Bændablaðið - 09.02.2023, Qupperneq 28

28 Bændablaðið | Fimmtudagur 9. febrúar 2023
HURÐIR
Tunguháls 10, 110 Reykjavík, sími 567 3440, vagnar@vagnar.is, vagnar.is
• Stuttur afhendingartími
• Hágæða íslensk
framleiðsla
• Val um fjölda lita í
RAL-litakerfinu
• Vindstyrktar hurðir
Bílskúrs- og iðnaðarhurðir
Iðnaðarhurðir
Iðnaðarhurðir með gönguhurð
Bílskúrshurðir
Hurðir í trékarma
Tvískiptar hurðir
Smíðað eftir máli
Fyrsta flokks þjónusta og ráðgjöf
Þátttakan
mikilvæg
Sveinn Steinarsson, bóndi á Litla-
landi í Ölfusi, mun hætta sem
formaður deildar hrossabænda
hjá Bændasamtökum Íslands eftir
áratuga langa setu.
Hann segir tíma sinn við stjórn
Félags hrossabænda (sem síðar
varð Deild hrossabænda) hafa verið
viðburðaríkan. „Óneitanlega er
gaman að rifja upp tímamótapunkta
síðustu ára.
Má þar nefna uppfærslu dóma-
leiðarans, sumarexemsverkefni,
landssýningar og landsmótin.
Samhliða því hafa orðið miklar
framfarir í greininni, hrossin eru
sífellt að verða betri og jafnari,“
segir Sveinn. Þá nefnir hann
markaðsverkefnið Horses of Iceland.
„Þegar við fórum í þá vegferð
hafði markaðsstarf á íslenska
hestinum ekki verið stundað með
markvissum hætti. Þarna komu
saman í eitt lið hagsmunaaðilar, s.s.
við hrossabændur, Landssamband
hestamannafélaga, Félag tamn-
ingamanna, Feif, aðilar frá
ferðaþjónustunni og fjölmargir aðrir,
sem settu sér langtímamarkmið
og fjármögnuðu verkefnið sem
hófst 2015 og er samningsbundið
til ársloka 2025. Það er alls ekki
sjálfgefið að verkefnið hafi farið af
stað og eldist svona vel.“
Hann segir að árangur verk-
efnisins endurspeglist m.a. í meiri
sölu reiðhrossa úr landi og aukinni
ásókn ferðamanna hér á landi í
hestaferðir. „Verkefnið er einnig
okkar helsti samnefnari þegar
við kynnum hestinn erlendis og
á samfélagsmiðlum verkefnisins
getum við komið okkar áherslum
að á hverjum tíma,“ segir Sveinn.
Aðkoma hrossabænda
að búvörusamningum
Lausnir við tíðni sumarexems
í útfluttum hrossum er eitt af
stórum hagsmunamálum Deildar
hrossabænda.
„Síðasta áratug hefur farið
mikil vinna og fjármagn í víðtækar
rannsóknir á mögulegri forvörn gegn
ofnæminu enda mikið velferðarmál
fyrir hestinn erlendis að það takist
að finna úrræði sem dugir gegn
exeminu. Það var fyrst og fremst
fyrir tilstilli Félags hrossabænda
að það náðist að útvega hross í
samanburðarrannsókn á mögulegu
mótefni. Fyrsta formlega kynning
á niðurstöðum hennar verður á
búgreinaþinginu,“ segir Sveinn.
Hann segir að stærsta mál
hrossabænda á þinginu verði
umræður um raunverulega og
beina aðkomu þeirra að búvöru-
samningum. „Við munum taka
okkur tíma til að ræða það og kynna
hugmyndir okkar. Vonandi fæðast úr
þeim umræðum frekari hugmyndir
og þá ályktun.“
Hvetur til framboða
Milli 400-500 bændur eru skráðir
í Deild hrossabænda og geta allir
fullgildir meðlimir boðið sig fram
í stjórn félagsins. Sveinn hvetur þá
sem vilja láta sig málefni íslenskra
hesta varða að gefa kost á sér.
„Stærsta áskorun nýrrar stjórnar
er að efla félagsstarfið og ná betur
til félaganna. Félagskerfið hefur
gengið í gegnum meiri breytingar
en mönnum hafði órað fyrir
þegar ákveðið var að leggja af
búnaðargjaldið. Það er mikilvægt
að fólk sem hefur hagsmuni taki þátt
í félagsstarfinu, það er alltof ódýrt
að sitja bara hjá og gagnrýna.“
Sveinn mun ekki sitja auðum
höndum þrátt fyrir að hann víki
nú úr formannsstólnum. „Ég hef
miklu meira en nóg að gera í mínu
fyrirtæki,“ segir Sveinn en hann
rekur ásamt konu sinni iðnaðar-
og þjónustufyrirtækið Svamp ehf.
auk þess að vera með 40 hross að
Litlalandi í Ölfusi.
