Frjáls verslun - 01.08.2006, Side 160

160 F R J Á L S V E R S L U N • 8 . T B L . 2 0 0 6
STÆRSTUT T300
Fækkun er fjölgun!
- Áttu von á að skráðum félögum í Kauphöll Íslands fjölgi á næsta
ári?
„Nú þegar er ljóst að Icelandair stefnir inn á markaðinn fyrir áramót
og OMX verður skráð mjög fljótlega. Símafyrirtækið Vodafone fer
bráðlega á markað í sjálfstæðu félagi, það er Teymi hf., en gamla
Dagsbrún, undir nýju nafni, 365 hf., verður með fjölmiðlarekst-
urinn. Þá eigum við von á skráningu tveggja færeyskra fyrirtækja á
næsta ári, þar á meðal Atlantic Airways, sem
er aðalflugfélagið þar í landi. Fleiri fyrirtæki
hafa boðað komu sína, þar á meðal Síminn
á næsta ári. Almennt reiknum við því með
fjölgun fyrirtækja á markaði næstu misseri,
þó við lítum á fækkun síðustu ára í rauninni
sem vöxt. Þannig hafa fyrirtækin verið í mik-
illi sókn, svo sem Actavis, Marel, Bakkavör
og bankarnir að viðbættum þeim fyrirtækjum
sem hafa verið að koma ný inn og hafa verið
í landvinningum, svo sem Avion Group og
Exista. Í dag er markaðsvirði skráðra fyrirtækja orðið yfir 200% af
landsframleiðslu. Fyrir fimm árum var verðmætið aðeins 55% sem
sýnir best hvað fyrirtækin hafa stækkað og eflst mikið á fáum árum.
Verðmæti skráðra fyrirtækja hefur nær fjórfaldast, að tiltölu við lands-
framleiðslu.“
Við fljúgum hátt
- Býstu við að útrás íslenskra stórfyrirtækja haldi áfram á næstu
tveimur árum?
„Það eru að minnsta kosti allmörg verkefni í farvatninu. Baugur
stefnir að kaupum á House of Fraser í gegnum félagið Highland
Acqusitions Limited og Actavis er í útrás þó kaup þeirra á króatíska
fyrirtækinu Pliva hafi ekki gengið eftir. Þátttaka hér á landi í erlendu
atvinnulífi er meiri en á nokkru hinna Norðurlandanna. Miðað við
horfurnar nú eru líkur á að eign Íslendinga í erlendum fyrirtækjum
fari yfir 100% af landsframleiðslu innan fárra ára sem er gjörbreyting
og vitnar um alþjóðavæðingu íslensks atvinnulífs.“
- Er íslenskt hagkerfi að ná mjúkri lendingu eftir mikinn hagvöxt
undangenginna ára?
„Æ fleiri erlendir aðilar eru að kynna sér hvernig okkar hagkerfi
virkar og hvað gildir hér fyrir framvindu efnahagsmála. Á þessum
tímapunkti er of snemmt að segja til um hvort lendingin verður
mjúk eða ekki, við fljúgum hátt - og af og til er órói í lofti. Það eru
forsendur fyrir því að lendingin verði mjúk þó slíkt ráðist mjög af
hagstjórn og hvernig fyrirtækjunum vegnar. Í grundvallaratriðum er
hagsveifla síðustu missera lík þeirri sem var um aldamótin. Þá var
hér mikill hagvöxtur sem síðan fylgdi verðbólguskot og samdráttur í
þjóðarbúskapnum um skeið. Þegar litið er á hagtölur frá þessu skeiði
tala útlendingar efalítið um harða lendingu, þó skynjun Íslendinga
hafi verið önnur. Staðreyndin er sú að vegna smæðar hagkerfisins
þurfum við að búa við meiri sveiflur en flestar aðrar þjóðir og getum
komist út úr þensluskeiðum án brotlendingar. Það er okkar verkefni
að takast á við og ég nefni sem dæmi að í vor og sumar höfðu menn
áhyggjur af því að erlendir fjárfestar hefðu ekki áhuga á að endurnýja
Jöklabréfin og að bankarnir gætu ekki fjármagnað sig fyrir komandi
ár. Nú hefur komið á daginn að margur var alltof svartsýnn um þessi
atriði.“
Nýtum tækifærin!
Hvernig telur þú að verð á hlutabréfum í Kauphöllinni þróist næstu
tólf mánuðina?
„Við hér í Kauphöllinni spáum ekki um
hlutabréfaverð, enda ekki hlutverk okkar.
Við höfum hins vegar bent fólki á að fara
yfir talnaefni sem fyrir liggur og mynda sér
sjálfstæða skoðun á grundvelli þess. Grein-
ingardeildir segja til dæmis að íslenski mark-
aðurinn sé á engan hátt verðlagður hærra en
helstu erlendir markaðir. Hins vegar ræðst
framhaldið mikið af því hvernig fyrirtækin
standa sig og hvernig þeim vegnar erlendis,
enda koma milli 70 og 80% tekna fyrirtækja
í Kauphöllinni utanlands frá. Íslensk fyrirtæki á hlutabréfamarkaði
eru fyrir vikið háðari því sem gerist erlendis en hér innanlands. Um
næstu mánuði er það að segja að við höfum sterk spil á hendi, en
niðurstaðan ræðst að miklu leyti hvernig þau tækifæri, sem bjóðast
hverju sinni, verða nýtt.“
„Staðreyndin er sú að
vegna smæðar hagkerfisins
þurfum við að búa við meiri
sveiflur en flestar aðrar
þjóðir og getum komist
út úr þensluskeiðum án
brotlendingar.“
Edda Rós Karlsdóttir, forstöðumaður
greiningardeildar Landsbanka Íslands.