Bændablaðið - 21.02.2013, Blaðsíða 16

16 Bændablaðið | Fimmtudagur 21. febrúar 2013
Með ástríðu fyrir smíðum og hestum
Jóhanna Haraldsdóttir á Selfossi
hefur smíðað barnaleikföng í
tæp þrjátíu ár og sífellt bætist í
flóruna hjá henni við smíðarnar
og hannyrðir því til viðbótar við
sveitabæ, húsdýr og traktora rennir
hún penna og býr til skóhorn og
vettlinga með dósahaldi, svo fátt
eitt sé nefnt. Fyrir utan smíðarnar
á hestamennskan hug hennar allan.
Jóhanna var svínabóndi á Haga
í Þjórsárdal ásamt manni sínum
Rúnari Andréssyni frá Ásatúni í
Hrunamannahreppi í fjölmörg ár
áður en þau tóku sig upp og fluttu
á Selfoss fyrir rúmum tíu árum. Þau
eiga fjögur börn: Jóhann, Harald,
Sverri og Önnu Margréti.
Fyrir utan tréleikföngin framleiðir
Jóhanna vettlinga með haldi, sem
er snúningur út frá hefðbundnum
bjórvettlingum. Einnig gerir hún
skóhorn og rósamálar á dúkkuvöggur
og -vagna og saumar í það sængurföt
ásamt fleiru.
„Það eru 28 ár síðan ég byrjaði að
gera barnaleikföngin í kjölfarið af því
að ég keypti mér norsku smíðablöðin
Gjør det selv. Ég fékk margar hug-
myndir úr smíðablöðunum eins og
til dæmis sveitabæinn sem ég gerði
fyrst en ég hef stundum þurft að finna
út úr uppskriftunum á minn hátt. Það
voru mjög góðar og sniðugar leið-
beiningar í blöðunum sem eru breytt
í dag og nú er lögð meiri áherslu á
stærri smíði en áður eins og til dæmis
sólpalla og slíkt,“ útskýrir Jóhanna.
Fjölhæf í handverkinu
Jóhanna byrjaði í barnaleikföngum
og hefur þróað línu með þau en
einnig gerir hún fjölmargt sem hentar
fyrir fullorðna.
„Húsdýrin eru mjög vinsæl og
eins traktorarnir. Ég hannaði hús-
dýrin alveg sjálf en það hefur verið
mikil þróun með þau alveg frá því
að ég byrjaði á þeim. Ég geri líka
fullorðinsgjafir eins og penna sem ég
renni og ég flyt inn efnið í pennana.
Einnig er ég farin að gera tréöskjur
utan um pennana sem hefur verið
vinsælt en ég nota lerki, hlyn og gull-
regn í framleiðslunni á pennunum en
einnig nota ég harðvið í leikföngin,“
segir Jóhanna og bætir við;
„Ég fór hér áður á nokkur
rennismíðanámskeið. Sverrir sonur
minn fór á rennismíðanámskeið þegar
hann var 12 ára gamall og hannaði
síðan traktorinn sem ég geri í dag. Ég
renni hjólin á öll farartækin svo það
er mikil ending í þessu og þau fara
ekki undan tækjunum. Ég er mjög
smámunasöm að þetta sé vel gert og
vil hafa alla hluti nánast fullkomna
þannig að ég vil pússa allt mitt sjálf.
Það er lykilatriði hjá mér að hafa
leikföngin sterk svo að þau endist
vel en einnig að hafa mjúkar línur
fyrir börnin og aldrei hvassar brúnir.“
Samstarf við Maríuhús
Fyrir þremur árum hóf Jóhanna
samstarf við Maríuhús í Reykjavík
sem er dagþjálfun fyrir fólk með
heilabilanir. Jóhanna sker út húsdýr
fyrir Maríuhús en síðan sjá vistmenn
þess um fullvinnslu þeirra.
„Það er til eftirbreytni samstarf
mitt við Maríuhús. Þau fá hjá mér
húsdýrin alveg hrá en síðan pússa
þau dýrin og bera á þau olíu. Því
næst pakka þau þessu og selja
sínum aðstandendum. Forstöðumenn
Maríuhúss fundu strax mikinn mun
á vistmönnum sínum sem urðu mjög
jákvæð og glöð að fá þetta verkefni
til að dunda við. Þau opna sig um
gamla tíma, sumir sem tala lítið sem
ekki neitt og þau bíða alltaf eftir því
að fá að gera meira ef skammturinn
klárast. Mér finnst mjög skemmtilegt
að geta tekið þátt í svona starfi og að
sjá að þetta hjálpi svona mikið til,“
útskýrir Jóhanna með bros á vör.
Hestamennska í bland við
smíðarnar
Jóhanna er í stöðugri þróunarvinnu
með vörur sínar og hefur ekki nægan
tíma til að fylgja öllum sínum hug-
myndum eftir. Fyrir utan smíðarnar
dvelur hún mikið í hesthúsinu en
hestamennskan á hug hennar allan.
„Ég er mikið fyrir að hafa allt
vistvænt og ber til dæmis dökk-
græna ólífuolíu á barnaleikföngin.
Núna er ég að gera tilraun með að
nota repjuolíu frá Þorvaldseyri til að
húða leikföngin með, hún er kald-
pressuð, vistvæn og þránar ekki,“
segir Jóhanna og bætir við;
„Ég skipti um gír eftir jólin eftir
pakkaflóðið og fer þá í hesthúsin.
Það hægist verulega um svo núna er
ég í því að smíða til að eiga á lager.
Ég er í hestunum öllum stundum,
það er mitt líf og yndi en auðvitað
smíðarnar líka. Ég er með margar
hugmyndir í kollinum en hef aldrei
tíma til að gera allt sem mig langar
til. Ég hef alltaf haft gaman af að
smíða, það hefur alltaf togað í mig.“
Hægt er að sjá framleiðslu
Jóhönnu á Facebook-slóðinni;
johanna haralds-TreLeikfong
/ehg
Jóhanna í hesthúsinu með mm bræður á járnum sem eru undan Fjólu frá Haga í Þjórsárdal. Rúnar, maður Jóhönnu, kom með Vindu frá Ásatúni, mömmu Fjólu, frá heimaslóðum Rúnars, sem
var uppha ð að hestaræktun þeirra. Frá vinstri Skuggi, Dropi, Logi, Fákur og Trítill. Myndir / ehg
Jóhanna Haraldsdóttir hefur hannað og smíðað leikföng í um þrjátíu ár og
hefur góða aðstöðu til þess í bílskúrnum heima hjá sér og í hesthúsinu.
Vörubílar úr smiðju Jóhönnu eru mjög sterkir og endingargóðir. Fjölskylda
stendur hjá.
Jóhanna hefur unun af hestamennskunni og þykir gaman að keppa enn þann
dag í dag. Hér sést hún á Loga frá Selfossi. Mynd / Þórdís Sigurðardóttir
Rauði sveitabærinn með græna þakinu er það fyrsta sem Jóhanna tók sér
fyrir hendur í smíðunum. Einnig má sjá sýnishorn af húsdýrum og traktorum.
Pennarnir sem Jóhanna rennir hólk
utan um hafa verið vinsælir til gjafa
og boxin utan um þá.