„Ég vil þakka stjónarfólki mínu
fyrir samstarfið gegnum árin sem og
þeim fjölmörgu sem ég hef kynnst
og starfað með að hagsmunum
hrossabænda á sinni vakt.“
Nýr formaður Deildar hrossa-
bænda verður kosinn á búgreinaþingi
þann 22. febrúar næstkomandi
og hefur venjan hefur verið sú að
formaður búgreinadeildarinnar
er jafnframt formaður fagráðs í
hrossarækt. Síðasti skráningardagur
á búgreinaþingið er þann 15. febrúar
næstkomandi. Allir fullgildir félagar
í Deild hrossabænda eru gjaldgengir
á fundinn. /ghp
Sveinn Steinarsson, fráfarandi formaður Deildar hrossabænda, mun ekki
sitja auðum höndum að búgreinaþingi loknu. Mynd / H.Kr
Búgreinaþing:
Tveir fráfarandi formenn
– Sveinn Steinarsson og Anna María Flygenring hætta formennsku í búgreinadeildum sínum
Anna María Flygenring gefur
ekki kost á sér til að gegna áfram
formennsku í búgreinadeild
geitfjárræktenda og því verður nýr
formaður kosinn á búgreinaþingi
Hún segir að ýmislegt hafi
áunnist á þeim árum sem hún hafi
verið formaður, það fjölgi til að
mynda örlítið í stofninum og svo sé
fólk byrjað að líta á geitaafurðir sem
góða matvöru.
„Þetta eru að verða fimm ár
síðan ég var kosin formaður í
Geitfjárræktarfélagi Íslands, þar á
undan var ég ritari í eitt ár. Ég ætlaði
alls ekki að lenda í stjórn þótt ég
mætti á eins og einn aðalfund. En fyrir
hvatningu góðs fólks samþykkti ég að
gefa kost á mér í formennsku í eins
og eitt ár á meðan fyndist formaður
sem tæki verkefnið föstum tökum. En
stuttu seinna dundu yfir breytingar
á félagskerfi Bændasamtaka Íslands
og á þeim tíma var margt að gerast
í endurskipulagningu og fannst mér
vont að fara úr stjórn á þeim tíma,“
segir Anna María.
Heppin með samstarfsmenn
Að sögn Önnu Maríu er
breytingarskeið félagskerfisins nú
komið vel á veg og því fari hún
mjög sátt frá borði. „Ég hef verið
heppin með samstarfsmenn, enda
byggist starf í okkar deild á hugsjón
og miklum áhuga.
Auðvitað eru endalaus verkefni,
og við eigum mikið verk fram undan
en við höfum smátt og smátt náð
þeim árangri að nú er fólk byrjað að
líta á geitaafurðir sem góða vöru,“
segir hún.
Að sögn Önnu Maríu er staðan í
íslenskri geitfjárrækt sú að það fjölgar
örlítið í stofninum. „Geitabændur eru
auðvitað háðir því að fá tekjur, sem
greiðast í gegnum gripagreiðslur. Þær
þurfa að hækka verulega ef greinin á
að standa undir sér. Við bindum vonir
við að matvælaráðuneytið standi með
okkur í búvörusamningum sem eru að
fara í endurskoðun. Það er eftirspurn
eftir afurðunum og sérstaklega
mjólkurafurðum og kjöti – og ekki
er hægt að fá kjöt eða mjólk sem
hefur minna kolefnisspor ef farið
er út í þá sálma. En öll uppbygging
er dýr og það þyrfti að koma til
stuðningur til að fleiri setji á stofn
mjólkurframleiðslu eða ostagerð.
Það var á verkefnaskrá okkar á
síðustu árum að koma geitinni inn
í Slow Food verkefnið [Presidia]
sem Dominique Plédel leiddi og var
á góðri leið með, en talsverð vinna
var lögð í það. Eitthvað strandaði
við stjórnarskipti í Slow Food en
vonandi kemst það aftur á skrið.
Við reyndum að fá breytingu á
reglugerð um hrámjólk til ostagerðar
vegna skilyrða Slow Food en öll
ostagerð innan þeirra samtaka notar
ógerilsneydda mjólk.
Hér eru hins vega stífar
reglugerðir og ekki hefur fengist
breyting þar á. Þetta er eitt af óloknu
verkefnunum,“ segir Anna María.
Lagfæringar á Heiðrúnu
„Við höfum líka verið að reyna
að fá lagfæringar á Heiðrúnu,
skráningarforritinu okkar, en það
hefur gengið afar hægt. Forritið er
eins konar þýðing á Fjárvís og koma
iðulega upp hrútar og gimbrar þegar
átt er við hafra og huðnur – og fleiri
vandkvæði í þeim dúr mætti nefna.
En nýjustu fréttir segja að það sé nú
komið af stað og verða lagfæringar
komnar inn í vor. Ég vona að ég megi
treysta því, þetta hefur farið verulega
í taugarnar á geitabændum öllum.
Nú í vetur hafa verið að fæðast
kiðlingar á stöku stað, ekki alveg
planað að byrja geitburð snemma
en það er alltaf fjör þegar ungviðið
er farið að spretta úr spori. Fátt gleður
meira en að sjá myndir af þessum
fjörkálfum þegar úti geisar stormur
og él.
Ég óska öllum geitabændum alls
hins besta og held áfram að fylgjast
með og sinna mínum geitum sem
best,“ segir Anna María að lokum.
/smh
Anna María Flygenring, fráfarandi formaður búgreinadeildar geitabænda.
Mynd smh
Fer sátt frá borði
Í DEIGLUNNI