls. Þetta er
þjóðfélagsmein. Þjóðfélag verður
aldrei heilt með karlagildi ein í
öndvegi.“
Því miður eru þetta bara tvö dæmi
um þann skarða hlut sem konur
bera frá borði í íslensku samfélagi.
Einungis 23 konur sitja á Alþingi
nú, tæp 37 prósent þingmanna. Af
tólf dómurum Hæstaréttar eru aðeins
tvær konur. Einungis 37 prósent
héraðsdómara eru konur. Engin kona
stýrir neinum af stærstu fjölmiðlum
landsins, þótt nefna megi að Margrét
Marteinsdóttir er dagskrárstjóri
útvarps Ríkisútvarpsins. Fleiri dæmi
má auðveldlega tína til.
Búnaðarþing verður sett
sunnudaginn 3. mars næstkomandi.
Af 48 þingfulltrúum sem eiga sæti
þar eru einungis 12 konur. Það er
fjórðungur þingfulltrúa. Í fráfarandi
stjórn Bændasamtakanna sitja tvær
konur í sjö manna stjórn. Það er
tæplega 29 prósenta hlutur kvenna.
Nú er það reyndar svo að hjá
Bændasamtökunum starfa færri en
50 manns. Bændur sem eru félagar
í Bændasamtökunum eru hins vegar
um 6.000 talsins. Þó að karlar séu
talsvert fleiri í þeim hópi þá er fráleitt
að konur séu einungis fjórungur, nær
lagi er að þær telji um 40 prósent
félagsmanna.
Þetta er óásættanlegt. Það er
óásættanlegt að sjónarmið kvenna
séu í slíkum minnihluta sem raun
ber vitni í stefnumörkun íslensks
landbúnaðar, alveg eins og það er
óásættanlegt hversu rýr hlutur kvenna
er á flestum sviðum þjóðlífsins. Við
töpum á því, við öll.
Við hljótum að vilja stuðla að því
að hér byggist samfélag sem tekur
mið af mismunandi sjónarmiðum
karla og kvenna á öllum sviðum.
Sama hvort þar er um að ræða
atvinnulíf, menntamál, stjórnmál
eða menningu. Það verður ekki gert
öðru vísi en hlutur kvenna styrkist
á öllum sviðum. Til þess þarf
hugarfarsbreytingu, ekki síst karla.
Svo orð Kristínar Jóhannesdóttur séu
endurtekin: „Þjóðfélag verður aldrei
heilt með karlagildi ein í öndvegi.“
/fr
STEKKUR
Nýlega komu konur úr Kvenfélagi
Laugdæla færandi hendi í
Bláskógaskóla á Laugarvatni og
færðu skólanum 200.000 króna gjöf
til uppbyggingar á útiskóla skólans
í skóginum við Tjaldmiðstöðina.
Peningarnir verða notaðir til kaupa
á áhöldum til útieldunar og fleira. Það
eru fimm til sjö ára nemendur skólans
sem hafa nýtt sér aðstöðuna í vetur,
en á hverjum þriðjudegi er farið upp
í skóg og gert eitthvað skemmtilegt
saman. Þá fara börn úr leikskólanum
Gullkistunni á Laugarvatni reglulega
í skógarferðir í skóginn.
/MHH
Áfram stelpur!
Kvenfélag Laugdæla:
Gaf 200.000 krónur í útiskóla
Hluti af krökkunum í skóginum en með þeim eru þær Dröfn Þorvaldsdóttir leikskólakennari og Margrét Harðardóttir grunnskólakennari. Mynd / MHH
Grisjað í Reykjarhólsskógi
Sigurður Skúlason, skógarvörður
Skógræktar ríkisins á Norðurlandi,
segir að erfitt hafi verið að vinna
við grisjun í skógum á Norðurlandi
í vetur vegna snjóa. Þannig hafi til
að mynda mælst á annan metra
jafnfallið í Vaglaskógi og svo hafi
verið síðan í október.
Minni snjór er í Skagafirði og
með hækkandi sól er verið að grisja
í Reykjarhólsskógi við Varmahlíð
þessar vikurnar. Þar er svo til
snjólaust. Áætlað er að grisja 60-80
m3 af viði sem afhentur verður á
Grundartanga.
/MÞÞ
Unnið við grisjun í Reykjarhólsskógi við Varmahlíð í Skaga rði. Áætlað er að grisja 60-80 m3 af viði sem afhentur verður á Grundartanga.
Er tt hefur verið að vinna við grisjun skóga á
Norðurlandi í vetur vegna snjóa. Mikill snjór hefur
verið í Vaglaskógi frá því í október.