Morgunblaðið - 08.12.2012, Blaðsíða 25
FRÉTTIR 25Innlent
MORGUNBLAÐIÐ LAUGARDAGUR 8. DESEMBER 2012
Helgi Bjarnason
helgi@mbl.is
Miklar opinberar framkvæmdur eru
í Mosfellsbæ. Nú sér fyrir endann á
þeim stærstu. Stjórnendur Mosfells-
bæjar vonast til að afsláttur af lóða-
verði á tveimur atvinnusvæðum og
fyrirgreiðsla bæjarins verði til þess
að uppbygging hefjist á vegum
einkafyrirtækja.
Unnið er að fjórum umfangsmikl-
um byggingarframkvæmdum í Mos-
fellsbæ. Bærinn er að byggja 30
rýma hjúkrunarheimili við Langa-
tanga, samkvæmt samningum við
ríkið sem fjármagnar uppbyggingu
og rekstur. Heimilið verður tekið í
notkun á næsta ári. Í tengslum við
byggingu hjúkrunarheimilisins er
verið að innrétta þjónustumiðstöð
fyrir aldraða við Eirhamra. Áætlað
er að aðstaðan verði tilbúin snemma
á árinu 2014. Haraldur Sverrisson,
bæjarstjóri Mosfellsbæjar, segir að
með þjónustumiðstöðinni verði mikil
framför í þjónustu við aldraða í
Mosfellsbæ.
Framhaldsskóli í nýtt húsnæði
Unnið er af krafti við byggingu
framhaldsskóla við Háholt, FMOS.
Framkvæmdin er samvinnuverkefni
ríkis og sveitarfélags. Áætlað er að
skólinn verði tilbúinn snemma árs
2014. Í þessum fyrsta áfanga er um
4.000 fermetra bygging sem rúma á
400 til 500 nemendur. Jafnframt er
gert ráð fyrir möguleika til stækk-
unar í framtíðinni.
Framhaldsskólinn tók til starfa
haustið 2009 og er til bráðabirgða í
elsta skólahúsnæði Mosfellsbæjar,
Brúarlandi.
Fjórða verkefnið sem Mosfells-
bær stendur fyrir er bygging nýs
íþróttasalar við Íþróttamiðstöðina á
Varmá. Í salnum verður aðstaða fyr-
ir fimleika og bardagaíþróttir.
Framkvæmdin er í útboðsferli og
munu framkvæmdir hefjast af full-
um krafti eftir áramótin.
„Við höfum haldið uppi fram-
kvæmdum. Ekki er óeðlilegt að hið
opinbera sýni lit þegar kreppa geng-
ur yfir. Við vonumst til að nú fari í
hönd betri tímar og meiri eftirspurn
verði eftir lóðum,“ segir Haraldur.
Bærinn hefur kynnt lækkun lóða-
verðs á atvinnulóðum á tveimur ólík-
um atvinnusvæðum. Gatnagerðar-
gjöld hafa verið lækkuð og
byggingarréttargjald fellt niður. Þá
er þeim sem kaupa lóðirnar boðið að
greiða þær með skuldabréfi til tíu
ára, afborgunarlaust fyrstu tvö árin.
Haraldur segir nauðsynlegt að
koma hreyfingu á þennan markað
og hvetja til uppbyggingar. „Við
bjóðum upp á góðan kost fyrir fyr-
irtæki að byggja sig upp. Með því
eflum við atvinnulíf í Mosfellsbæ og
eflum íbúaþróun og tekjugrundvöll
okkar,“ segir Haraldur.
Tvö ólík atvinnusvæði
Lóðirnar eru við Sunnukrika og
Desjamýri. Bæði atvinnusvæðin eru
tilbúin til uppbyggingar.
Sunnukriki er nýtt svæði fyrir at-
vinnustarfsemi, það er við Vestur-
landsveg og er í hjarta Mosfellsbæj-
ar. Þar eru fjórar stórar lóðir sem
boðnar eru undir verslun, þjónustu
eða hreinlegan iðnað sem myndi
sóma sér vel í nágrenni miðbæjar-
ins.
Desjamýri er athafnasvæði í út-
jaðri bæjarins, næst Reykjavík. Þar
er gert ráð fyrir fjölbreyttari iðn-
aðar- og atvinnustarfsemi. Boðið er
upp á minni lóðir og meiri sveigj-
anleika.
Byggt fyrir unga og aldna í miðbæ
Miklar fram-
kvæmdir á vegum
ríkis og bæjar
í Mosfellsbæ
Morgunblaðið/RAX
Framtíð Byggingarkrana ber við himin í miðbæ Mosfellsbæjar. Allt er á fullu við byggingu húss framhaldsskólans.
Framkvæmdir
» Unnið er að byggingu hjúkr-
unarheimilis, framhaldsskóla,
þjónustumiðstöðvar og nýs
íþróttahúss í Mosfellsbæ.
» Mannvirkin eru samtals ríf-
lega 8 þúsund fermetrar og er
áætlaður kostnaður við þau
um 2,5 milljarðar króna.
» Mosfellsbær hefur lækkað
mikið lóðaverð á tveimur at-
vinnusvæðum og býður
greiðslukjör.