Frjáls verslun - 01.01.2010, Qupperneq 89

F R J Á L S V E R S L U N • 1 . T B L . 2 0 1 0 89
Fundir og ráðsteFnur
Félagarnir Jóhannes Ásbjörnsson og Sigmar
Vilhjálmsson hafa í átta ár tekið að sér hlutverk
veislustjóra á ýmsum samkomum. „Við höfum
tekið að okkur færri og stærri skemmtanir,“
segir Jóhannes en segja má að þeir sérsníði
hverja og eina. „Við fundum til að mynda með
árshátíðarnefndum og skrifum handrit að hverri
árshátíð miðað við fyrirtækjamenningu hvers
fyrirtækis. Við leggjum töluvert mikla vinnu í
að hanna árshátíðir með fólkinu. Við notum til
dæmis upptekið efni, powerpoint og glærur til
að hafa þetta lifandi.“
Þegar Jóhannes er spurður hvað góður
veislustjóri þurfi að hafa segir hann:
„Hæfileikann, viljann og getuna til að ná
tengingu við fólkið í salnum. Hann þarf að bera
skynbragð á lengd atburða og passa upp á að
„drepa“ ekki fólk með dagskránni með því að
hafa andrými á milli atriða.“
Sigmar bendir líka á að þeir þurfi að skynja
starfsandann í fyrirtækinu og hafa meðal annars
í huga meðalaldur starfsmanna. „Segja má að
tóntegundin sé mismunandi eftir hópnum sem
um ræðir. Húmorinn er líka annar. Við þurfum að
meta það í hverju tilfelli.“
Sigmar segir að galdurinn sé að vera við öllu
búinn; að geta breytt fyrirfram ákveðinni dagskrá
í miðri veislu. „Það þarf að lesa salinn og meta
hvort það virki sem við gerum. Ef ekki þá þarf
að skipta um gír. Þetta eru heilmikil fræði.“
Jóhannes segir að sökum anna við að
undirbúa og opna Hamborgarafabrikkuna á
Höfðatorgi hafi þeir drengirnir tekið sér ársfrí frá
árshátíðum og skemmtunum en komi svo
sterkir inn árið 2011.
Jóhannes Ásbjörnsson og Sigmar
Vilhjálmsson. „Það þarf að lesa salinn
og meta hvort það virki sem við gerum,“
segir Sigmar. „Ef ekki, þá þarf að skipta
um gír. Þetta eru heilmikil fræði.“
vEislustjórar:
Tenging við fólkið í salnum