Læknablaðið - 01.02.2014, Blaðsíða 41

LÆKNAblaðið 2014/100 105
vísindarannsóknum. Við reiknum með að
þær stöður verði sérstaklega eftirsóknar-
verðar. Læknar í sérnámi í heimilislækn-
ingum verja tveimur árum af námi sínu
á sjúkrahúsi og lyflækningadeild býður
þeim allt að eins árs nám. Enn fremur
verður boðið upp á nám fyrir lækna í
námi í öðrum sérgreinum í þrjá mánuði
eða lengur, svo og símenntun fyrir lækna,
svo sem heimilislækna. Stefnt er að því að
námslæknar í lyflækningum verði allt að
25 á hverjum tíma,“ segir Friðbjörn. Davíð
segir að flestir sem klára námið eða hluta
þess fari utan til frekara náms erlendis, en
sú reynsla sem þeir öðlast hér heima sé
þeim mjög mikilvæg til að komast áfram í
nám á bestu stöðum.
Tekur tíma að leysa vanda sviðsins
Eins og fram hefur komið hér að framan
hefur talsverð vinna farið í að breyta um
áherslur í framhaldsmenntun. Enn eru
þó mörg verkefni sem bíða úrlausnar á
lyflækningasviðinu. Flest þeirra eru þó
þess eðlis að það mun taka tíma að vinna
úr vandanum.
„Það er alvarleg kreppa í þremur af
undirsérgreinum lyflækningasviðsins,
lyflækningum krabbameina, geislalækn-
ingum krabbameina og nýrnalækningum.
Við þurfum að styðja við þessar greinar af
fremsta megni. Meðal annars þarf að end-
urskoða þau verkefni sem þær fást við og
í vissum tilfellum létta af þeim ákveðinni
byrði. Auka þarf stuðning við mikilvægt
göngudeildarstarf þessara sérgreina með
aðkomu annara fagstétta í ríkari mæli. „Þá
þurfum við að efla nýliðun sérfræðilækna,
ekki síst í almennum lyflækningum. Það
þarf sömuleiðis að styrkja mönnun hjúkr-
unarfræðinga á lyflækningasviðinu,“ segir
Davíð, „en undirmönnum í þeirri grein
hefur valdið miklu álagi á legudeildum
sviðsins.“
„Hluti af vanda lyflækninga stafar af
því að einingar sviðsins eru á fjölmörgum
stöðum á Stór-Reykjavíkursvæðinu og þar
að auki eru margar hverjar í óhentugu
húsnæði. Nýr spítali var ein af lykilfor-
sendum sameiningar Sjúkrahúss Reykja-
víkur og Landspítalans, en nú 14 árum
síðar bólar ekkert á nýjum spítala. Þar sem
ekki einu sinni hillir undir nýja byggingu
þarf að hugsa um aðra möguleika til að
flytja bráðastarfsemi lyflækningasviðs í
eitt hús. Það myndi auðvelda ýmsa þætti
í starfsemi okkar og spara verulegar fjár-
hæðir, meðal annars við að manna vakt-
þjónustu utan dagvinnutíma,“ segir Davíð.
Hann er sáttur með það viðbótarfjármagn
sem Landspítali fékk í fjárlögum 2014. „Þó
uppsöfnuð þörf sé talsvert meiri en það
fjármagn sem fékkst, gefur þetta okkur
klárlega möguleika á að hefja viðspyrnu
eftir margra ára sársaukafullan niður-
skurð,“ segir hann. „Eigum við ekki að
vona að botninum sé náð og að endurreisn
lyflækninga sé hafin. Til þess þurfum við
þó áfram markvissan stuðning stjórnvalda
á næstu árum. Það er hins vegar engin
spurning að tónninn á Landspítala er
aðeins betri í upphafi nýs árs en á haust-
mánuðum og við verðum að reyna að efla
þann meðbyr enn frekar,“ segir Davíð O.
Arnar framkvæmdastjóri lyflækningasviðs
Landspítalans að lokum.
Skipulag framhaldsnámsins.
Öldungar á nýju ári
Næsti fundur öldungadeildarinnar verður haldinn miðvikudaginn 5. febrúar kl. 16.00. Á undan fundi
verða kaffiveitingar frá kl. 15.30. Þá mun dr. Árni Björnsson þjóðháttarfræðingur flytja erindi sem hann
nefnir: Saga þorrablótanna.
Miðvikudaginn 5. mars flytur dr. Þorbjörn Broddason fjölmiðlafræðingur erindi sitt: Framtíð dagblaða
og annarra þjóðbundinna einstefnufjölmiðla á tímum sjálfhverfra örmiðla og þjóðlausra ofurmiðla.
Á fundinum 2. apríl fræðir Magnús Jónsson sagnfræðingur okkur um ýmislegt í sambandi við ferðina
væntanlegu þar sem hann verður fararstjóri..
Utanlandsferðin
utanlandsferðinni í ár er heitið til Írlands eins og fram hefur komið í fjölda netpósta til félaga í
öldungadeildinni. Flogið verður til Manchester 14. maí og til baka frá London 22. maí. Verðið er kr.
300.000. Allt er innifalið nema hádegisverður. Skráning er á Ferðaskrifstofunni Vita á Suðurlandsbraut
2 í húsi Hótels Nordica. Síminn þar er 570 4444. Veljið 2 þegar lesið er upp á símsvaranum hvaða
möguleikar eru í boði.
Ferðalýsingin frá Magnúsi Jónssyni fararstjóra okkar hefur verið send í netpósti til allra öldunga sem
hafa gefið upp netfang sitt. Þeir sem hafa ekki séð ferðalýsinguna geta farið á innri vef www.lis.is og
prentað hana út.
Við höfum fengið nokkra netpósta endursenda, einkum varðandi lækna sem eru nýhættir störfum og
hafa ekki tilkynnt um ný netföng. Vinsamlega sendið leiðréttingar á netföngum og ný netföng til mbe@
talnet.is. Hið sama gildir um farsímanúmer.
V I ð T A L