Læknablaðið - 15.08.1987, Blaðsíða 65

LÆKNABLAÐIÐ
247
myndaðist spenna milli heimilislækna annars
vegar og sérfræðinga hins vegar, sem byggðist á
hugmyndafræðilegum ágreiningi og
hagsmunaátökum. En reynsla undanfarinna ára
hefur leitt í ljós, að þessi togstreita dregur úr styrk
samtaka okkar og þjónar hvorki hagsmunum
okkar né þeirra, sem þjónustunnar njóta. Það er
skoðun okkar, að forsenda samstarfs
heimilislækna og sérfræðinga sé traust og
gagnkvæmur skilningur á verksviði hvors annars.
Einnig að þó heilsugæslustöðvar séu
aðalstarfsvettvangur heimilislækna, hindrar það
hvorki aðgang greina sérfræðinga að stöðvunum
né samstarf þessara aðila um greiningu, meðferð
og eftirlit einstakra sjúklinga.
Ágreiningi sérfræðinga og heimilislækna þarf að
eyða, enda stendur hann í vegi fyrir eðlilegri
þróun heilbrigðisþjónustu í landinu.
Við óskum eftir stuðningi aðalfundarfulltrúa við
ofangreind atriði.»
Magni Jónsson og Haukur Þórðarson fögnuðu
þessu erindi og lagði Haukur til, að þeir, sem
vildu, undirrituðu þetta erindi, og það væri síðan
tilmæli til stjórnar. Undirrituðu 19 fundarmenn
erindið.
Kjartan Örvar fékk orðið og ræddi um
framhaldsnám, sem nú væri í mikilli óvissu.
Samband hefði verið haft við norska
læknafélagið og lögð fram beiðni frá L.í. og FUL
um samstarf að þessu máli, en norska
læknafélagið hefði hafnað beiðninni. Hann lagði
síðan fram eftirfarandi bókun frá FUL:
»Með hverju ári verður æ erfiðara fyrir unga
lækna að komast í framhaldsnám erlendis, þar
sem samkeppni um námsstöður er gífurleg. Það
er ljóst, að opna verður nýjar leiðir fyrir
framhaldsnám, og er Noregur þar ofarlega á
blaði. Nýlega hefur norska læknafélagið hafnað
beiðni L.í. og FUL um aðstoð við að koma
íslenskum læknum að við framhaldsnám í
Noregi, en vísað á heilbrigðisyfirvöld í báðum
löndum um hugsanlegan samning þar að lútandi.
FUL beinir þeim tilmælum til stjórnar L.Í., að
hún beiti sér fyrir því, að heilbrigðisyfirvöld á
íslandi reyni að ná samkomulagi við norsk
stjórnvöld um framhaldsnám þar í landi.»
Haukur Þórðarson sagði, að umræða um þetta
mál yrði á Læknaþingi í haust. Hann bar að
lokum fram þakkir til fundarmanna,
fundarstjóra og fundarritara og sleit fundi.