Morgunblaðið - 02.03.2012, Blaðsíða 4

4 FRÉTTIRInnlent
MORGUNBLAÐIÐ FÖSTUDAGUR 2. MARS 2012
Sigrún Rósa Björnsdóttir
Guðrún Hálfdánardóttir
Stjórn Fjármálaeftirlitsins (FME)
rak í gærmorgun Gunnar Þ. Ander-
sen, forstjóra stofnunarinnar, úr
starfi. Jafnframt kærði stjórnin
Gunnar til lögreglu eftir að henni bár-
ust ábendingar um að Gunnar gæti
hafa brotið af sér í starfi og aflað sér
trúnaðarupplýsinga úr bankakerfinu
með ólögmætum hætti.
Þetta kom fram á blaðamannafundi
með stjórn FME í gær.
Samkvæmt heimildum Morgun-
blaðsins er talið að þar sé átt við að
Gunnar á að hafa nýtt sér aðstöðu
sína til að ná í upplýsingar um fjármál
Guðlaugs Þórs Þórðarsonar alþingis-
manns í gegnum starfsmann Lands-
bankans.
Spurður um málið sagðist Steinþór
Pálsson, bankastjóri Landsbankans,
ekki geta tjáð sig um það. Friðrik
Smári Björgvinsson, yfirlögreglu-
þjónn hjá lögreglunni á höfuðborgar-
svæðinu, staðfestir að borist hafi
kæra frá stjórn FME. Hann vill hins
vegar ekkert segja um hver er kærð-
ur eða fyrir hvað.
Skúli Bjarnason, lögmaður Gunn-
ars, sendi í gær frá sér yfirlýsingu þar
sem Gunnar lýsir sig saklausan af
þeim atriðum sem þar eru sett fram
til grundvallar kærunni. Þar segir
einnig að Hvorki Gunnar né Skúli hafi
fengið kæruna, né þau gögn sem hún
væri sögð byggja á.
Aðalsteinn Leifsson, formaður
stjórnar FME, vildi ekki tjá sig um
efni uppsagnarbréfsins en hann af-
henti Gunnari það á heimili hans í
gærmorgun. Jafnframt tilkynnti
hann Steingrími J. Sigfússyni, efna-
hags- og viðskiptaráðherra, niður-
stöðu stjórnarinnar. Ráðherrann til-
kynnti í gær að stjórn FME nyti fulls
trausts ráðuneytisins.
Aðalsteinn sagði í samtali við RÚV
að það hefði komið skýrt fram í and-
mælum Gunnars og einnig í viðtölum
við hann á opinberum vettvangi að
hann telji að upplýsingagjöf sín hafi
verið rétt og hann hafi jafnvel bætt
því við að það hefði beinlínis verið
rangt að gefa Fjármálaeftirlitinu upp-
lýsingar um aflangsfélögin.
„Þessi afstaða Gunnars í dag er í
hrópandi andstöðu við þá einörðu
stefnu Fjármálaeftirlitsins að fylgja
eftir heiðarlegum og eðlilegum við-
skiptaháttum á fjármálamarkaði.
Þannig að það verður ekki við það un-
að að Gunnar lýsi yfir afstöðu sem er
algjörlega á skjön við afstöðu eftirlits-
ins,“ sagði Aðalsteinn við RÚV.
Birkir Jón Jónsson, fulltrúi Fram-
sóknarflokksins í efnahags- og við-
skiptanefnd, óskaði í gær eftir að
fundað yrði sem fyrst í efnahags- og
viðskiptanefnd til að fara yfir stöðu
FME í kjölfar uppsagnar forstjórans.
Unnur Gunnarsdóttir, yfirlögfræð-
ingur FME, tók í gær tímabundið við
forstjórastarfinu af Gunnari.
Hæfisskortur aðalástæðan
Aðalástæða uppsagnar Gunnars
eru samkvæmt stjórn brostnar for-
sendur fyrir því að hann geti gegnt
stöðu sinni þar sem skorti á hæfi
hans. Vísar stjórnin þar til aðkomu
hans að aflandsfélögum á vegum
Landsbankans, þar sem hann var
einn framkvæmdastjóra.
Ingibjörg Þorsteinsdóttir, varafor-
maður stjórnar FME, sagði í gær að
Gunnari hefði verið vikið frá vegna
hæfisskorts, þó að ekki hefði komið
upp að hann hefði brotið af sér starfi.
Vegna meints brots hefði honum ver-
ið gert að hætta strax í stað þess að
starfa út sex mánaða uppsagnarfrest.
Réttar tvær vikur eru síðan stjórn-
in tilkynnti Gunnari fyrirhuguð
starfslok hans. Hafði stjórnin þá ný-
lega fengið í hendurnar álit Ásbjörns
Björnssonar endurskoðanda og Ást-
ráðs Haraldssonar hæstaréttarlög-
manns. Stjórnin fékk þá til að fara yf-
ir álit Andra Árnasonar
hæstaréttarlögmanns og þau gögn er
því fylgdu og leggja sjálfstætt mat á
hæfi Gunnars sem forstjóra FME.
