Gerðir kirkjuþings - 01.01.2017, Blaðsíða 42

42 43
Nefndarálit allsherjarnefndar um skýrslu kirkjuráðs.
Allsherjarnefnd hefur fjallað um skýrslu kirkjuráðs og fylgigögn með henni ásamt
ávörpum og ræðum við upphaf kirkjuþings.
Nefndin þakkar ávarp Magnúsar E. Kristjánssonar, forseta kirkjuþings. Hann fjallaði
í ávarpi sínu um mikilvægi Gullnu reglunnar. Hann hvatti til þess að fólk temdi sér í
samskiptum, að “allt sem þér viljið að aðrir menn gjöri yður það skuluð þér og þeim gjöra”.
Kirkjan ætti að sýna frumkvæði og hafa Gullnu regluna að leiðarljósi í störfum sínum
og samskiptum öllum. Hann hvatti til samfélagsverkefna sem hefðu það að markmiði að
auka samhygð. Hann varpaði fram þeirri spurningu hvort kirkjuþingi hefði miðað áfram
í störfum sínum. Hann benti á að kirkjuþing þyrfti stöðugt að hyggja að starfsháttum
sínum.
Dómsmálaráðherra Sigríður Á. Andersen flutti ávarp og fjallaði um samninga ríkis og
kirkju og lýsti þeirri skoðun sinni að ríkisvaldið viðurkenndi skerðinguna sem kirkjan
hefur orðið fyrir undanfarin ár og vilja sinn til að leitast við að efna samninginn að fullu.
Biskup Íslands frú Agnes M. Sigurðardóttir fjallaði um siðbótarafmælið og hvernig
kirkjan hefur minnst þess. Hún nefndi auðinn í kirkjunni sem kemur svo vel fram á
siðbótarafmæli í menningu og listum.
Skírnum á Íslandi eins og í nágrannalöndum hefur fækkað. Biskup lagði áherslu á að
efla og fræða um mikilvægi skírnarinnar.
Biskup vill efla lýðræði í kirkjunni og nefndi að í Noregi er kosið til kirkjuþings
samhliða sveitarstjórnarkosningum. Kirkjan vill ná árangri í því að bæta samfélagið með
því að eyða tortryggni og hét hún því að leggja sitt að mörkum. Lýðræði byggist á því að
kalla á þátttöku almennings.
Biskup fjallaði um umhverfismálin og mikilvægi þess að kirkjan beitti sér á því sviði
og vitnaði til samþykkta kirkjuþings unga fólksins í því sambandi. Haldin var ráðstefna á
vegum Alkirkjuráðsins um umhverfismál hér á landi nýverið sem tókst vel. Biskup telur
mikilvægt fyrir kirkjuna að taka þátt í alþjóðasamstarfi kirkna.
Við setningu kirkjuþings önnuðust þau Davíð Sigurðsson, Ingvar Alfreðsson og Jóhanna
Guðrún Jónsdóttir tónlistarflutning. Þau koma öll að tónlistarstarfi kirkjunnar. Jóhanna
Guðrún ávarpaði kirkjuþingsfulltrúa og gesti og fór afar fögrum orðum um upplifun sína
af því að koma til starfa í kirkjunni og hvað þjónusta kirkjunnar væri mikilvæg.
Allsherjarnefnd þakkar greinargóða skýrslu kirkjuráðs og mikilvæg störf þess á liðnu
ári. Í skýrslunni eru tíundaðar niðurstöður helstu mála ráðsins og er það vel. Nefndin
leggur til að málið verði samþykkt með ályktun á þskj. 43.