Börn og menning - 2019, Blaðsíða 3
Allt hefur sinn sjarma þótt
stundum sé erfitt að finna
sjarmann við grámyglulegan
hversdagsleikann í nóvem-
ber. Það þarf samt ekki alltaf
mikið til að gleðja, runni
sem neitar að fella laufin
þrátt fyrir stanslausar árásir
haustvindanna eða kertaljós á dimmu kvöldi getur yljað
vetrarþreyttasta fólki um kaldar hjartarætur.
Fram undan er aðventan og jólin, árstími sem mörg-
um finnst hafa hvað mestan sjarma. Ljósið í svartasta
skammdeginu. Burtséð frá því hvort fólk fagnar jólun-
um af trúarlegum ástæðum eða einhverjum öðrum eiga
vonandi flestir góðar minningar sem tengjast þeim.
Eplalykt, smákökubakstur, skreytingar af öllu tagi og
biðin langa eftir kvöldinu sem allur undirbúningur-
inn miðaðist við. Minningarnar tengjast líka oft bók-
um enda hið árlega jólabókaflóð í hugum margra ekki
síður tilhlökkunarefni en jólahátíðin sjálf. Vangaveltur
um hvað leynist spennandi í flóðöldunni, hvaða bækur
væri gaman að fá í jólagjöf og ekki síður hvaða bækur
væri gaman að gefa. Sælla er jú að gefa en þiggja. Bóka-
tíðindi Félags íslenskra bókaútgefenda skipa líka stóran
sess í jólaundirbúningi margra þar sem farið er vand-
lega yfir hvað er á boðstólum. Börnin mín fóru til að
mynda í gegnum tíðindin ár eftir ár, merktu við hvaða
bækur heilluðu mest og skrifuðu samviskusamlega á
jólagjafalistann, ömmum, öfum og foreldrum til mik-
illar ánægju.
Aðventan getur verið mótsagnakenndur tími. Allir
ætla að „njóta en ekki þjóta“ en eru samt alltaf að þjóta
á alls konar viðburði til að njóta, móðir og másandi.
Fara út að borða með vinnu-
félögum og vinahópum, fara
á tónleika, baka piparkökur
í leikskólanum og horfa á
helgileik hjá grunnskóla-
börnunum. Svo þarf líka að
taka próf, kaupa gjafir og
jólatré, skreyta, pakka inn,
passa að enginn fari í jólaköttinn og að jólasveinninn
gleymi ekki að setja glaðning í lítinn skó, þrettán sinn-
um, og ... og ... og. Eru samt ekki örugglega allir að
njóta?
Í hausttölublaði Barna og menningar beinist kastljós-
ið einmitt að blessuðum jólunum. Ragnheiður Gests-
dóttir bregður upp mynd af jólunum og fer yfir hvernig
myndskreytingar sem tengjast þeim hafa þróast í áranna
rás. Salka Guðmundsdóttir fræðir okkur um jólalegar
leikhúshefðir á Íslandi og Englandi og Anna Þorbjörg
Ingólfsdóttir segir okkur frá jólasveinum fyrr og nú. Að
vanda er fjallað um bækur af ýmsu tagi og við fáum
fréttir af öflugu starfi Íslandsdeildar IBBY-samtakanna.
Að baki hverju jólabókaflóði liggur gríðarleg vinna
og fyrir alla þá vinnu er ég þakklát. Þakklát þeim sem
skrifa, myndskreyta, ritstýra, prófarkalesa, brjóta um,
prenta, keyra út og selja allar þessar bækur. Handtökin
eru óteljandi og vinnustundirnar líka. Fátt toppar það
að skríða undir sæng á jólanótt með bókina sem var efst
á óskalistanum og hugsa hlýtt til þess sem gaf – og þess
sem skrifaði. Þessi jólin ætla ég líka að muna eftir öll-
um hinum sem lögðu hönd á plóginn þegar ég nýt þess
að glugga í afraksturinn og senda þeim hlýjar kveðjur í
huganum.
Takk fyrir mig, ég ætla að njóta.
Frá ritstjóra
Að baki hverju
jólabókaflóði liggur
gríðarleg vinna og fyrir alla
þá vinnu er ég þakklát.
Ingibjörg Valsdóttir