Strandapósturinn - 01.06.1983, Blaðsíða 100

gerði sér gott af blóðinu en annað var ekki snert. Vegna aðstöðu
sáu bræðurnir sér ekki fært að láta til skarar skríða gegn rebba,
og vildu alls ekki styggja hann, ef hann átti að vinnast.
Var nú enn skotið á ráðstefnu og vildu margir fara til að reyna
að vinna á þessu skaðadýri, en margmenni var ekki heppilegt til
slíkra veiða, heldur athygli eins og hinn sanni veiðimaður hefur
til að bera. Það varð úr að þeir bræður ásamt þriðja manni
skyldu fara næsta góðan dag og reyna hvort þeim tækist að
vinna rebba. Það þarf naumast að taka það fram að þetta þótti
hinn versti gestur sem þar í sveit hafði komið og engin tilhlökkun
að vita um þetta óargadýr ganga þar í fjöllum drepandi kindur
og lömb fyrir bændunum. Þess vegna voru til fengnir bestu og
vönustu refaskyttur sem til náðist að vinna á þessu dýri.
Næsta dag var látið til skarar skríða, þrír menn tóku sig upp og
héldu á fja.ll. Langan sveig urðu þeir að fara til að forðast að
rebbi yrði þeirra var. Betúel var á sömu stöðum og áður en
allmikið nær gilinu en áður. Bróðir hans fór langt suður fyrir
gilið en fór síðan út með hlíðinni í skjóli við klettabeltið. Þriðji
maðurinn fór upp á fjallið og var á brúninni fyrir ofan og átti að
passa að rebbi færi ekki upp. Mjög varlega fóru þessir þrír menn
að öllu enda allir vanir veiðimenn. Var nú féð rekið frá bænum
eins og venjulega og að því búnu snéri fjármaðurinn heim, og er
nú allt kyrrt um sinn.
Bróðir Betúels hafði þokað sér með hægð á þær slóðir sem
rebbi fór vanalega niður hlíðina til að koma honum í opna
skjöldu. Sjá þeir nú hvar hreyfing kemur á rebba og hann leggur
á stað i rólegheitum niður hlíðina, en um miðja hlíð hefur hann
eflaust fengið einhverja nasasjón af að ekki væri allt með felldu,
því hann snýr við og hleypur upp aftur. Færið var svo langt að
ekki var viðlit fyrir manninn að skjóta þegar hann snéri við upp
aftur.
Var nú rebbi þess fullviss að hann var í hættu og fór nú ekki
rólega upp aftur. Var nú sýnilegt að hann ætlaði sér upp í fjallið
og forða sér sem lengst en áður en upp er komið verður hann var
við manninn sem er þar í fyrirstöðu og snýr við, því aðeins á
98