Morgunblaðið - 27.07.2016, Qupperneq 40

40 FRÉTTIRErlent
MORGUNBLAÐIÐ MIÐVIKUDAGUR 27. JÚLÍ 2016
„Við erum staðráðin í að gera
Norður-Kóreu það fullkomlega
ljóst að þessum aðgerðum fylgja
raunverulegar afleiðingar,“ sagði
John Kerry, utanríkisráðherra
Bandaríkjanna, á fundi Asíuþjóða
sem haldinn er í Laos.
Vísar Kerry í máli sínu til síend-
urtekinna tilraunaskota Norður-
Kóreumanna og prófana þeirra
með kjarnavopn. Bandaríkin segja
tilraunirnar ögrun og hefur örygg-
isráð Sameinuðu þjóðanna fordæmt
þær. Á sama tíma hóta ráðamenn í
Pjongjang „fyrirbyggjandi“ árás-
um á Suður-Kóreu og Bandaríkin.
NORÐUR-KÓREA
AFP
Bandaríkin John Kerry utanríkis-
ráðherra á blaðamannafundi nýverið.
Tilraunir Pjongjang
ekki án afleiðinga
Recep Tayyip
Erdogan Tyrk-
landsforseti mun
í næsta mánuði
eiga fund með
forseta Rúss-
lands, Vladimír
Pútín, en það
verður í fyrsta
skipti sem forset-
arnir hittast síð-
an Rússar slitu
hernaðarsambandi við Tyrkland
eftir að tyrknesk herþota grandaði
rússneskri herþotu í nóvember sl.
Talsmaður Kreml vildi ekki veita
AFP nákvæmar upplýsingar um
efni fundarins, en sagði forsetana
þó hafa „ýmislegt að ræða“.
„Það verður enginn skortur á
umræðuefni,“ sagði hann.
TYRKLAND
Erdogan sækir Pútín
heim á næstunni
Recep Tayyip
Erdogan
„Hinir fötluðu ættu allir að hverfa,“
sagði ódæðismaðurinn Satoshi Ue-
matsu þegar hann gekk blóðugur
inn á lögreglustöð með eggvopn í
hendi. Hafði hann þá skömmu áður
myrt 19 manns á heimili fyrir fólk
með fötlun í japönsku borginni
Sagamihara, en um er að ræða
versta fjöldamorð í landinu í áratugi.
Fréttaveita AFP greinir frá því
að Uematsu hafi þar til í febrúar sl.
unnið á heimilinu. Hann er sagður
hafa brotið sér leið þar inn í gegnum
glugga á jarðhæð hússins og yfir-
bugað starfsmann í kjölfarið. Starfs-
manninn batt Uematsu niður áður
en hann réðst á heimilismenn.
Margir fengu djúpa stunguáverka á
háls og búk. Alls létust níu karl-
menn og tíu konur, en fórnarlömbin
eru á aldrinum 18 til 70 ára. Þá
særðust einnig um 25 til viðbótar,
þeirra á meðal eru 20 lífshættulega
særðir.
Sendi hótunarbréf í febrúar
„Þetta er afskaplega sorglegur og
sláandi atburður þar sem fjölmargir
saklausir einstaklingar urðu að
fórnarlömbum,“ sagði Yoshihide
Suga, talsmaður stjórnvalda í Jap-
an, á blaðamannafundi sem haldinn
var í kjölfar ódæðisins.
Japanskir fréttamiðlar greina frá
því að Uematsu hafi í febrúar sl.
sent forseta neðri deildar japanska
þingsins bréf þar sem hann hótaði
því að gera árás á tvö heimili fatl-
aðra og myrða þar mörg hundruð
manns.
Bréfið vakti athygli lögreglunnar í
Tókýó og var Uematsu lagður inn á
sjúkrahús um tíma. Læknir þar út-
skrifaði hann samt sem áður nokkr-
um dögum síðar þar sem hann taldi
enga ógn stafa af Uematsu.
khj@mbl.is
AFP
Óhugnaður Lögregla sést hér við
heimilið þar sem 19 voru myrtir.
Versta fjölda-
morð um árabil
 Myrti 19 manns á heimili fatlaðra
Kristján H. Johannessen
khj@mbl.is
„Við horfumst í augu við hóp, Daesh
[Ríki íslams], sem lýst hefur yfir
stríði gegn okkur,“ sagði Francois
Hollande Frakklandsforseti, en tveir
ódæðismenn, hliðhollir vígasamtök-
unum, tóku hóp fólks í gíslingu í
kirkju í Saint-Étienne-du-Rouvray,
nærri Rúðuborg í Frakklandi.
