Bændablaðið - 25.09.2014, Síða 1

18. tölublað 2014 Fimmtudagur 25. september Blað nr. 427 20. árg. Upplag 32.000
„Við erum rétt aðeins að byrja að taka upp og uppskera lofar góðu. Mér sýnist að hún muni verða álíka mikil og í
fyrrahaust en þá fengum við mjög góða uppskeru,“ segir Friðjón Þórarinsson, bóndi á Flúðum á Fljótsdalshéraði,
en bærinn er skammt norðan Egilsstaða. – Sjá nánar bls. 22 Mynd / MÞÞ
Samkeppniseftirlitið sektar MS um 370 milljónir fyrir misnotkun á markaðsráðandi stöðu:
Krafa um endurskoðun á búvörulögum
– Mjólkursamsalan áfrýjar og formaður LK segir að fara verði að lögum en íhuga verði vandlega afleiðingarnar ef breyti eigi lögunum
Samkeppniseftirlitið hefur ákveðið
að sekta Mjólkursamsöluna um
370 milljónir króna vegna meintrar
misnotkunar á markaðsráðandi
stöðu og að hafa beitt smærri
keppinauta mismunun. Mjólkur-
samsalan ætlar að áfrýja
úrskurðinum en málið virðist ætla
að draga dilk á eftir sér.
Framkvæmdastjóri Mjólkurbúsins
Kú telur að tjón fyrirtækisins vegna
viðskiptahátta MS nemi um 200
milljónum króna. Hörð krafa hefur
komið fram í kjölfarið að MS verði
gert að fara að samkeppnislögum
og að lög númer 99 frá 1993 um
framleiðslu, verðlagningu og sölu á
búvörum verði endurskoðuð.
Samkeppniseftirlitið telur að
með því að selja samkeppnisaðilum
hrámjólk á 17% hærra verði
en til fyrirtækja tengdum
MS hafi fyrirtækið valdið
samkeppnisaðilunum talsverðum
skaða. Brotið er talið alvarlegt
þar sem það tengist mikilvægum
neysluvörum og hefur varað í langan
tíma, eða að minnsta kosti frá árinu
2008 og til ársloka 2013.
Sigurður Ingi Jóhannsson
landbúnaðarráðherra segir of snemmt
fyrir hann að segja nokkuð um málið.
„Við erum með ákveðinn
lagagrunn í landinu og hann gildir
en mér sýnist við fyrstu sýn að
Samkeppniseftirlitið sé að láta
reyna á búvörulögin. Ég vil því
ekki tjá mig um málið fyrr en ég
er búinn að fá greiningu á úrskurði
Samkeppniseftirlitsins.“
Sigurður Loftsson, formaður
Landssambands kúabænda (LK),
segir að að sjálfsögðu eigi MS að
fara að lögum.
„Það hlýtur að vera okkar krafa að
þessir aðilar sem starfa á markaðnum
innan ramma búvörulaganna fari eftir
þeim lögum og reglum sem þeim
eru ætluð. Mér virðist þó að í áliti
Samkeppniseftirlitsins sé komið fram
lögfræðilegt álitamál um hvað þeir
mega og mega ekki.“ Hann segir
að í gangi sé vinna við að skoða
reynsluna af þessu fyrirkomulagi
hjá Hagfræðistofnun. – Sjá bls. 4
588 þúsund fjár verður
slátrað á þessu hausti
– Svipaður fjöldi og í fyrra en féð er heldur vænna
Fé kemur nokkuð vænt af fjalli
þetta haustið og fallþungi í
flestum tilfellum meiri en í fyrra.
Þannig er hann 0,1 kg meiri nú en
á sama tíma í fyrra hjá Sláturfélagi
Suðurlands, en heilu kílói meiri hjá
Fjallalambi – svo dæmi séu tekin.
Skrokkafjöldi er svipaður á milli
ára og sömuleiðis magnið sem fer í
heimtöku, þótt á heildina litið fari
það magn vaxandi sem bændur taka
heim.
Kaupfélag Skagfirðinga (KS) og
Norðlenska munu hvort um sig slátra
nálægt 115 þúsund fjár þetta haustið.
Reynir Eiríksson, framleiðslu-
stjóri hjá Norðlenska, segir að á
síðasta ári hafi fjöldinn verið 114.600
og honum sýnist það verði aðeins
fleira nú en í fyrra.
Steinþór Skúlason, forstjóri SS,
telur að sláturfjöldinn verði um 105
þúsund á þessari vertíð – sem er
svipað magn og í fyrra.
Gunnar Tryggvi Halldórsson,
framkvæmdastjóri SAH, segir að
sambærilegum fjölda verði nú slátrað
og á undanförnum árum, eða um 100
þúsund fjár.
Magnús Freyr Jónsson,
forstöðumaður Sláturhúss KVH á
Hvammstanga, telur svipuðum fjölda
verða slátrað nú og á síðasta hausti,
eða um 91 þúsund.
Hjá Birni Víkingi Björnssyni,
framkvæmdastjóra Fjallalambs,
fengust þær upplýsingar að dilkar
væru þar mjög vænir og vel á sig
komnir. Slátrað verður um 30 þúsund
fjár hjá Fjallalambi, sem er örlítil
fækkun frá því í fyrra.
Skúli Þórðarson, sláturhússtjóri
hjá Sláturhúsi Vopnfirðinga, segir að
slátrað verði 32 þúsund fjár, en það
er um 1.500 fleira en í fyrra.
/smh

– Sjá samantekt á bls. 2
16
Þorir þú að
smakka?
24-25
Klappar vélunum
stundum á húddið
Gestum fjölgar jafnt og
þétt ár frá ári
18
Útflutningur á svínakjöti
að hefjast til Rússlands
– Leyfi væntanlegt í vikunni
Allt bendir til að útflutningur á
svínakjöti til Rússlands hefjist
fljótlega. Í fyrstu verða flutt út
milli 100 og 200 tonn, sambærilegt
verð fæst fyrir kjötið í Rússlandi
og hér.
Geir Gunnar Geirsson, fram-
kvæmda stjóri Stjörnugríss, segir
að það ráðist í vikunni hvort leyfi
fáist til að flytja íslenskt svínakjöt
til Rússlands. „Við erum búnir að
vinna lengi í þessu og ég á ekki von
á öðru en að leyfið fáist. Magnið sem
um ræðir er milli 100 og 200 tonn að
lágmarki og verðið er ásættanlegt og
litlu lægra en fæst fyrir kjötið hér.“
Að sögn Geirs hefur innflutningur
á svínakjöti gert framleiðendum hér
erfitt um vik að losna við ákveðna
vöruflokka og hluta svínakjötsins
og því gott að fá aðgang að öðrum
mörkuðum með þá. „Rússarnir kaupa
skepnuna eins og hún leggur sig og
taka því allt nema hrínið. Fáist leyfið
munu við hefja útflutning við fyrsta
tækifæri enda talsvert magn tilbúið
í frystigeymslum.“ /VH