Veiðimaðurinn - 01.11.2008, Page 9

Langá í Staðardal
Texti og myndir: Róbert Schmidt
í utanverðum Súgandafirði er fallegur
dalur sem nefnist Staðardalur. Þar eru
jarðirnar Bær og Staður. Langá rennur
úr Vatnadal um landareign Bæjar og
einnig Þverá úr Sunddal. Langá er
aðeins 5,7 km að lengd en undanfarin
ár hefur veiðst þar nokkuð af laxi. Áin er
að mestum hluta í eigu ábúenda á Bæ.
Veiðifélag hefur nú verið stofnað um ána
og veiðidagar seldir yfir sumartímann.
Aðeins ein stöng er leyfð á dag og tveir
og hálfur dagur seldir í einu. Sumarið
2006 veiddust rúmlega 60 laxar úr ánni
að sögn Karls Guðmundssonar á Bæ
Á efra svæði árinnar er að finna
fínar bleikjur og sjóbirting. í vatninu
fyrir innan hraunið í Vatnadal eru
staðbundnar bleikjur og hafa menn
sett þar í 3-5 punda þleikjur bæði á
flugu og spón. Fróðir menn segja að
þar leynist mun stærri bleikjur. Þessi
kyrrláti dalur er gróðursæll og lognið í
Súgandafirði einstakt. Frá Suðureyri er
aðeins hálftíma gangur fyrir fjallið Spilli
og inn að Bæ þar sem Langá rennur.
Eigi menn leið um'Vestfirði er tilvalið að
skella sér gegnum Vestfjarðargöngin til
Súgandafjarðar og út í Staðardal til að
veiða lax. Karl Guðmundsson bóndi í
Bæ sér um sölu veiðileyfa.
Yfirlýsing frá
formanni SVFR
í greinargerð sem stjórn SVFR sendi frá sér
varðandi netauppkaup á Hvítár/Ölfusársvæði
og birtist í síðasta Veiðimanni var ritað að
formaður Landssambands veiðifélaga hafi beitt
sér gegn netauppkaupunum frá fyrstu tíð.
Þetta er rangt og er mér sem formanni SVFR
skylt að leiðrétta það hér með. Vil ég biðja
Óðin Sigþórsson formann Landssambands
veiðifélaga afsökunar á þessari ásökun. Okkur
getur greint á um hin ýmsu málefni og haft
mismunandi skoðanir en fullyrðing þessi er
ekki rétt.
Með kveðju
Guðmundur Stefán Maríasson
Formaður SVFR
11 '08
9