Andri var fenginn til að meta hæfi
Gunnars aftur eftir þá gagnrýni sem
kom fram í Kastljósþætti 17. nóvem-
ber á störf hans fyrir um tíu árum
þegar hann var starfsmaður Lands-
bankans. Andri taldi Gunnar hæfan.
Ásbjörn og Ástráður gerðu athuga-
semdir við að Gunnar hefði ekki getið
þess í bréfi árið 2001, að Landsbank-
inn ræki tvö aflandsfélög á Guernsey.
Fram kom í greinargerðinni að Gunn-
ar viki sæti þegar mál er vörðuðu
gamla Landsbankann væru til um-
fjöllunar.
Gunnar og Skúli, lögmaður hans,
hafa deilt við stjórnina um málsmeð-
ferðina og lýstu meðal annars
óánægju með lengd andmælafrests
sem þeir töldu of stuttan. Stjórnin
framlengdi svo frestinn. Einnig var
deilt um réttarstöðu Gunnars sem
forstjóra FME en fjármálaráðherra
úrskurðaði í fyrradag að starfið félli
undir lög um réttindi og skyldur
starfsmanna ríkisins og Gunnar teld-
ist embættismaður í skilningi lag-
anna.
Gunnar rekinn frá FME
 Stjórn FME gerði Gunnari Þ. Andersen að hætta strax í gær sem forstjóri FME  Stjórnin kærði
hann til lögreglu fyrir brot í starfi  Gunnar segir brottrekstur sinn löngu ákveðinn á bak við tjöldin
Morgunblaðið/Sigurgeir S.
Átök Fjármálaeftirlitið er til húsa í turninum við Höfðatorg. Þar hefur mikið gengið á undanfarna daga.
Stjórn Fjármálaeftirlitsins sagði í gær að sér hefðu bor-
ist ábendingar um að Gunnar Þ. Andersen, sem var rek-
inn úr starfi forstjóra FME í gær, kynni að hafa brotið af
sér í starfi með því að verða sér úti um upplýsingar úr
bankakerfinu án heimildar.
Fjármálaeftirlitið fer eftir málsmeðferðarreglum
stjórnsýslulaga og hefur víðtækar heimildir til að afla
sér gagna frá fjármálafyrirtækjum en þær byggjast m.a.
á að allt sé skriflegt og rekjanlegt, að sögn Unnar Gunn-
arsdóttur, sem hefur tekið tímabundið við stöðu for-
stjóra Fjármálaeftirlitsins en hún starfaði áður sem yf-
irlögfræðingur FME. Unnur var spurð um þær reglur
sem gilda þegar FME óskar eftir gögnum eða upplýsingum úr fjár-
málakerfinu. „Við óskum eftir upplýsingum bréflega og það eru alltaf tveir
sem undirrita. Þetta er svo inni í skjalavörslukerfinu okkar og hægt að
rekja eftir málum,“ segir Unnur en eftirlitið byggist meðal annars á öflun
gagna og greiningu þeirra.
Allt skriflegt og rekjanlegt hjá FME
Unnur
Gunnarsdóttir
„Ég verð að viðurkenna það að mér er brugðið,“ segir
Guðlaugur Þór Þórðarson alþingismaður spurður um það
sem kemur fram í fréttum að Gunnar Þ. Andersen hafi
fengið fjármálatengdar upplýsingar um hann. Guðlaugur
Þór segist hafa sinnt sínum skyldum sem þingmaður, sitji í
efnahags- og viðskiptanefnd og hafi með málefnalegum
hætti gagnrýnt og veitt aðhald stjórnvöldum og stofn-
unum þess. Hann láti ekki hræða sig frá því. „Ég hef ekki
hugmynd um hvort þetta er bundið við mig en það að
maður í þessari stöðu sé að hnýsast í einkamál manna til
þess að dreifa athyglinni og grafa undan trúverðugleika
þeirra, það er grafalvarlegt,“ segir Guðlaugur Þór. Sjálf-
ur hafi hann ekkert að fela. Hann segist velta því fyrir sér hvort þetta sé ein-
angrað tilvik, eða hvort þetta hafi verið gert áður. Það verði að kanna.
