Spássían - 2011, Blaðsíða 25

25
Ég er ekki tæknióð manneskja. Ég á ennþá túbusjónvarp og síminn
minn er bara meðalgreindur. En ég freistaðist til að fjárfesta í Kindle
bókalesaranum á dögunum. Kindle tækið (sem sumir hafa kallað
Kyndil á íslensku) er frábrugðið öðrum lófatölvum að því leyti að
um öðruvísi skjátækni er að ræða sem á að líkja eftir pappír. Ekkert
ljós er til staðar til að lýsa upp stafina heldur er notast við rafrænt
blek. Fyrir fólk sem hangir fyrir framan tölvur allan liðlangan daginn
er hvíldin fyrir augun kærkomin. Rafræna blekið gerir það líka að
verkum að hægt er að lesa á skjáinn í sólarljósi sem hinir venjulegu
skjáir leyfa ekki.
Kindle tækið er framleitt fyrir Amazon netbókabúðina og þótt
hægt sé að tengjast netinu og vafra um síður er fyrst og fremst um
rafræna bók að ræða. Amazon hefur svo gert notendum hægt um
vik að versla Kindle útgáfur af þeim bókum sem búðin selur. Hægt
er að koma 3500 bókum þarna fyrir sem ætti óneitanlega að spara
skápapláss, sérstaklega hjá fólki eins og mér sem er með króníska
og ósjálfráða bókakaupaáráttu.
Á.G.
Furðugóðar Furðusögur
Nýtt íslenskt tímarit hóf göngu sína síðasta vor og um leið
birtist ný tegund af tímariti á markaðnum. Furðusögur er,
eins og nafnið ber með sér, tímarit helgað smásögum og
myndasögum og er umfjöllunarefnið allt það sem telst
handan hins venjulega heims. Ungir íslenskir höfundar
spreyta sig á vísindaskáldskap, fantasíu og hryllingi og
verður að segjast að útkoman kemur skemmtilega á
óvart. Sögurnar eru vel skrifaðar og hugmyndirnar flestar
sprottnar upp úr íslenskum veruleika. Aðeins eitt tölublað
hefur komið út þegar þetta er skrifað en heyrst hefur að
von sé á öðru fljótlega. Það er vonandi að útgáfa þessi
nái að vaxa og dafna. Ljóst er að margir upprennandi
höfundar eru að prófa sig áfram með spennandi hluti
og annar eins vettvangur fyrir tilraunastarfsemi og frjóa
hugsun vandfundinn.
Á.G.
Á íslenskum geimfaraslóðum
Áhugafólk um geimferðir sem á leið um Norðausturland í júní ætti að
staldra í Safnahúsinu á Húsavík og kíkja á sýningu tengda ferðum geimfara
hingað til lands á síðustu öld.
Af þeim tólf mönnum sem stigið hafa fæti á tunglið komu níu í
Þingeyjarsýslur til að æfa sig og læra jarðfræði undir handleiðslu íslenskra
jarðvísindamanna. Árið 1965 kom hópur starfsmanna Bandarísku
geimferðastofnunarinnar NASA til æfinga á Íslandi. Í hópnum voru
geimfaraefni stofnunarinnar, þeirra á meðal Buzz Aldrin sem steig annar
manna fæti á tunglið. Skoðuðu þeir náttúru í Þingeyjarsýslum, sérstaklega
við Mývatn og í Öskju. Tveimur árum síðar kom annar hópur frá NASA
og meðal geimfaraefna í þeim hóp var Neil Armstrong, sem tókst að verða
skrefi á undan Aldrin.
Á sýningunni eru munir sem geimfaraefnin skildu eftir, ljósmyndir frá
dvöl þeirra hér auk mynda og muna sem tengjast geimferðum. Sýningarstjóri
er Örlygur Hnefill Örlygsson. Sýningin stendur til júníloka.