Dagblaðið Vísir - DV - 01.12.2017, Blaðsíða 4
4 Helgarblað 1. desember 2017fréttir
Íbúar Kársness
óttast innbrotaöldu
„Fólk óþarflega
áhyggjufullt
n Vilja götumyndavélar n Ráðist á aldraðan mann n Hverfasíður auka ótta
Í
búar Kársneshverfis í Kópavogi
hafa verið uggandi undanfarna
daga vegna þess sem sumir vilja
meina að sé innbrotahrina eða
faraldur. Upptökin voru innbrot í
hús við Melgerði þar sem öldruð-
um íbúa voru veittir áverkar af
þremur þjófum. Síðan þá hafa
íbúar tekið eftir ýmislegu í hverf-
inu og vilja grípa til aðgerða. Varð-
stjóri svæðisins, Birgir Örn Guð-
jónsson, oft nefndur Biggi lögga,
biður þó fólk að sýna stillingu.
Mörg innbrot
Þann 22. nóvember var lögreglu
gert viðvart um innbrot á heim-
ili við Melgerði. Íbúi um sjötugt
kom að þremur innbrotsþjófum
sem réðust á hann og veittu hon-
um áverka. Þeir voru handteknir
nálægt heimilinu, blóðugir og
með þýfi á sér, og vistaðir í fanga-
geymslu grunaðir um húsbrot,
þjófnað og líkamsárás.
Síðan þá hafa fjölmargir íbúar
hverfisins sagt frá innbrotum og
lýst yfir áhyggjum af ástandinu í
hverfinu á spjallsíðu íbúa hverfis-
ins. Ein kona segir frá innbroti þar
sem blárri dúnúlpu með bíllykl-
um í var stolið. Önnur kona segir
að maður á þrítugsaldri hafi kom-
ið inn á heimili eftir að gleymdist
að læsa. Litlu hafi hins vegar verið
stolið og lögreglan fljót á svæðið.
Þá segir ein kona frá því að tveir
menn um fimmtugt, í annarlegu
ástandi, hafi ætt inn í íbúð henn-
ar og annar þeirra verið blóðugur.
Hún segir að þeir hafi virst mein-
lausir og beðið um að hringt yrði á
leigubíl. Þá hafa aðrir sagt frá inn-
brotum í bíla og bílskúra og einnig
að tekið hafi verið í hurðarhúna á
heimilum þeirra.
Bíllyklar í kökuboxi
Íbúarnir hafa deildar meiningar
um hver rót vandans sé. Sumir
vilja meina að um skipulagðar inn-
brotsferðir sé að ræða og þjófarnir
komi ekki frá Kársneshverfi. Vilja
þeir því setja upp myndbands-
upptökuvélar við mörk hverfisins
til að fæla þá frá. Það hafi gefist
vel á Seltjarnarnesi og innbrot-
um þar snarfækkað. Ekki eru allir
sammála og vilja sumir frekar efla
nágrannavörslu og fá aukið eftirlit
lögreglu í hverfið.
Aðrir vilja meina að rótina megi
finna hjá óreglufólki sem hefst við
í Hamraborg eða við Kópavogs-
höfn. Þá er mikil umræða um það
hvort Íslendingar eða útlendingar
standi að þessum innbrotum og
þjófnuðum. Einnig er rætt um
hvort innbrotin séu algengari
norðan eða sunnan megin á nes-
inu.
Ljóst er að íbúarnir eru á nálum
yfir ástandinu. Ein kona segist
hafa tekið eftir grunsamlegum
svartklæddum mönnum með der-
húfur og bakpoka sem séu að ves-
enast og verði flóttalegir þegar þeir
mæti fólki. Þá bendir einn maður á
að þjófar geti fundið veik merki frá
lyklakippum inni í húsum fólks og
geti magnað þau upp til að opna
bíla. Best sé því að geyma bíllykla í
kökuboxi úr málmi yfir nótt.
Einn segist hafa heyrt í þrem-
ur erlendum mönnum kalla
„Lights Lights“ þegar hreyfiskynj-
ari í bílainnkeyrslu hans hafi far-
ið í gang og þeir hlaupið á brott í
kjölfarið. Bent er á að slíka hreyfi-
skynjara sé hægt að fá í Costco á
sjö þúsund krónur.
Þann 5. desember verður
haldinn íbúafundur um sam-
göngumál í bænum. Íbúarnir tala
um að fjölmenna á þann fund og
taka þar upp umræður um þessa
meintu innbrotahrinu hverfisins.
