Fréttablaðið - 19.12.2020, Qupperneq 82

Þakklát fyrir að vera öll saman
Strangar reglur eru í gildi í Belgíu
en hvert heimili má aðeins
bjóða einum utanaðkomandi
til sín, sama hversu margir búa á
heimilinu. Inga Hanna Guðmunds-
dóttir hefur verið búsett í Brussel
í þrjú ár ásamt eiginmanni sínum,
Þorvaldi Henningssyni, en hún
starfar sem yfirmaður mannauðs-
mála hjá EFTA. Þau eiga þrjú börn,
dóttur sem býr hjá þeim í Brussel,
aðra dóttur sem er í skóla í Mílanó
á Ítalíu og son sem er í skóla í
Búdapest í Ungverjalandi.
„Það er búið að standa til allt
árið að koma heim, en eftir því
sem leið á árið kom í ljós að það
var ekki hægt að treysta á neitt
enda reglurnar sífellt að breytast.
Skólinn hjá krökkunum klárast
það seint að það var útilokað fyrir
okkur að ná þeim heim til Íslands
og úr sóttkví fyrir aðfangadag. Það
voru meiri líkur á að við næðum
þeim hingað til Brussel og við
gætum öll haldið ánægjuleg jól
saman.“
Inga Hanna var harðákveðin í að
fara heim í sumar en reglurnar um
sóttkví voru mun flóknari en hún
gerði sér grein fyrir í fyrstu.
„Ég ætlaði að búa heima hjá
foreldrum mínum sem hefði þýtt
að þau hefðu þurft að finna sér
annan samastað á meðan, sem
mér fannst ekki alveg ganga upp.
Ég var alltaf að bíða eftir að regl-
urnar breyttust en svona er þetta
bara. Krakkarnir voru sem betur
fer heima í allt sumar.“
Hún hefur verið að vinna heima
meira og minna síðan í mars en
faraldurinn hefur verið skæður í
Belgíu.
„Þetta er orðið rosalega langur
tími. Við ætluðum að reyna að
hittast nokkrir Íslendingar, skera
út laufabrauð og baka en svo
áttuðum við okkur á því að það
má ekki einu sinni. Reglurnar eru
rosalega takmarkaðar og það eru
engar samkomur leyfilegar. Það
var því ekkert annað í stöðunni en
að skera laufabrauðið út sjálfur,
baka piparkökuhús og fara alla
leið í að finna jólaskapið.“
Malt og appelsín frá Lúxemborg
Tengdamóðir Ingu Hönnu kom
til Brussel fyrir nokkrum dögum,
hún ætlar að verja jólunum með
fjölskyldunni en fer heim annan í
jólum til að ná að halda áramótin
heima.
„Tengdamamma kom með
hamborgarhrygg og hangikjöt
með sér en við létum flytja inn
malt og appelsín frá Lúxemborg,
það er skandinavísk búð þar
sem selur alls konar vörur. Ég
gat pantað Mackintosh á netinu
þannig að þetta er allt gert með
smá krókaleiðum en okkur
langar til að gera allt til að jólin
verði sem eðlilegust fyrir krakk-
ana.“
Hún segir að það verði eitthvað
svipað uppi á teningnum um
áramótin, það verði bara þau fjöl-
skyldan saman en það er bannað
að sprengja flugelda. „Við erum
fyrst og fremst bara ánægð með
að geta haldið jólin og áramótin
öll saman,“ segir Inga Hanna að
lokum.
Meiri jólagleði en venjulega
Bryndís Silja Pálmadóttir og Óskar
Björn Bjarnason búa í London.
Bryndís Silja er í meistaranámi
í Mið-Austurlandafræðum og
arabísku en Óskar starfar sem
kokkur. Þau ætla að halda sín fyrstu
jól ein í ár og eru spennt fyrir því að
skapa nýjar hefðir.
