Veiðimaðurinn - 01.04.1987, Side 31

Þann 14. janúar s.l. andaðist á Borgar-
spítalanum í Reykjavík Björn J. Blöndal
bóndi og rithöfundur í Laugarholti í Borg-
arfirði. Utför hans var gerð frá Bæjar-
kirkju 24. janúar.
Bjöm var fæddur í Stafholtsey 9. sept-
ember 1902 og ólst þar upp, en hóf búskap
í Laugarholti 1931. Eftirlifandi kona hans
er Jórunn Sveinbjamardóttir. Synir þeirra,
Jón og Sveinbjörn, búa í Laugarholti.
Björn J. Blöndal var brautryðjandi í
íslenzkum bókmenntum um stangveiði og
skrifaði allmargar bækur, þar sem saman
fór fróðleikur um laxveiði og ýmsar lax-
veiðiár, veiðisögur, náttúrulýsingar og
þjóðlegur fróðleikur.
Fyrsta bók Björns var Hamingjudagar,
sem kom út 1950. Hún vakti verðskuldaða
athygli fyrir hugljúfa frásögn og sérstæðan
stíl. I ritdómi um bókina hér í blaðinu
sagði Víglundur Möller ritstjóri m.a.:
„Að mínum dómi er þessi bók listaverk.
Hún hefur alla þá kosti, sem úrvalsbækur
prýða: Efnið er hugðnæmt, málið fagurt,
og skáldlegt innsæi höfundarins leiðir les-
andann inn í þau undralönd fegurðar og
friðar, sem við innst inni þráum allir að
líta, eigum ef til vill sumir sjálfír í sálum
okkar, minningum og umhverfi, eins og
hann, þótt okkur skorti að jafnaði þá
skyggnigáfu, sem með þarf, til þess að
greina þau gegnum þoku hversdagsleik-
ans, sem oftast umlykur líf okkar og
störf.“
Lokaorðin í ritdómi Víglundar voru
þessi: „Ég á enga ósk betri en þá, íslenzk-
um veiðimönnum til handa, að þeir gangi
að íþrótt sinni með sem allra líkustu
hugarfari og Björn J. Blöndal. Takist þeim
að tileinka sér, þó ekki væri nema brot af
lífsskoðun hans og lærdómi, þá verða
veiðiferðir þeirra sannnefndir hamingju-
dagar.“
Meðal annarra bóka Björns J. Blöndal
má nefna: Að kvöldi dags (1952), Vina-
fundir (1953), Vatnaniður (1956), Vötnin
ströng (1972), Norðurá fegurst áa (1975)
og Svanasöngur (1976).
Björn var góður vinur blaðsins okkar,
Veiðimannsins, og skrifaði nokkrum sinn-
um greinar í það. Sú fyrsta birtist í 5. tölu-
blaði, árið 1944, en síðast skrifaði hann í
blaðið árið 1981, í 106. tölublað. Þá var að
hefjast í blaðinu greinaflokkurinn „Upp-
áhaldsflugan mín“ og átti Björn fyrsta
þáttinn í þeirri syrpu.
Nokkrum kunnum veiðimönnum hafði
verið sent bréf og þeir beðnir að segja
lesendum blaðsins frá uppáhaldsflugunni
sinni. Björn varð fyrstur til að svara.
Ahugi hans og góður hugur til blaðsins
kemur fram í upphafsorðum greinarinnar:
„Þakka bréf ykkar, sem ég fékk í gær. í
nótt varð ég andvaka, og upp úr því fór ég
að hugsa um svar mitt.“ Og svarið barst
nokkrum dögum síðar, hugljúf grein,
fallegt upphaf á nýrri þáttaröð blaðsins.
Lokaorð greinarinnar lýsa vel hinum
prúða veiðimanni og mikla náttúruunn-
anda: ,, Sumarið 1980 veiddi ég einn lax,
og á Bulldog. Það var um 14 punda hrygna
í brúðkaupsklæðum, með ótrúlega falleg
augu. Ég gaf henni líf.“
Veiðimaðurinn kveður Björn J. Blöndal
með þakklæti fyrir velvild hans til blaðsins
og fyrir bækurnar hans, sem auðgað hafa líf
íslenzkra stangveiðimanna.
M.Ó.
VEIÐIMAÐURINN
27