Morgunblaðið - 21.06.2018, Síða 62

62 MENNING
MORGUNBLAÐIÐ FIMMTUDAGUR 21. JÚNÍ 2018
Ragnhildur Þrastardóttir
ragnhildur@mbl.is
„Mér finnst skipta máli að hafa
fyrsta flokks listamenn, íslenska og
erlenda,“ segir Nína Margrét
Grímsdóttir, listrænn stjórnandi
tónleikaraðarinnar Reykjavík Class-
ics, um val á listafólki fyrir tónleika-
röðina. Reykjavík Classics hefst í
dag og stendur til sjötta ágúst.
Listafólk á breiðu aldursbili
Yngsti flytjandi hátíðarinnar er
Herdís Mjöll Guðmundsdóttir fiðlu-
leikari, sem er rétt skriðin yfir tví-
tugt, en Nína segir að það komi vel
út að blanda aldurshópum saman.
„Það skiptir miklu máli að lista-
mennirnir séu á breiðu aldursbili, að
þarna séu ungir og upprennandi
listamenn sem eru að stíga sín fyrstu
skref og einnig afar reyndir lista-
menn. Það er náttúrlega aðalatriði
að fólki líði vel saman við flutning
kammertónlistar og því finnist
ánægjulegt að endurskapa tónlist.“
Tónleikaröðin er nú haldin í þriðja
skipti. Einhverjir flytjendanna hafa
einnig komið fram undanfarin tvö ár
og munu sömuleiðis flytja verk þetta
árið. „Það er ákveðinn kjarni sem
kemur að þessu en svo bætast ein-
hverjir nýir við árlega. Til dæmis
hafa Áshildur Haraldsdóttir, Sig-
urður Bjarki Gunnarsson, Baldvin
Oddsson, Ari Vilhjálmsson og Svan-
ur Vilbergsson komið fram á síðustu
tveimur tónleikaröðum og koma
einnig fram í ár.“
Metnaðarfull efnisskrá
Efnisskrá tónleikanna er ákveðin í
samráði við flytjendur. „Það sem ég
legg upp með er að efnisskráin sé
metnaðarfull. Á henni eru bæði
klassískar perlur og íslensk róman-
tík. Þetta árið leggjum við áherslu á
íslensk tónverk og þau eru rauði
þráðurinn í efnisskránni. Við tökum
fyrir Sveinbjörn Sveinbjörnsson,
Sigvalda Kaldalóns og Emil Thor-
oddsen, hina íslensku gullöld. Þeirra
verk eru á margan hátt grunnurinn
fyrir íslenska tónlist og það sem hún
byggist á. Mér finnst afar skemmti-
legt að kynna þessar perlur fyrir
þeim sem koma á tónleikana.“
Þessar íslensku perlur sem um
ræðir hafa ekki verið fluttar mikið í
gegnum tíðina, að sögn Nínu. „Við
munum fá að heyra fiðlu- og píanó-
sónötu eftir Sveinbjörn Sveinbjörns-
son auk Rómönsu og Reverie sem ég
er ekki viss um að hafi nokkrun tíma
heyrst hérlendis. Þessi íslensku verk
eru almennt mjög sjaldan flutt á tón-
leikum svo það er í raun einstakur
viðburður þegar þau eru flutt. Einn-
ig verða flutt verk eins og Ave Maria
eftir Sigvalda Kaldalóns sem Svanur
Vilbergsson flytur í eigin útsetn-
ingu. Áshildur Haraldsdóttir hefur
jafnframt útsett sönglög Emils
Thoroddsen og mun flytja þau í eigin
útsetningu, sem er mjög spennandi.“
Hver flutningur einstakur
Tónleikaröðin býður upp á sjö
prógrömm sem standa almennt yfir í
sex til sjö daga. „Bæði mér og Hörp-
unni fannst mikilvægt að það væri
stöðugleiki í dagskránni, fyrir lista-
menn og áhorfendur. Það er ekki al-
gengt að þetta sé gert í klassíska
tónlistarheiminum, hvorki hérlendis
né erlendis, en við sjáum gjarnan
sama prógrammið keyrt dag eftir
dag í leiksýningum og danssýn-
ingum. Það þarf að hafa í huga að
hver tónlistarflutningur er endur-
sköpun og því aldrei sá sami og áður.
