Læknablaðið - 15.10.1988, Page 35

LÆKNABLAÐIÐ
329
átt þess kost að lesa þau. Fyrirhugað er að hin
nýju lög verði kynnt frekar og rædd á aðalfundi
L.í. á Egilsstöðum í ágúst 1988 og verður því ekki
nánar um þau fjallað hér.
ÍSLENSK HEILBRIGÐISÁÆTLUN
Eins og öllum læknum mun kunnugt Iagði
þáverandi heilbrigðis- og tryggingamálaráðherra,
Ragnhildur Helgadóttir, íslenska
heilbrigðisáætlun fram á Alþingi á 109.
löggjafarþingi 1986-1987. Áætlunin var gefin út
af ráðuneytinu í apríl 1987 (Rit 1/1987). Stjórn
L.í. hafði kynnt sér og að nokkru fjallað um
einstaka þætti áætlunarinnar þegar ráðuneytið
óskaði í bréfi, dags. 3. des. 1987, umsagnar
stjórnar L.í. um hana. Ráðuneytið gaf því miður
ekki langan frest en stjórnin náði þó að leita álits
Félags ísl. heimilisækna og Sérfræðingafélags
lækna. Umsögn stjórnarinnar var send
ráðuneytinu með bréfi dags. 6. jan. 1988
svohljóðandi:
»Stjórn Læknafélags íslands þakkar fyrir að hafa
fengið íslenska heilbrigðisáætlun til umsagnar.
Umsögn félagsins fylgir hér með. Jafnframt fylgir
hjálagt álit sérstakrar nefndar félagsins, sem
fjallaði um göngudeildir árið 1982.
Stjórninni er Ijóst, að íslensk heilbrigðisáætlun,
sem hér hefur verið fjallað um, er frumraun og
undanfari framtíðaráætlunar.
Stjórnin gerir athugasemdir við suma þætti
áætlunarinnar og bendir á atriði, sem að hennar
mati mættu betur fara. Samt sem áður telur
stjórnin ýmsa þætti hennar mjög jákvæða fyrir
íslenska heilbrigðisþjónustu í framtíðinni.
Stjóm Læknafélags íslands lýsir sig reiðubúna til
að taka þátt í frekari umræðu og úrvinnslu
lokafrágangs íslenskrar heilbrigðisáætlunar og
síðari endurskoðun á þeirri áætlun, eftir því sem
ástæða verður talin til.«
Rétt þykir að birta hér umsögnina í heild:
»Inngangur
Stjórn Læknafélags íslands telur brýnt, að til sé
mörkuð stefna í heilbrigðismálum hér á landi.
Einnig að stjórnvöldum sé skylt að leggja fram
skilgreind heilbrigðismarkmið og ekki síður að
skilgreina leiðir til að ná þeim.
Stjórninni er ljóst, að skoðanir eru skiptar um
vægi einstakra markmiða og þó enn frekar um
það, hvaða leiðir verði valdar til að ná þeim.
Stjórn félagsins lítur svo á, að íslensk
heilbrigðisáætlun, sem þáverandi heilbrigðis- og
tryggingamálaráðherra lagði fram á Alþingi í
apríl 1987, sé að svo komnu fyrst og fremst
rammaáætlun, sem er annars vegar greinargerð
um stöðu ýmissa meginþátta
heilbrigðisþjónustunnar, einkum
forvarnarþáttanna, og hins vegar setning
markmiða um þróun þeirra. í þessari
rammaáætlun kemur glöggt fram, að mjög er
breytilegt, hversu ítarlegur rökstuðningur er
færður fyrir hinum mismunandi markmiðum og
forsendur sumra þeirra því ekki skýrar.
íslensk heilbrigðisáætlun tekur mið af stefnu
Alþjóða heilbrigðismálastofnunarinnar, sem
nefnd er »Heilbrigði fyrir alla árið 2000«. Stjórn
L.í. hefur áður kynnt sér þá stefnu eins og hún er
fram sett í riti Evrópuskrifstofu Alþjóða
heilbrigðismálastofnunarinnar, »Targets for
Health for All. Targets in Support of the
European Regional Strategy for Health for All«,
sem gefið var út á árinu 1986. Stjórnin hefur ekki
talið ástæðu til athugasemda við stefnu Alþjóða
heilbrigðismálastofnunarinnar, enda þótt menn
hafi verið sammála um, að ýmis tilvik
heilbrigðisþjónustu, sem þar eru rakin, og ýmis
markmið, sem þar eru kynnt, hafi lítið hagnýtt
gildi fyrir ísland með hliðsjón af tiltölulega háum
staðli í heilbrigðismálum hér á landi.
Fulltrúar Læknafélags íslands hafa tvívegis, árið
1986 og aftur árið 1987, setið ráðstefnu
Evrópuskrifstofu Alþjóða-
heilbrigðismálastofnunarinnar, þar sem boðaðir
voru fulltrúar heildarsamtaka Iækna í öllum
Evrópulöndunum. Á þessum ráðstefnum hefur
verið fjallað um forvarnarþætti, sem m.a. eiga
það sammerkt, að það veltur á læknum að
verulegu leyti, hvernig til tekst um framkvæmd
þeirra. Læknafélag íslands hefur lýst yfir fullum
stuðningi við sjónarmið og áform Alþjóða
heilbrigðismálastofnunarinnar, hvað varðar þessa
þætti.
Stjórn félagsins er ljóst, að á meðal lækna eru
skoðanir skiptar um einstaka þætti íslenskrar
heilbrigðisáætlunar. Hins vegar verður ekki deilt
um tilgang hennar, sem er m.a., eins og fram
kemur í samþykkt ríkisstjórnarinnar frá 20. mars
1986, að stórauka forvarnir, að búa fólk undir
gott heilsufar i ellinni og að efla heilbrigða
lífshætti.
Það kemur fram í aðfaraorðum íslenskrar
heilbrigðisáætlunar, að starfshópi, sem ráðherra
skipaði til að leggja að henni drög, var ætlað i
fyrsta áfanga að koma með »m.a. tillögur um