Spurður hvers vegna hann telji að Gunnar ætti að sjá sér hag í að finna fjár-
hagsupplýsingar um hann segir Guðlaugur Þór það ekkert leyndarmál að
hann hafi gagnrýnt framgang stjórnvalda og FME í ýmsum málum. Hann
vísar til erindis síns um Byr og SpK þar sem tilgreint sé lögbrot en eftirlitið
hafi sett kíki fyrir blinda augað og forstjórinn reynt að gera lítið úr því. „Ég
er sammála yfirlýsingu starfandi forstjóra FME og ég vona eins og kemur
þar fram að þetta muni ekki skaða FME til langframa. Það er afskaplega
mikilvægt að við getum treyst þessari stofnun.“
Kanni hvort þetta sé einstakt tilvik
Guðlaugur Þór
Þórðarson
„Það var búið að ákveða þetta fyrir lifandis löngu og það
er búinn að vera þrýstingur frá því Kastljósþátturinn var
sýndur 17. nóvember síðastliðinn,“ sagði Gunnar Þ. And-
ersen í samtali við Morgunblaðið. Hann telur að á bak við
aðdragandann að brottrekstrinum standi eitthvað stórt
sem erfitt sé að sjá eða festa hendur á. Rannsaka þurfi
hverjir stóðu á bak við Kastljósþáttinn „Ég veit um að-
komu nokkurra manna að því. Þetta var löngu ákveðið
og það var aldrei hlustað á nein rök í andmælum, þannig
að maður vissi hvert þetta stefndi,“ segir Gunnar um
brottrekstur sinn í gærmorgun en hann telur að atburða-
rásinni hafi verið leikstýrt á bak við tjöldin.
Spurður um það sem kemur fram í fréttum að hann hafi sótt sér fjár-
málatengdar upplýsingar um alþingismanninn Guðlaug Þór Þórðarson frá
Landsbankanum, segist Gunnar ekki hafa séð kæruna né nokkuð henni
tengt og geti því ekki tjáð sig um efni hennar. Hann vísar til efnis yfirlýs-
ingar þar sem hann lýsir sig saklausan.
Löngu ákveðið bak við tjöldin
Gunnar Þ.
Andersen
Hólmfríður Gísladóttir
holmfridur@mbl.is
Hjónin Hildur M. Jónsdóttir og Bernd
Ogrodnik hafa lokað dyrum Brúðu-
heima í Englendingavík í Borgarnesi
en þar starfræktu þau meðal annars
brúðuleikhús, safn, kaffihús og gallerí.
Ástæðan fyrir lokuninni er fjárhags-
legur forsendubrestur, segir Hildur
en þær fjárveitingar og styrkir sem
reiknað hafði verið með hafi að engu
orðið í kjölfar bankahrunsins.
„Við vorum náttúrlega að fara af
stað korteri eftir hrun, korteri eftir
„Guð blessi Ísland,“ og þá held ég að
menn hafi ekki gert sér í hugarlund í
hvað stefndi. Eða kannski var bara
svona mikil bjartsýni í mönnum og
hugur til að styðja við góð verkefni,“
segir Hildur.
Hún segir að verkefnið, sem var
öðrum þræði ætlað að auka veg
strengjabrúðunnar og skapa henni
heimili, hafi fengið mikinn meðbyr á
sínum tíma og þau verið vongóð um að
fá ýmsa styrki og fjárframlög. Á þeim
forsendum hefðu þau meðal annars
ráðist í að endurgera 120 ára gömul
hús í Englendingavík en síðan komið
að lokuðum dyrum hvað varðaði fjár-
veitingarnar. Þá hefði rekstrarkostn-
aður einnig hækkað verulega.
„Það var alls staðar skorið niður og
þetta bitnaði á fleirum en okkur. Við
höfum fullan skilning á því að nú eru
erfiðir tímar en það er mjög erfitt að
halda úti leikhúsi og setja upp nýjar
sýningar án styrkja og við ákváðum að
ef þetta gengi ekki í vetur væri þessu
sjálfhætt,“ segir Hildur.
Brúðuheimar fengu fádæma góðar
viðtökur jafnt gesta sem gagnrýnenda
og hafa sýningar á vegum þeirra með-
al annars unnið til Grímunnar, ís-
lensku sviðslistaverðlaunanna. Aðsókn
var rífandi góð í Brúðuheima á sumr-
in, að sögn Hildar, en á veturna fór
eiginmaður hennar, brúðugerðameist-
arinn Bernd, með sýningar sínar í leik-
og grunnskóla. Þær fengu þó einnig að
finna fyrir niðurskurðarhnífnum undir
lokin, segir hún.
Sívaxandi brúðusafninu hefur því
verið komið fyrir í geymslu í bili en
Hildur og Bernd eru alls ekki hætt.
„Við höfum lengi verið í frábæru
samstarfi við Þjóðleikhúsið. Bernd
hefur gert brúður og leikmuni fyrir
sýningar þeirra og við höfum verið
með gestasýningar hjá þeim,“ segir
Hildur. Áframhald verður á því sam-
starfi en hjónin hafa þó ákveðið að
vinna frá Vancouver í Kanada næstu
tvö árin þar sem Bernd mun hafa nóg-
an starfa.
„Við ætlum að njóta þess besta sem
báðar þjóðir hafa upp á að bjóða
næstu tvö árin og taka síðan stöðuna
og sjá hver þróunin hefur orðið hér
heima,“ segir Hildur.
Brúðuheimum í Englendingavík lokað
Morgunblaðið/Helgi Bjarnason
Brúðuleikhús Hildur og Bernd frumsýna Gamla manninn og hafið, sýningu
fyrir fullorðna og eldri krakka, í Þjóðleikhúsinu 20. maí næstkomandi.
 Væntingar um styrki og fjárveit-
ingar urðu að engu eftir bankahrun