Flutningurinn er samtal við áheyr-
endur og áheyrendahópurinn breyt-
ist frá degi til dags svo hverjir tón-
leikar eru einstakir þó svo að verkin
séu hin sömu. Þetta er líka mjög
mikil áskorun fyrir flytjendur; að
bregðast við nýjum áheyrendum á
hverjum degi, þannig að það er líka
skemmtilegur vinkill fyrir okkur
sem flytjum tónlistina.“
Stjórnar og flytur tónverk
Nína Margrét er píanóleikari og
mun ekki einungis stýra tónleika-
röðinni heldur mun hún einnig flytja
tónverk í fjórum af sjö prógrömmum
Reykjavík Classics. „Þetta er mjög
krefjandi og ég er í raun með tvo
hatta. Góðu fréttirnar eru að ég er
búin að gera þetta í mjög mörg ár,
bæði hér og í New York, hef mikla
reynslu og fólkið sem ég vinn með er
oft vinir mínir til áratuga. Það er af-
skaplega ljúft að vinna með þeim á
sviði líka og mér finnst mikil forrétt-
indi að geta bæði verið að flytja og
skipuleggja. Það felst ákveðin sköp-
un í því líka.“
Vinsælt á meðal ferðafólks
Nína segir aðsókn að tónleikunum
vera að byggjast upp hægt og síg-
andi. „Það eru aðallega erlendir
ferðamenn sem koma á tónleikana
en líka eitthvað af Íslendingum. Ég
hef verið ágætlega ánægð með að-
sóknina en auðvitað vonum við að
þetta vaxi og dafni og sem flestir sjái
sér fært að mæta. Tónleikarnir eru
tilvalið tækifæri til að heyra fyrsta
flokks akústíska klassíska tónlist í
Eldborginni en Sinfónían spilar ekki
þar yfir sumartímann.“
Að mögulegt sé að nota Hörpu
alla mánuði ársins segir Nína Mar-
grét ekki sjálfsagt mál. „Ég veit til
þess að sambærileg tónleikahús er-
lendis séu lokuð á sumrin. Það er gíf-
urlega mikil synd svo ég vil undir-
strika hvað það eru mikil forréttindi
að fá að nota húsið okkar allan ársins
hring í það sem það var byggt fyrir.“
Tónleikar Reykjavík Classics
verða haldnir nánast daglega frá 21.
júní til 6. ágúst.
Hálftíma hádegistónleikar
Tónleikarnir eru alltaf á sama
tíma, þeir hefjast klukkan hálfeitt og
standa til eitt. „Mér finnst skipta
máli að tónleikarnir séu ekki langir
og við lögðum upp með að hafa ekk-
ert hlé. Þetta er svolítið óformlegra
en klassískir tónleikar eru oft og fólk
þarf ekki að setja sig í neinar sér-
stakar stellingar áður en það kemur,
fara í spariföt eða neitt slíkt. Það er
heldur ekki nauðsynlegt að kaupa
miða fyrir fram.“
Fjölbreytt dagskrá
Listafólkið sem kemur fram á tón-
leikaröðinni í ár er eftirfarandi:
Svanur Vilbergsson gítarleikari,
trompetleikararnir Baldvin Oddsson
og Jonah Levy, Nína Margrét
Grímsdóttir píanóleikari, Ásta
Kristín Pjetursdóttir víóluleikari,
sellóleikarinn Caitriona Finnegan,
Judith Ingolfsson fiðluleikari, Vladi-
mir Stoupel píanóleikari, Ari Þór
Vilhjálmsson fiðluleikari, Áshildur
Haraldsdóttir flautuleikari og Sig-
urður Bjarki Gunnarsson sellóleik-
ari. Nánari upplýsingar um dagskrá
tónleikaraðarinnar má finna á vef-
síðu Hörpu, www.harpa.is.
Íslenskar tónsmíðar í forgrunni
 Fyrsta flokks listafólk í tónlistarröðinni Reykjavík Classics sem hefst í dag  Klassískar perlur og
íslensk rómantík  Tónleikaröðin stendur í rúmar sjö vikur  Blásið til tónleika í hverju hádegi
Ljósmynd/Aðsend
Erlendir gestir Þau Judith Ingolfsson fiðluleikari og Vladimir Stoupel
píanóleikari koma fram á þrennum tónleikum á Reykjavík Classics.
Ljósmynd/Aðsend
Fiðla Ari Þór Vilhjálmsson leikur á
fiðlu vikuna 18. til 24. júlí nk.
Ljósmynd/Aðsend
Píanóleikari Nína Margrét spilar á
píanó í fjórum af átta prógrömmum.
Djasstónlistarmennirnir Tómas R.
Einarsson bassaleikari og Eyþór
Gunnarsson píanisti gáfu í lok síð-
asta árs út plötuna Innst inni. Þeir
félagar eru þeir einu sem leika á
plötunni en Tómas er höfundur
laganna.
Platan hefur hlotið hlotið afar
lofsamleg ummæli í erlendum
djasstímaritum austan hafs og
vestan. Í danska blaðinu Jazz-
Special skrifaði gagnrýnandinn
Thorbjörn Sjögren: „Hér er nægt
andrými, hér er ró, hér er nægur
tími og hér slá hjörtun í takt í 11
lögum Tómasar. Og um leið er
sveiflan ótrúlega sterk. Hér er á
ferðinni ein óvæntasta og sterk-
asta tónlistarupplifun sem ég hef
orðið fyrir um langa hríð.“
Í enska blaðinu Jazz Journal
skrifaði Andy Hamilton: „Það ríkir
tregi yfir tónlistinni á þessari
plötu og þótt hún sé ekki fjöl-
breytt er hún engu að síður ein-
staklega áhrifamikil.“ Hamilton
gefur plötunni fjórar stjörnur af
fimm.
Í bandaríska tímaritinu All
About Jazz skrifaði C. Michael
Bailey: „Þetta er meira en tónlist,
þetta er hugarástand og allt um
kring er allt eins og vera ber, að
minnsta kosti meðan tónlistin var-
ir. Leyfið þessari plötu að færa
ykkur frið.“
Þeir Tómas og Eyþór munu
halda síðbúna útgáfutónleika í
Norræna húsinu 15. ágúst í sum-
artónleikaröð hússins.
Tómas og Eyþór fá
lofsamlega dóma
Ljósmynd/ Baldur Kristjánsson
Góðir Tómas og Eyþór hafa spilað saman í fjölda mörgum verkefnum.