Orð og tunga - 01.06.2006, Síða 23

Birna Arnbjörnsdóttir: Orðabækur, málfræðigrunnar og netkennsla 21
Að sjálfsögðu ber að fagna því að hægt er að nálgast upplýsingar um
nánast hvað sem er á vefnum en hins vegar vakna spumingar um
gæði slíkra gagnabanka bæði varðandi innihald og svo viðhald. Verk-
efni á borð við NORDIT (2002) o. fl. sýndu fram á að til er ógrynni
vefsíðna sem einhverjir velviljaðir hafa sett upp en síðan ekki haldið
við og uppfært sjaldan. Glæsileg forrit tryggja ekki gæði innihaldsins.
Þegar kemur að notkun orðabóka og gagnabanka til tungumála-
náms er ljóst að upplýsingaleitin krefst einhverrar tungumálakunn-
áttu og ekki síður kunnáttu í að leita, meta og velja upplýsingar á net-
inu — þ. e. tölvulæsi. Oft er talað um að ungir nemendur séu ákaf-
lega færir í að nota tölvur til ýmissa hluta en það þýðir ekki að þeir
séu færir um að meta réttmæti og nýta sér þær upplýsingar sem þeir
hafa við höndina í tölvunum og á netinu sér til gagns (Sólveig Jakobs-
dóttir 2005). Þá má draga í efa hvort það að þjálfa málfærni sé sama
ferli og það að byggja upp þekkingu t.d. í sögu eða landafræði eins og
sambandshyggjumenn halda fram. Ef svo væri, væri ekki til sá grein-
armunur sem allir eru sammála um að sé á því að kenna t.d. sögu
eða landafræði á netinu og svo aftur að þjálfa nemendur í erlendum
tungumálum þar sem þeir þurfa að afla sér þekkingar á því máli sem
þeir eru að læra.
Það þarf líka að auka rannsóknir á hegðun þeirra sem nota netið
til að læra tungumál og þá sérstaklega hvernig nemendur nota hjálp-
armiðla en rannsóknir á því hvort og þá hvemig nemendur nota orða-
bækur og málfræðigrunna eru afar fáar. Þær rannsóknir sem til em
miðast við háskólanema að læra þýsku eða finnsku og benda til þess
að nemendur þurfi sérstaka hvatningu til að sækja sér upplýsingar,
annars eru þeir ólíklegir til þess. Eftirgjöf og skýringar nýtast best ef
þær fjalla um eitt atriði í einu og skýringar mega helst ekki vera nema
3 línur að lengd (Heift 2004, 2005; Chapelle 2003:4 kafli).
Þá hefur komið fram að notendur verða sífellt tregari til að greiða
fyrir bjargir á netinu. Til dæmis hefur sala á tungumálanámskeiðum
á CD tölvudiskum dregist saman um helming í Bretlandi undanfar-
in tvö ár (Davies 2005). Áður en ráðist er í viðamikla þróunarvinnu
á gagnagrunnum á netinu til tungmálakennslu þurfum við því að
þekkja betur hegðunarmynstur þeirra nemenda sem líklegir eru til að
nýta sér síaukið upplýsingaflæði á vefnum. Gagnagrunnar verða að
vera aðgengilegir sem flestum og í tungumálanámi einnig þeim sem
ekki hafa mikla færni í tungumálinu.