Fréttaveita AFP greinir frá því að
inni í kirkjunni hafi verið alls fimm
manns. Þrír þeirra sluppu án telj-
andi meiðsla, einn var fluttur alvar-
lega særður á sjúkrahús, en fimmti
gíslinn, sem var prestur kirkjunnar,
var myrtur af ódæðismönnunum. Að
sögn AFP var hinn látni, sem var 84
ára gamall, skorinn á háls inni í
kirkjunni.
Sérsveit frönsku lögreglunnar
umkringdi kirkjuna skömmu eftir að
upp komst um árásina og voru víga-
mennirnir tveir drepnir af lögreglu
er þeir gengu þaðan út.
Allt Frakkland er í sárum
Manuel Valls, forsætisráðherra
Frakklands, segist vera sleginn
óhug yfir því sem hann kallar „villi-
mannslega árás á kirkju“.
„Allt Frakkland og kaþólikkar all-
ir eru í sárum. Við munum standa
saman,“ sagði Valls í færslu sem
hann birti á Twitter-síðu sinni.
Frans páfi tekur í svipaðan streng
og segir morðið einkar „villimanns-
legt“ í ljósi þess hvar það var framið.
„Páfinn finnur fyrir sársauka og
óhugar í kjölfar þessa fjarstæðu-
kennda ofbeldis,“ hefur AFP eftir
talsmanni Vatikansins í Róm.
Miðillinn Amaq News, sem rekinn
er af Ríki íslams, sagði í gær sam-
tökin bera ábyrgð á árásinni. Eru
árásarmennirnir sagðir vera „stríðs-
menn Ríkis íslams“ og að þeir hafi
verið að bregðast við kalli um árásir
á þær þjóðir sem nú berjast við sam-
tökin í Sýrlandi og Írak.
Hollande forseti kallar nú eftir
samstöðu í Frakklandi, en segir um
leið hættu á frekari hryðjuverkum
þar vera „mjög mikla“.
Vígamenn Ríkis íslams gerðu
villimannslega árás á kirkju
 Vopnaðir menn myrtu einn og særðu annan lífshættulega í Frakklandi
AFP
Samstaða Francois Hollande Frakklandsforseti (t.h.) mætti til Saint-Étienne-du-Rouvray fljótlega eftir árásina.
Hersveitir Bashars al-Assad Sýrlandsforseta hafa
undanfarið hert mjög sókn sína inn í borgina
Aleppo, stærstu borg Sýrlands. Tókst þeim í gær
að ná öruggri fótfestu í úthverfi sem finna má í
norðvesturhluta borgarinnar, en hverfið hafði um
langt skeið tilheyrt vopnuðum uppreisnarsveitum.
Aleppo hefur frá árinu 2012 verið skipt upp í tvo
helminga þar sem uppreisnarmenn ráða ríkjum í
austurhluta borgarinnar og stjórnarhermenn í
vesturhlutanum. Að undanförnu hefur sveitum
Assads forseta vaxið ásmegin og þeim m.a. tekist
að umkringja borgina og skera á eina mikilvæg-
ustu birgðaleið uppreisnarmanna við og í Aleppo.
Stjórnarherinn með annað hverfi í sigtinu
Það úthverfi sem herinn hefur nú lagt undir sig
nefnist Leramun og var það lengi notað af upp-
reisnarsveitum til að skjóta sprengjum yfir á vest-
urhluta Aleppo. Hermenn Sýrlandsforseta hafa
nú beint spjótum sínum að hverfinu Bani Zeid,
þaðan sem uppreisnarmenn skjóta eldflaugum
sínum á landsvæði stjórnarhersins í borginni.
„Með því að ná stjórn á Leramun og Bani Zeid
er hægt að koma í veg fyrir eldflaugaskotin og
herða um leið á umsátrinu,“ hefur fréttaveita
AFP eftir Rami Abdel Rahman, sem fer fyrir
mannréttindasamtökum í Sýrlandi.
Hersveitir höfðu í gær umkringt Bani Zeid og
segir AFP miklar loftárásir hafa verið gerðar á
hverfið. khj@mbl.is
Komnir með góða fótfestu í Aleppo
 Stjórnarher Sýrlands hefur hert mjög tökin á uppreisnarsveitum undanfarið
lÍs en ku
ALPARNIR
s
Faxafeni 8, 108 Reykjavík • sími 534 2727 • netfang alparnir@alparnir.is • www.alparnir.is
af öllum fatnaði
20%
AFSLÁTTUR