Frjáls verslun - 01.01.2010, Page 80

80 F R J Á L S V E R S L U N • 1 . T B L . 2 0 1 0
þórarinn í laxnesi:
Fólkið hríðskalf
og enginn sagði orð
Þórarinn Jónasson rekur Hestaleiguna Laxnesi. Þangað
koma um 10–15.000 manns árlega og á meðal þeirra eru
ráðstefnugestir. Rúmlega 100 hestar eru í boði – bæði fyrir
vana og óvana.
„Útlendingar eru mjög ánægðir með þetta,“ segir
Þórarinn og bendir á að hestaferð sé frábrugðin ýmsu því
sem ráðstefnugestir sækja. Guðsgræn náttúran er þar
í aðalhlutverki og er venjulega riðið að Tröllafossi. Eftir
reiðtúrana er ráðstefnugestum venjulega boðið í hlöðuna á
staðnum þar sem grillaður matur er á boðstólum. Þá skoða
margir hús skáldsins að Gljúfrasteini sem er hinum megin við
götuna.
„Fyrir þremur árum komu átta erlendir ráðstefnugestir rétt
fyrir jól. Það var rok og rigning en þeir komu þó. Við komumst í
var þegar ferðin var hálfnuð og fórum svo beint út á þjóðveginn
og inn í hús.“ Fólkið hríðskalf og enginn sagði orð. „Ég hugsaði
með mér að maður sæi þetta fólk ekki aftur. Nokkrum dögum
síðar fékk ég sendar tvær koníaksflöskur og konfektkassa
með þeim skilaboðum frá fólkinu að þetta hefði verið mesta
ævintýri lífs þess.“
Veðrið hefur því ekki áhrif á ævintýraþyrsta knapa sem
meðal annars njóta þess að horfa á norðurljós í skammdeginu.
„Þegar stórir, erlendir hópar koma þjóna ég oft eiginkonum
og -mönnum ráðstefnugesta. Þetta er stór liður og oft er um
50 manns að ræða.“
Margir tala um lund íslenska hestsins, sem og hvað stærð
hans sé góð. Fólk er ánægt með að komast út í náttúruna og
nefnir líka fámennið. „Fólki finnst það jafnvel vera eins og Palli
sem var einn í heiminum.“
Þórarinn Jónasson. „Ég hugsaði með mér að maður sæi þetta fólk
ekki aftur. Nokkrum dögum síðar fékk ég sendar tvær koníaksflöskur
og konfektkassa með þeim skilaboðum frá fólkinu að þetta hefði verið
mesta ævintýri lífs þess.“
Myndir frá fyrri tíð af Þórarni í Laxnesi.