Morgunblaðið - Sunnudagur - 24.02.2013, Blaðsíða 20

Harpa Lind Ingadóttir þjálfari leiðbeinir einbeittum nemanda sem hangir í silkiborða.
Morgunblaðið/Kristinn
*Heilsa og hreyfingFjögurra manna fjölskylda á hráfæði finnur mikinn mun á líðan eftir að hafa skipt um mataræði »22
M
aría Lea Ævarsdóttir segist hafa byrjað að æfa loftfimleika fyrir
hálfgerða tilviljun. „Ég sá Eyrúnu Ævarsdóttur sirkuskonu sýna
listir sínar á fimleikasýningu hjá Ármanni. Mér fannst þetta svo
ótrúlega spennandi að ég ákvað að spyrja hana hvar maður
gæti lært þessar kúnstir. Hún sagði mér þá frá loftfimleikanámskeiðunum
hjá Sirkusi Íslands og þar með varð ekki aftur snúið. Ég skráði mig á
námskeið nokkrum mánuðum síðar.“ María Lea segist hafa verið kvíðin
þegar hún mætti á fyrstu æfinguna um miðjan síðastliðinn mánuð. „Ég
hafði ekki prófað neitt þessu líkt áður. Ég var í ballett og fimleikum þegar
ég var stelpa en hætti þegar komið var fram á unglingsár. Mér fannst ég
því vera að stökkva langt út í djúpu laugina þegar ég mætti þarna fyrst.“
María segist afar ánægð með kennarana á námskeiðinu. Þeir einblíni á að
kenna rétta tækni og góða líkamsbeitingu sem skipti miklu máli þegar ver-
ið sé að sveifla sér í rólu, marga metra yfir gólfinu.
Elskar að vera í háloftunum
Hrollur fer um blaðamann þegar hann lítur á róluna í loftinu. Það er varla
fyrir lofthrædda að sveifla sér þarna uppi? Ekki stendur á svari hjá Mar-
íu: „Ég finn aldrei fyrir lofthræðslu, enda elska ég að vera í háloftunum,“
segir María, en hún er með einkaflugmannspróf. Á gólfinu eru stórar,
þykkar dýnur en María segir að enginn hafi dottið niður. „Alla vega ekki
ennþá,“ segir hún og hlær. „Maður lærir líka að treysta líkamanum. Það
var svolítið erfitt fyrst. En sjálfstraustið eykst eftir því sem styrkurinn
eykst.“ María Lea segist finna mikinn mun á líkamlegum styrk sínum og
þá sé líkamsbeitingin orðin betri. Hún segir æfingarnar taka heilmikið á.
„Maður fær alveg marbletti og sár en það er vel þess virði. Þetta er svo
ótrúlega skemmtilegt.“ María Lea mælir eindregið með loftfimleikum fyrir
þá sem vilja koma sér í gott form. „Og fyrst ég gat þetta, þá geta þetta
allir.“
Loftfimleikar þurfa ekki að vera neitt hættuspil ef fólk kann til verka. Kaðlar, rólur og eins konar borðar eru notaðir til að sveifla sér í og leika kúnstir í loftinu.
Morgunblaðið/Kristinn
BYRJAÐI AÐ ÆFA LOFTFIMLEIKA FYRIR HÁLFGERÐA TILVILJUN
Háloftin heilla
MARÍA LEA ÆVARSDÓTTIR VIÐURKENNIR AÐ HAFA VERIÐ
SVOLÍTIÐ SMEYK ÞEGAR HÚN MÆTTI Í FYRSTA TÍMA Á
NÁMSKEIÐI Í LOFTFIMLEIKUM HJÁ SIRKUSI ÍSLANDS.
Guðrún Óla Jónsdóttir goj9@hi.is
„Hver sem er getur komið á námskeið í loftfimleikum,“ segir Harpa Lind Ingadóttir, loftfim-
leikaþjálfari hjá Sirkus Íslands. „Getan er yfirleitt meiri en maður heldur og formið er fljótt að
koma.“ Harpa Lind segir loftfimleika henta fólki á öllum aldri og það sé um að gera að koma í prufu-
tíma. Yfir skólaárið séu alltaf regluleg námskeið og æfingar haldnar tvisvar í viku í fimleikasal Ár-
manns í Laugardal. „Við byrjum rólega og neðarlega í silkinu. Síðan færum við okkur smám saman
ofar eftir því sem öryggið eykst,“ segir Harpa Lind. Með silkinu á hún við silkiborða sem hanga neð-
an úr loftinu. Auk þess eru æfingar í rólu, svokallaðri trapísu. Harpa Lind hefur æft loftfimleika í tvö
ár og kann vel við að vera hátt uppi. „Ég hef alltaf verið mikill klifurköttur og klifraði upp um allt
þegar ég var krakki.“ Áhugasamir geta kynnt sér málið á www.sirkusislands.is/namskeid.
LOFTFIMLEIKAR ERU FYRIR ALLA
Alltaf verið klifurköttur