Morgunblaðið - 12.01.2019, Blaðsíða 49

MENNING 49
MORGUNBLAÐIÐ LAUGARDAGUR 12. JANÚAR 2019
Kvikmyndin Vesalings elskendur
verður frumsýnd á Kvikmynda-
hátíðinni í Gautaborg 27. janúar.
Samkvæmt upplýsingum frá fram-
leiðendum var myndin valin sem ein
af níu bestu norrænum myndum í
flokknum norrænar kómedíur, en
stjórnendur hátíðarinnar ákváðu að
beina sjónum sínum að slíkum
myndum í ár vegna gæða þeirra að
undanförnu.
Kvikmyndin, sem er gamanmynd
með rómantísku ívafi, fjallar um tvo
bræður sem eiga erfitt uppdráttar í
ástarmálum. Svíinn Maximilian
Hult, sem þekktastur er fyrir
Hemma (2013), skrifar bæði hand-
ritið og leikstýrir, en myndin var al-
farið unnin hérlendis og fara ís-
lenskir leikarar með öll hlutverk. Í
aðalhlutverkum eru Björn Thors,
Jóel Sæmundsson, Sara Dögg Ás-
geirsdóttir, Edda Björgvinsdóttir og
Hafdís Helga Helgadóttir.
Vesalings elskendur er framleidd
af sænska fyrirtækinu LittleBig
Productions AB gegnum framleið-
endurna Önnu G. Magnúsdóttur og
Anders Granström í samvinnu við
Hughrif ehf. Myndin verður frum-
sýnd hérlendis 14. febrúar.
Vesalings elskendur til Gautaborgar
Ljósmynd/Sigga Ella
Bræður Jóel Sæmundsson og Björn Thors
í hlutverkum sínum í myndinni.
Afsteypur nefn-
ist gjörninga-
dagskrá sem
fram fer á Kjar-
valsstöðum í dag,
laugardag, kl. 17
í tengslum við
Róf, yfirlitssýn-
ingu Haraldar
Jónssonar. Á
sýningunni má finna úrval verka
frá öllum ferli hans síðustu þrjá
áratugi. Haraldur hefur unnið í
ólíka miðla og ómissandi hluti af
verkum hans eru gjörningar. Þar,
eins og í öðrum verkum, fæst hann
við eimingu tilverunnar. Hann
skoðar hvernig við greinum um-
hverfi okkar, vinnum úr upplifun,
tjáum okkur og eigum í sam-
skiptum hvert við annað. Á hátíð-
inni í dag verða fluttir valdir gjörn-
ingar af ferli listamannsins ásamt
frumflutningi á nýju verki.
Á morgun, sunnudag, kl. 15 ann-
ast Markús Þór Andrésson sýning-
arstjóri leiðsögn um Róf á Kjarvals-
stöðum. Sama dag milli kl. 14 og 16
verður gestum boðið í blóðnám,
sem er verk á sýningunni.
Gjörningadagskrá, leiðsögn og blóðnám
Haraldur Jónsson
Leikhópurinn Lotta hefur afmiklum metnaði og eljuauðgað leiklistarlíf land-ans frá því hópurinn var
stofnaður fyrir 13 árum. Fyrsta ára-
tuginn sem hópurinn starfaði sýndi
hann aðeins úti við yfir sumartímann
á ferðum sínum um landið, en síðasta
vetur jók Lotta starfsemi sína til
muna og hóf að sýna á sviði innan-
dyra víðs vegar um landið að vetrar-
lagi. Þá var mörkuð sú stefna að
halda áfram að frumsýna ný barna-
og fjölskylduleikrit á sumrin, en
dusta rykið af eldri verkum hópsins
og sýna í nýjum uppfærslum ávallt
tíu árum eftir frumuppfærsluna.
Þessu ber að fagna, ekki síst í ljósi
þess að alltof fá ný íslensk leikrit
eiga afturkvæmt á leiksviðið eftir að
sýningartíma frumuppfærslunnar
lýkur.
Fyrsta vetrarsýning hópsins, í
fyrra, var leikgerð Ármanns Guð-
mundssonar á sögu L. Frank Baum
um Dórótheu og vini hennar í Oz
sem fyrst var sett upp sumarið 2008.
Frá árinu 2009 hefur Lotta markað
sér þá sérstöðu að sýna á sumrin
ávallt ný leikrit þar sem unnið er á
skapandi hátt með þekktar sögu-
persónur hinna ýmsu ævintýra og
þjóðsagna sem iðulega hefur boðið
upp á nýjan og skemmtilegan lestur
gömlu ævintýranna. Má í því sam-
hengi nefna Hróa hött eftir Önnu
Bergljótu Thorarensen frá árinu 2014
sem afbragðs dæmi um þessa skap-
andi nálgun. Eina sýningin fram til
þessa sem ekki er byggð á þekktri
sögu er Litaland Önnu Bergljótar
sem sýnt var sumarið 2016.
Sumarsýningin 2009 og þar með
vetrarsýningin 2019 er Rauðhetta
eftir Snæbjörn Ragnarsson í leik-
stjórn Ágústu Skúladóttur, sem
Lotta frumsýndi í Tjarnarbíói um
liðna helgi við góðar viðtökur. Þar
blandar höfundur saman þremur æv-
intýrum sem reikna má með að öll
börn á landinu þekki. Þetta eru sög-
urnar af Rauðhettu og úlfinum, grís-
unum þremur sem byggja sér mi-
straust hús í leit að skjóli undan
úlfinum og loks systkinunum Hans
og Grétu sem lenda í klóm vondu
nornarinnar eftir að hafa verið út-
hýst af eigin foreldrum. Þó að verkið
sé nefnt eftir Rauðhettu má í raun
segja að úlfurinn myndi límið á milli
ævintýranna þriggja, því faðir Hans
og Grétu er veiðimaðurinn sem kem-
ur Rauðhettu og ömmu hennar til
bjargar eftir að úlfurinn hefur gleypt
þær.