„Auðvitað er maður með heim-
þrá en aðstæðurnar eru bara eins
og þær eru og við ætlum að gera
gott úr þessu.“
Reglur í London voru hertar enn
frekar í vikunni og færðar í svo-
kallað Tier 3. Veitingastöðum og
börum var gert að loka og fólk má
ekki koma saman innandyra. Bryn-
dís segir að hertar aðgerðir breyti
ekki miklu fyrir þau.
„Ég get enn þá farið í skólann að
læra, bókasafnið er opið þó svo að
allir tímar séu í fjarkennslu og það
hefur verið mikið líf í borginni þrátt
fyrir harðar aðgerðir.“
Bryndís og Óskar verða tvö á
aðfangadagskvöld en frá og með
23. desember til 27. desember má
fólk af þremur heimilum hittast.
„Það gæti verið að við reynum
að hitta einhverja vini þarna á milli
jóla og nýárs en annars erum við
spennt fyrir því að búa til okkar
eigin hefðir um jólin. Okkur langar
líka til að taka einhverjar breskar
hefðir inn í okkar hátíðahöld, við
ætlum líklegast að hafa kalkún á
aðfangadag eins og flestir eru með
hér en við erum ekki alveg tilbúin
að ganga svo langt að opna pakk-
ana á jóladag eins og Bretar gera,“
segir Bryndís og hlær.
Jólaundirbúningurinn púsluspil
Jólaundirbúningurinn hefur verið
hálfgert púsluspil fyrir parið en
þau hafa verið að senda jólapakka
síðustu daga og vonast til að sem
flestir skili sér heim á réttum
tíma. Þau segja að það hafi verið
ákveðinn léttir að taka ákvörðun
um að vera úti yfir jólin.
„Við vorum búin að skoða það að
koma heim en eftir að við fórum
að sjá að staðan væri ekki nógu
góð á Íslandi og það leit ekki út
fyrir að við gætum hitt þá sem
okkur langaði, þá fannst okkur bara
betra að vera hér úti um jólin. Við
vorum heima í allt sumar sem var
yndislegt, þannig að það er ekki allt
of langt síðan að við hittum fólkið
okkar.“
Þau hafa gert jólalegt í kringum
sig, keypt jólatré, skraut og dagatal.
„Við erum búin að vera að eltast
við meiri jólagleði en við hefðum
eflaust gert annars og bjuggum
meira að segja til okkar eigin
jólakrans. Mamma sendi mér
lakkrís kurl um leið og við tókum
ákvörðunina um að koma ekki
heim, þannig að það verða lakkrís-
toppar á boðstólum. Í eðlilegum
heimi hefðum við klárlega komið
heim en við erum bara nokkuð sátt
hér.“
Ekkert jólatré en sómakólfurinn skreyttur
Gunnar Atli Thoroddsen og Sigríður
Gyða Héðinsdóttir eru búsett í
Berlín í Þýskalandi ásamt tæplega
sjö mánaða gömlum syni sínum,
Héðni Sigríðarsyni Thoroddsen.
Þau ákváðu fyrir þónokkru að
halda sig í Þýskalandi um jólin.
„Við fórum til Íslands í ágúst
þegar seinni COVID-bylgjan var
hafin. Við frestuðum heimför til
Berlínar þrisvar sinnum í von um
að ná beinu flugi en á endanum
flugum við í gegnum Amsterdam.
Þannig að við erum búin að upplifa
hvað það getur verið mikið vesen
að ferðast á milli landa núna, sér-
staklega með ungan dreng,“ segir
Gunnar.