Hverfasíður hafa kosti og galla
Birgir Örn Guðjónsson er varð-
stjóri í Kópavogi og er Kársnes-
hverfi í hans umdæmi. Hann hef-
ur reynt að róa fólk á svæðinu og
benda því á að yfirleitt sé þetta
tímabundið ástand þegar ein-
hverjir einstaklingar venji komur
sínar á ákveðin svæði. Þá verði eft-
irlit lögreglu aukið í hverfinu með-
an á því stendur.
Birgir segir í samtali við DV:
„Ekki er hægt að kalla þetta neina
innbrotaöldu. Samfélagið er bara
orðið svo miklu meðvitaðra um
það þegar eitthvað gerist. Sam-
félagsmiðlarnir og svona hverfa-
síður leika þar stórt hlutverk.“
Birgir segir þetta hafa bæði kosti
og galla. „Þetta er neikvætt að
því leyti að fólk verður óþarflega
áhyggjufullt en jákvætt vegna þess
að þetta stuðlar að meiri hverfis-
vitund og nágrannavörslu.“ Vegna
samfélagsmiðlanna upplifi fólk
hlutina stærri en þeir séu.
Hvað er þá að gerast í Kárs-
nesi? „Þarna komu upp nokkur at-
vik á stuttum tíma sem tengdust
að mestu sama einstaklingnum.
Það þarf oft ekki meira til. Þetta
var hvorki faraldur né skipulögð
brotastarfsemi. Mig minnir að í
þessum tilvikum hafi verið far-
ið inn í ólæst hús eða bíla. Það er
alltaf góð regla að hafa húsið læst
á nóttunni eða þegar enginn er
heima og að sjálfsögðu að læsa
alltaf bílnum.“
Að eftirlit sé aukið í hverf-
inu er eitthvað sem gerist sjálf-
krafa að sögn Birgis. „Þetta er
í raun ekkert skipulagt, aukið
eftirlit heldur aukast líkurnar
á því að lögreglubifreiðum sé
ekið um þau svæði þar sem
einhverjir villast tímabund-
ið inn í.“
Eðlilegt og mannlegt að
verja sig og sína
Margir íbúar Kársness og
víðar kunna nú að velta
því fyrir sér hvað til bragðs
eigi að taka ef innbrots-
þjófar koma inn á heimil-
ið. Birgir segir: „Mjög erfitt
er að gefa eitthvert eitt
rétt svar við þessari spurningu.
Flestir myndu nú gera margt til að
verja sig og sína. Það er eðlilegt og
mannlegt. Maður verður samt að
hafa í huga að hér á Íslandi gild-
ir sú meginregla að ganga ekki
lengra í slíku en maður þarf.“
Hann bendir fólki á að hringja
strax í neyðarnúmerið 112. „Við
bregðumst mjög hratt við ef slíkt
atvik kemur upp. Fólk þarf svo að
meta það sjálft hvort það treysti
sér til að mæta viðkomandi úti
eða hvort það vilji bíða eft-
ir lögreglu. Fólk er misjafnt og að-
stæðurnar einnig.“
Er algengara en ekki að inn
brotsþjófar séu ölvaðir eða í eitur
lyfjavímu heldur en allsgáðir?
„Ég held nú að ef einhverjir
villist inn í hús þar sem einhver er
heima þá séu líkurnar oft meiri á
því að viðkomandi sé undir ein-
hverjum áhrifum. Þetta er gjarn-
an gert til að fjármagna einhverja
neyslu.“ Hann segir að langal-
gengustu viðbrögð þeirra séu að
flýja ef þeir mæta fólki. „Þá er líka
hægt að færa viðkomandi þær
fréttir að lögreglan sé á leiðinni.
Það eru fréttir sem þeir vilja
ekki heyra.“
Birgir segir að götumynda-
vélar geti bæði haft fælingar-
mátt og hjálpað lögreglu við
að upplýsa brot. Þó verði að
vega þetta og meta út frá
persónuverndarsjónarmið-
um einnig. „Ég held samt
persónulega að götumynda-
vélar geti komið að góðu gagni á
ákveðnum og vel völdum stöð-
um. En það sem við þurfum
fyrst og fremst eru fleiri
lögreglumenn.“ n
„Ekki er hægt að
kalla þetta neina
innbrotaöldu. Samfélag-
ið er bara orðið svo miklu
meðvitaðra um það
þegar eitthvað gerist.
Kristinn Haukur Guðnason
kristinn@dv.is
Birgir Örn Guðjónsson