Læknablaðið - 15.08.1987, Blaðsíða 48
230
LÆKNABLAÐIÐ
aðrar starfsstéttir sælist ekki í þeirra störf, t.d.
hjúkrunarfræðingar, sjúkraþjálfarar o.fl.
msar ófyrirsjáanlegar breytingar í
heilbrigðiskerfinu leiða til breytinga á
mannaflaþörf í einstökum greinum. Breytt
sjúkdómstíðni og nýir sjúkdómar s.s. eyðni
krefjast nýrra úrræða. Læknar eiga aukna
möguleika á starfi við ýmiskonar rannsóknir,
bæði faraldsfræðilegar og erfðafræðilegar, einnig
við fræðslu almennings á nauðsyn heilbrigðs
lífernis. Til þessa hafa læknar lítið sinnt
stjórnunarstörfum á sjúkrahúsum og í
heilbrigðiskerfinu almennt, afskipti lækna af
þeim ætti að geta leitt til betri skipunar
heilbrigðismála.
Að öllu samanlögðu er alls ekki sjálfgefið að
atvinnuleysi herji á Iækna, verði brugðist við í
tíma.
Helgi Sigurðsson var síðastur framsögumanna.
Takmarkanir á aðgangi í læknadeild eru afar
viðkvæmt mál hjá læknanemum. Flestir eru þó
sammála um að á einhvern hátt þurfi að
takmarka aðgang að deildinni á fyrsta námsári.
Nemendum finnst ákaflega sárt að uppfylla þær
faglegu kröfur sem læknadeild gerir til fyrsta árs
nema, en vera síðan meinaður aðgangur að námi
á öðru ári.
Inntökupróf leysir engan vanda, með því er
samkeppnispróf fært niður á menntaskólastig og
afleiðingin verður sérstök undirbúningsbraut
fyrir inntökupróf í deildina, í stað þess að gefa
nemendum kost á að tileinka sér þekkingu á
öðrum sviðum. Einnig er vafamál að þeir sem búa
yfir mestum samkeppnismetnaði og lestrarhraða
verði best fallnir til læknisstarfa. Rétt er að hafa
þetta í huga þegar rætt er um ennþá meiri
takmarkanir inn í læknadeild, byggðar á
einkunnagjöf einni saman.
Á árinu 1985 var gerð könnun meðal sjötta árs
læknanema og kváðust 45% þeirra ekki velja
læknisfræði nú ættu þeir kost að breyta vali.
Þetta sýnir nauðsyn á mjög aukinni
námskynningu og umræðu um atvinnuhorfur.
Sérstaklega er nauðsynlegt að kynna nýjar
starfsgreinar sem eru í örri þróun. Nemendur
hafa þá úr fleiru að moða en hefðbundnum
greinum.
Læknanemum þykir kennslan í læknadeild oft
minna á hafbeitarfyrirkomulag. Nemendur eru
seiði, alin upp í kerjum stórra fyrirlestrarsala
fyrstu þrjú árin, fóðruð á aragrúa smáatriða sem
aðeins þeir viðbragðsfljótustu ná í. Er kemur að
klínískum þætti er nemendum sleppt í haf
klínískra deilda þar sem fæðan er misjöfn eftir
miðum. Þessu verður að breyta og taka upp
persónubundnari kennslu, sem krefst fleiri lækna
til kennslu. Með því móti má einnig reikna með
betri kennslu og betri árangri nemenda.
Nýlega kom hópur embættismanna frá
Vermlandi í Svíþjóð og bauð íslenskum
unglæknum gull og græna skóga, vildu þeir koma
til starfa í Svíþjóð. í boði voru
heilsugæslustöðvar, kandídatsblokkir og
sérfræðinám, offjölgunarvandi sænskra lækna
virðist því staðbundinn. Síðan má um það deila
hvort hlutverk íslensks þjóðfélags sé að mennta
lækna til starfa erlendis.
Læknanemar gera sér vel grein fyrir því að ekki er
hægt að velja hvaða sérgrein sem er og krefjast
starfs í viðkomandi grein hér heima strax að
loknu námi.
Læknanemar hafa fullan hug á að taka til greina
þá möguleika sem fyrir hendi eru, og formaður
Félags læknanema sagði þá þakkláta fyrir allar
ábendingar í þeim efnum.
INNLEGG FRÁ FÍLÍNA
Áður en almennar umræður hófust var lesið
eftirfarandi innlegg frá stjórn Félags íslenskra
lækna í Norður-Ameríku, en félagið hafði ekki
tök á að senda fulltrúa sinn á málþingið:
»Atvinnuhorfur íslenskra lækna nú eru
augljóslega slæmar og bein afleiðing af því hversu
margir læknar útskrifast árlega. Nú er stærð
árganga takmörkuð með numerus clausus við 36.
Hins vegar er ljóst að þessi tala er óeðlilega há, og
má benda á að samsvarandi fjöldi nýútskrifaðra
kandídata í Bandaríkjunum er um það bil 15, ef
miðað er við fólksfjölda.
Stjórnin leggur til að fjöldi útskrifaðra lækna
verði takmarkaður enn fremur, að minnsta kosti
tímabundið, og telur að 15 læknakandídatar á ári
sé hæfileg tala. Slík fækkun á kandídötum mun á
sex til tíu árum leiða til þess, að fjöldi
kandídatsstaða væru ómannaðar. Þetta gæfi
möguleika á því að breyta heildarbyggingu
kerfisins, þannig að ráðnir væru læknar með
sérfræðiþjálfun á hinum ýmsu sviðum og
verksviði innan hverrar greinar breytt, þannig að
kandídatsvinnan dreifðist á alla sérfræðinga
hverrar deildar.
Stjórn FÍLÍNA vill ennfremur benda á aðrar
leiðir í rekstri sjúkrahúsanna. Víða um heim er