Litla fjölskyldan ákvað því
snemma að jólin skyldu haldin
hátíðleg í Berlín í ár. Gunnar segir
það vera ákveðinn létti að þurfa
ekki að setja ákveðin mörk í kring-
um hátíðirnar. „Í sumar bjuggum
við inni á foreldrum okkar og það
er auðvitað alltaf hætta á að maður
geti borið veiruna í annað fólk, það
væri auðvitað hræðilegt og maður
verður að sýna ábyrgð.“
Gunnar smitaðist af COVID-19
fyrir um átta vikum en Sigríður og
Héðinn sluppu. Þau voru samt sem
áður öll í einangrun í sömu íbúðinni
í tvær vikur. „Þetta sýndi manni
bara hvað þessi veira er lúmsk,
við fengum vinafólk í heimsókn
sem reyndist smitað og ég fékk
þetta frá þeim. Sigga og Héðinn
sluppu sem betur fer þó svo að við
höfum verið í sömu íbúðinni í allan
þennan tíma,“ segir Gunnar.
Illa klipptur um jólin
Strangar takmarkanir eru í gildi
í Þýskalandi en þær voru hertar
enn frekar í vikunni, aðeins fimm
frá tveimur heimilum mega koma
saman og öllum veitingastöðum
og börum hefur verið lokað. Gunn-
ar segir að hertari reglur hafi þó
ekki mikil áhrif á daglegt líf þeirra.
„Ég hef verið að vinna heima
í sex mánuði og það hefur verið
grímuskylda síðan í apríl. Þetta er
allt farið að renna saman í eitt og
maður er farinn að venjast þessu.
Það sem hefur mestu áhrifin á mig
í þessari nýju reglugerð er að núna
kemst ég ekki í jólaklippinguna,
hárgreiðslustofur fá ekki að opna
á ný fyrr en í janúar.“
Fjölskyldan keypti ekki jólatré
an ákvað þess í stað að klæða
plöntu, nánar tiltekið sómakólf,
sem var nú þegar í stofunni í jóla-
fötin. Þau hafa ekki fengið neinn
mat sendan heiman frá Íslandi,
en þau ætla að vera með sveppa
Wellington á aðfangadag.
„Sigga fann reyndar þýska
hestamannasíðu þar sem íslenskt
jólaöl var selt og lét slag standa og
keypti kippu af því, mjög handa-
hófskennt,“ segir Gunnar kíminn.
Litla fjölskyldan ætlar annars að
njóta þess að vera saman um jólin
og ætlar að verja áramótunum
með annarri íslenskri fjölskyldu
sem einnig er búsett í Berlín.
„2020 er búið að vera óút-
reiknanlegt ár, það er ekki hægt
að plana neitt og maður verður
bara að taka því eins og það er. Það
þýðir ekkert að sakna jólanna á
Íslandi heldur höldum við öðruvísi
jól hér,“ segir Gunnar að lokum.
Inga Hanna Guðmundsdóttir heldur jólin í Brussel ásamt eiginmanni
sínum, Þorvaldi Henningssyni, og börnunum þeirra þremur. MYND/AÐSEND
Gunnar Atli Thoroddsen og Sigríður Gyða Héðinsdóttir halda fyrstu jól sonar
síns, Héðins Sigríðarsonar Thoroddsen, í Berlín í Þýskalandi. MYND/AÐSEND
MAMMA SENDI MÉR
LAKKRÍSKURL UM LEIÐ OG
VIÐ TÓKUM ÁKVÖRÐUN-
INA UM AÐ KOMA EKKI
HEIM, ÞANNIG AÐ ÞAÐ
VERÐA LAKKRÍSTOPPAR Á
BOÐSTÓLUM.
SIGGA FANN REYNDAR
ÞÝSKA HESTAMANNA-
SÍÐU ÞAR SEM ÍSLENSKT
JÓLAÖL VAR SELT OG LÉT
SLAG STANDA OG KEYPTI
KIPPU AF ÞVÍ, MJÖG
HANDAHÓFSKENNT.
Fyrstu jólin sem þau Bryndís Silja og Óskar Björn halda tvö saman verða í
London. Jólin verða bæði íslensk og bresk. MYND/AÐSEND
1 9 . D E S E M B E R 2 0 2 0 L A U G A R D A G U R50 H E L G I N ∙ F R É T T A B L A Ð I Ð