Tímarit hjúkrunarfræðinga - 01.06.2011, Blaðsíða 29

Tímarit hjúkrunarfræ›inga – 3. tbl. 87. árg. 2011 25
Ragnheiður Alfreðsdóttir, ragnalf@krabb.is
ÖRRÁÐSTEFNA UM AÐ GREINAST
AFTUR MEÐ KRABBAMEIN
Krabbameinsfélagið stóð fyrir stuttri ráðstefnu 18. apríl sl. og fjallaði hún um að
lifa með krabbameini. Tilgangur ráðstefnunnar var í fyrsta lagi að segja frá þeim
góðu fréttum að nú væri krabbamein langtímasjúkdómur en ekki dauðadómur
eins og talað var um fyrir ekki svo mörgum áratugum síðan. Laufey Tryggvadóttir,
framkvæmdastjóri Krabbameinsskrárinnar, sagði meðal annars í erindi sínu að
hlutfall sjúklinga, sem lifðu í fimm ár eða lengur eftir greiningu krabbameins,
hefði gjörbreyst frá því um 1954 og þannig hækkað úr um 30 í um 60 prósent.
Í öðru lagi var tilgangurinn að gefa von og bjartsýni en Gunnhildur
Óskarsdóttir sagði frá því hvernig hún hefði haldið áfram að gera
ráð fyrir lífinu þegar krabbameinið tók sig upp aftur. Síðan hefur
Gunnhildur meðal annars lokið doktorsnámi og stofnað hópinn
Göngum saman.
Í þriðja lagi var tilgangurinn að sýna að hægt er að horfa með glettni á
jafn viðkvæmt efni og að greinast með krabbamein. Það gerðu Katla
María Þorgeirsdóttir og Valgeir Skagfjörð þegar þau fóru með þátt
úr einleiknum Ótuktinni sem byggist á bók Önnu Pálínu Árnadóttur
söngkonu sem greindist með krabbamein en er nú látin. Verkið var
frumsýnt í Iðnó í apríl sl.
Síðast en ekki síst var tilgangurinn að koma af stað umræðu um
óttann við það að greinast aftur með krabbamein og þau áhrif
sem það hefur á líf einstaklingsins og þeirra sem standa honum
næst. Mary Schnack, sem hefur greinst sjö sinnum með sama
krabbameinið, sagði frá því hvernig hægt er að njóta lífsins en
ekki bara að þrauka. Mary Schnack hefur áratugalanga reynslu af
rekstri og er margverðlaunaður rithöfundur, fréttamaður og ráðgjafi
í almannatengslum. Hún benti meðal annars á kosti þess að sjá
hlutina frá mismunandi sjónarhornum. Oft er horft til fyrstu fimm
áranna frá greiningu en sjálf hefði hún ekki náð fimm árum milli þess
sem sjúkdómurinn tók sig upp aftur. Henni var bent á að það væri
14 ár síðan hún greindist fyrst með krabbamein svo að hún hefði svo
sannarlega lifað í meira en fimm ár. Hún nefndi hve mikilvægt er að
næra sig andlega og hitta aðra sem hefðu gengið í gegnum svipaða
reynslu og lagði þar áherslu á hina ýmsu stuðningshópa. Hún ræddi
um hve hvetjandi það er að gefa og styðja aðra og styður sjálf konur
í þróunarlöndum. Mary Schnack hvatti alla til að halda upp á sigrana
stóra sem smáa og að muna að krabbameinið hefur sín takmörk og
getur ekki stjórnað viðhorfum okkar og hugsunum.
Mikil ánægja var með ráðstefnuna og töluðu þátttakendur um að þeir
væru fullir vonar, bjartsýni og gleði eftir að hafa hlustað á fyrirlesarana.
Mary Schnack.