Sé hlustað á upptöku hópsins á
frumuppfærslunni sem gefin var út á
geisladisk 2009 má greinilega heyra
að leiktextinn hefur verið aðlagaður
nýjum áhorfendum og uppfærður
með skondnum vísunum í samtíman
auk þess sem bætt hefur verið við
fleiri lögum, sem koma úr smiðju
Baldurs og Snæbjörns Ragnarssona
og Gunnars Ben, og þjóna sýning-
unni að vanda vel þó að fátt sé um
eyrnaorma að þessu sinni.
Lotta er fátækt leikhús í þeim
skilningi að farandleikhópurinn hef-
ur ekki mikið fé á milli handanna og
þarf því að beita mikilli útsjónarsemi
í allri útfærslu. Það ríkir hins vegar
engin fátækt í hugmyndaauðgi hóps-
ins undir listrænni forystu Ágústu
Skúladóttur sem ekki aðeins leik-
stýrir og semur skemmtilega dansa í
samvinnu við Berglindi Ýri Karls-
dóttur og leikhópinn heldur hannar
einnig þénuga leikmynd í samvinnu
við Andreu Ösp Karlsdóttur og Sig-
stein Sigurbergsson. Trjánum í æv-
intýraskóginum mátti þannig hæg-
lega breyta í búr fyrir Hans og
rimlatjöldin fyrir miðju voru í sam-
spili við frábæra lýsingu Ólafs
Ágústs Stefánssonar notuð á meist-
aralegan hátt til að skapa flotta sjón-
hverfingar í glímu úlfsins við grísina
ólánsömu. Notkun dúkkuhúsa til að
tákna heimili bæði Hans og Grétu og
hús nornarinnar virkaði einstaklega
vel og kallast með góðum hætti á við
reynsluheim áhorfenda.
Aðeins fimm leikarar skipta með
sér tólf hlutverkum uppfærslunnar
og á stundum var óskiljanlegt hversu
hratt þeim tókst að skipta um gervi.
Búningar Rósu Ásgeirsdóttur eru
mikið fyrir augað í litadýrð sinni og
draga upp skýra mynd af hverri per-
sónu. Andrea Ösp Karlsdóttir var
yndisleikinn og sakleysið uppmálað í
titilhlutverkinu og fór á kostum sem
vonda, sjóndapra nornin þar sem
búningurinn og leikgervi setti punkt-
inn yfir i-ið. Stefán Benedikt Vil-
helmsson miðlaði með sannfærandi
hætti þjáningu hins kúgaða veiði-
manns sem skilur börn sín eftir úti í
skógi þó að það sé honum þvert um
geð. Anna Bergljót Thorarensen
stökk leikandi létt milli þess að túlka
hina ráðagóðu Grétu, einn grísanna
og loks ömmu Rauðhettu. Sigsteinn
Sigurbergsson gerði sér mikinn mat
úr hlutverki gáfaða gríssins annars
vegar og hins treggáfaða og sísvanga
Hans hins vegar, sem verður í aðal-
hlutverki í næstu vetrarsýningu
Lottu að ári sem er mikið tilhlökk-
unarefni. Árni Beinteinn Árnason í
hlutverki úlfsins er nýr liðsmaður
Lottu og smellpassar inn í hópinn
með tilheyrandi leikgleði, nákvæmni
í öllum tímasetningum og góðum
tengslum við áhorfendur sem er lyk-
ilatriði í fjölskyldusýningum.
Hátt orkustig uppfærslunnar,
hugmyndaauðgi í allri sjónrænni út-
færslu og sprúðlandi skemmtilegheit
í leiknum bera leikstjóranum fagurt
vitni. Óhætt er því að mæla með
Rauðhettu fyrir alla aðdáendur
Lottu og þá sem vilja njóta fjöl-
skylduleiksýninga í háum gæða-
flokki.
Barnshjartað glatt
Ljósmynd/Ragnheiður Arngrímsdóttir
Skemmtilegheit „Hátt orkustig uppfærslunnar, hugmyndaauðgi í allri sjónrænni útfærslu og sprúðlandi skemmti-
legheit í leiknum bera leikstjóranum fagurt vitni,“ segir í rýni um Rauðhettu í uppsetningu leikhópsins Lottu.
Tjarnarbíó
Rauðhetta bbbbn
Eftir: Snæbjörn Ragnarsson. Leikstjórn:
Ágústa Skúladóttir. Tónlist: Baldur
Ragnarsson, Gunnar Ben og Snæbjörn
Ragnarsson. Söngtextar: Anna Bergljót
Thorarensen, Baldur Ragnarsson,
Gunnar Ben og Snæbjörn Ragnarsson.
Leikmynd: Andrea Ösp Karlsdóttir,
Ágústa Skúladóttir og Sigsteinn Sigur-
bergsson. Búningar: Rósa Ásgeirsdóttir.
Lýsing: Ólafur Ágúst Stefánsson. Hljóð-
mynd: Þórður Gunnar Þorvaldsson.
Dans: Berglind Ýr Karlsdóttir, Ágústa
Skúladóttir og leikhópurinn. Leikarar:
Andrea Ösp Karlsdóttir, Anna Bergljót
Thorarensen, Árni Beinteinn Árnason,
Sigsteinn Sigurbergsson og Stefán
Benedikt Vilhelmsson. Leikhópurinn
Lotta frumsýndi í Tjarnarbíói sunnu-
daginn 6. janúar 2019.
SILJA BJÖRK
HULDUDÓTTIR
LEIKLIST
ICQC 2018-20