Börn og menning - 2019, Blaðsíða 10
Börn og menning10
Og hvernig eru þær myndskreyttar? Sú eina sem ég
sé í fljótu bragði er bókin Jól með Láru, en myndirn-
ar í henni eru sama marki brenndar og aðrar í þeim
bókaflokki, þær eru í takt við fjölþjóðlegan iðnvarning
ætlaðan börnum og skilja ekki meira eftir sig en ann-
að í þeim geira. Ef okkur þykir æskilegt – eða jafnvel
nauðsynlegt – að börn sjái spegilmynd daglegs lífs síns
og umhverfis í bókunum sem þau fá í hendur, þyrftu
kannski fleiri að taka sig til og sýna þennan hluta til-
verunnar á skemmtilegan og vandaðan hátt, bæði í máli
og myndum. Jólaundirbúningur og jólahald nútíma-
barnsins er verðugt viðfangsefni. Kannski er það dálítið
erfitt, því að það sem er næst okkur í tíma og rúmi getur
verið viðkvæmt og vandmeðfarið. En börnin ættu að
mínu mati að fá að sjá og lesa um nútíma jólahald í bók
ekki síður en annað sem viðkemur lífi þeirra – og þá
einmitt fjölbreytilegt jólahald, því að þessi tími hefur
auðvitað ekki sömu þýðingu fyrir alla. Vonandi fáum
við að sjá eitthvað slíkt í náinni framtíð. En þangað til –
og auðvitað líka áfram um ókomna tíð, þrátt fyrir allar
góðar viðbætur – munum við njóta þess að velta okkur
svolítið upp úr nostalgíunni á þessum árstíma. Margir
tengja ennþá eplalykt við jólin þótt við getum auðvitað
gætt okkur á eplum allan ársins hring – og á sama hátt
munum við áfram taka fram Jólin koma til að fletta á
aðventunni.
Einfaldar teikningar gömlu myndlýsinganna og jóla-
kortanna sem bárust myndþyrstum börnum í hend-
ur fyrir löngu hafa ennþá áhrif á okkur. Það er ekki
fyrst og fremst vegna tæknilegrar færni myndhöfunda,
heldur þeirrar einlægni og hlýju sem myndirnar bera
með sér. Nándin og einfaldleikinn skapa ef til vill í
huga okkar ákveðið mótvægi við hið ofhlaðna, háværa
glimmerjólahald nútímans. Þarna sjáum við ímynd
hinnar gleðiríku og friðsælu samveru eitt sérstakt kvöld
í stað þeytingsins sem varir vikum saman. Eitt kyrrlátt,
stjörnubjart kvöld þar sem tíminn stendur kyrr ofurlitla
stund. Er það kannski það sem við þráum, þrátt fyrir
allt?
Höfundur er rithöfundur og myndhöfundur
Mynd eftir Brian Pilkington úr Englajólum
eftir Guðrúnu Helgadóttur.