Gerðir kirkjuþings - 01.01.2017, Blaðsíða 55

55
20. gr.
■Biskup Íslands fer með yfirstjórn þjóðkirkjunnar ásamt öðrum kirkjulegum stjórnvöldum
eftir því sem nánar er mælt fyrir um í lögum þessum og starfsreglum frá kirkjuþingi.
□Biskup Íslands hefur aðsetur í Reykjavík.
□Biskup Íslands gætir einingar kirkjunnar og hefur tilsjón með kristnihaldi, kenningu
kirkjunnar og starfi hennar.
□Biskup Íslands vígir presta og djákna og setur þeim vígslubréf.
□Biskup Íslands vígir kirkjur og vísiterar söfnuði.
□Biskup Íslands skipar ráðgjafarnefnd um kenningarleg málefni kirkjunnar. Kirkjuþing
setur reglur um störf nefndarinnar.
□Biskup Íslands beitir sér fyrir lausn ágreiningsefna sem rísa kunna á kirkjulegum
vettvangi og getur gripið til þeirra úrræða sem lög og starfsreglur kirkjunnar leyfa.
□Biskup hefur ákvörðunarvald um einstök mál sem ekki heyra undir önnur stjórnvöld
þjóðkirkjunnar samkvæmt lögum þessum og starfsreglum.
□Sé biskup í vafa um hvort mál, skv. 7. og 8. mgr., heyri undir embætti hans skal hann kalla
eftir áliti úrskurðarnefndar þjóðkirkjunnar, sbr. 23. gr. Telji nefndin að málið heyri ekki
undir biskup lýkur afskiptum hans af því og tilkynnir hann hlutaðeiganda niðurstöðuna.
□Biskup Íslands skal kalla vígslubiskupa til fundar svo oft sem þurfa þykir og nánar skal
kveðið á um í starfsreglum kirkjuþings. Biskupafundur skal m.a. búa þau mál er varða
kenninguna, helgisiði og helgihald í hendur prestastefnu og vinna allar tillögur að breyttri
skipan prestakalla, prófastsdæma og þjónustu sérþjónustupresta og leggja fyrir kirkjuþing.
Biskupafundur skal halda gerðabók um störf sín.
21. gr.
■Biskup Íslands og vígslubiskupar eru kjörnir samkvæmt starfsreglum sem kirkjuþing
setur.
□Vígslubiskupar eru tveir með aðsetur á hinum fornu biskupsstólum, í Skálholti í
Biskupstungum og á Hólum í Hjaltadal.
□Kjörgengur til biskups- og vígslubiskupsembætta er hver sá guðfræðikandídat sem
fullnægir skilyrðum til þess að gegna prestsembætti í þjóðkirkjunni.
□Biskup Íslands og vígslubiskupar eru skipaðir til fimm ára í senn, sbr. 23. gr. laga um
réttindi og skyldur starfsmanna ríkisins, nr. 70/1996. Biskupi Íslands og vígslubiskupum
er heimilt að sitja tvö kjörtímabil.
□Forseti Íslands skipar biskup Íslands og vígslubiskupa.
□Kirkjuþing setur starfsreglur um kjör biskups Íslands og vígslubiskupa, embætti þeirra,
störf, svo og umdæmi vígslubiskupa.
22. gr.
■Forfallist biskups Íslands skal að jafnaði sá vígslubiskup sem eldri er að biskupsvígslu
gegna embætti hans um stundarsakir.
□Nú fellur biskup Íslands frá eða lætur af embætti og skal þá sá vígslubiskup sem eldri er
að biskupsvígslu gegna embætti hans þar til biskupskjör hefur farið fram og nýr biskup
Íslands hefur fengið skipun í embætti sitt.