Skinfaxi - 01.01.2022, Qupperneq 15
S K I N FA X I 15
allar vorum við þá heimavinnandi, og spurði hvort við gætum ekki
hjálpað sér, hún væri alein eftir því að allir aðrir væru að hætta í stjórn-
inni. „Jú, jú, sögðum við. Við hljótum að geta hjálpað.“ Við áttum sem
sagt allar dætur í fimleikum. Þannig byrjaði það.“
Ætla ekki að heita neitt í stjórninni
Anna segist eiginlega aldrei hafa verið kosin í stjórn fimleikadeildarinnar.
„Á þessum tíma voru stjórnir deildanna bara skipaðar einhverju áhuga-
sömu fólki. Ég sagði einmitt við þessa vinkonu mína: „Ég ætla ekki að
heita neitt í þessari stjórn. Ég hef aldrei starfað í félagi, þannig að ég
veit ekkert um það. Ég get hjálpað til en ég ætla ekki að heita neitt í
stjórninni.“
Svo leið og beið og starfsmaður aðalstjórnar og formaður voru farnir
að hringja í mig út af alls konar hlutum. Ég endaði á því að spyrja þá:
Af hverju eruð þið að hringja í mig? Ég veit ekkert um þetta. Ég sagðist
vera bara nýbyrjuð. Þeir sögðu að enginn vildi vera formaður og að ég
héti Anna og það væri bara langbest að ég væri formaðurinn. Það var
af því að ég var fremst í stafrófinu. Þannig æxlaðist það að ég var bara
allt í einu orðin formaður fimleikadeildarinnar áður en ég vissi af. Ég var
það síðan til 1991 en þá var ég kosin formaður aðalstjórnar Stjörnunnar.“
Bárum áhöldin út og inn fyrir og eftir æfingar
„Starfið á þessum árum gekk mest út á að reka deildina,“ segir Anna.
„Við þurftum m.a. að ráða þjálfara og innheimta æfingagjöld. Ég man
nú ekki alveg hve oft deildin æfði á þessum tíma, enda deildin ný og
aðstaðan ekki góð, en við vorum mikið í því að bera áhöld inn og út
fyrir og eftir hverja æfingu. Þetta gekk mest út á að halda utan um
praktíska starfið.“
Formaður Stjörnunnar 1991
Hvernig kom það til að þú varst kosin formaður aðalstjórnar Stjörnunnar?
„Ég veit svo sem ekki af hverju það kom til. Einhver umræða hafði
átt sér stað og það var ljóst að það yrði skipt um formann. Svo var bara
hringt í mig og ég spurð hvort ég væri tilbúin að taka það að mér. Sem
hlýtur að þýða að ég hafi staðið mig sæmilega vel í því sem ég var að
gera áður. Ég var svo kosin þarna 1991 en var ekki formaður nema í þrjú
ár, til 1994. Ég var önnur konan til að gegna þessu embætti. Katrín
Gunnarsdóttir var fyrsti kvenformaðurinn. Það var einn formaður á
milli okkar.“
Frekjudósin í fimleikadeildinni
Hver voru helstu verkefni Stjörnunnar á þessum árum sem þú varst
formaður?
„Á þessum tíma var verið að byggja við íþróttahúsið Ásgarð, sem er
körfuboltasalurinn í dag. Áður var einn íþróttasalur í Ásgarði en síðan
var sá hluti hússins sem var í byggingu alltaf kallaður nýi salurinn. Inn-
gangurinn í sundlaugina er í dag á milli gamla og nýja salarins. Það var
alltaf mikil barátta um tíma fyrir æfingar en fimleikadeildin átti að fá
afnot af nýja salnum. Á þessum árum var verið að byrja að byggja fim-
leikagryfjur. Fimleikafélagið Björk í Hafnarfirði var fyrsta félagið sem
fékk gryfju. Fyrst var rætt um hvort þessi félög gætu sameinast um
gryfju, þ.e. að byggja sameiginlegt hús fyrir félögin því það væri svo
stutt á milli þeirra. Það var nú ekki vilji fyrir því. Við í stjórninni fórum og
fengum stuðning nokkurra öflugra félagsmanna um að þrýsta á bæjar-
félagið að lengja húsið þannig að það væri hægt að setja gryfju í end-
ann. Ég átti kannski ekki að vita af því, en á þessum tíma var ég stund-
um kölluð „frekjudósin í fimleikadeildinni“. Það þurfti auðvitað að breyta
ýmsu og þetta var alls ekki gryfja af bestu gerð. Hún gerði samt alger-
lega sitt gagn. Á þessum tíma vorum við með fimleikaþjálfara af guðs
náð, Guðni Sigfússon heitir hann. Hann smíðaði stökkbrautir og stökk-
bretti og var í því að hjálpa okkur að útbúa svampinn í gryfjuna og allt
þetta. Þetta var allt mjög heimilislegt. Það var ekki lagt í verulegan
kostnað við þetta,“ segir Anna.
Félagsheimilið mikil lyftistöng
Þegar Anna var formaður aðalstjórnar var töluvert verið að taka á fjár-
málum félagsins, eins og oft hefur verið gert. Hún segir að það hafi ver-
ið stærstu málin, þ.e. að gera tilraunir til að múlbinda deildirnar. Þær
þurftu að bera allar meiriháttar fjárfestingar undir aðalstjórn. „Annað
sem var félagslega mjög gott var að það var byrjað á því að byggja
félagsheimilið. Það var reyndar byrjað á því áður en ég tók við sem
formaður. Það var mikil lyftistöng þegar félagsheimilið var risið.“
Fyrstu kynnin af UMFÍ á Landsmótinu á Húsavík
Á formennskutímanum í fimleikadeildinni kynntist Anna starfi UMSK
og þá einkum í tengslum við samstarf við Gerplu í Kópavogi. Félögin
fóru t.d. á Landsmótið á Húsavík með eitt sýningarlið frá Stjörnunni og
Gerplu undir merkjum UMSK. Anna segir að það hafi verið sín fyrstu
kynni bæði af landsmótum og UMSK. „Á þessum tíma þegar ég var í
fimleikadeildinni var ég í nefnd hjá UMSK í eitt tímabil. Það stóð til að
ég færi á þing UMFÍ á Húnavöllum en það kom eitthvað upp og ég
komst ekki. Fyrsta UMFÍ-þingið sem ég fór á var í Kópavogi 1997 en
þá var ég kosin í varastjórn UMFÍ.“
Framkvæmdastjóri Fimleikasambandsins
Anna tengdist starfi Fimleikasambandsins um árabil og varð síðan
framkvæmdastjóri þess. Hún var spurð hvernig það hefði komið til.
„Það byrjaði þegar ég var formaður fimleikadeildar Stjörnunnar, en
þá tengdumst við inn í Fimleikasambandið. Á árunum 1994 til 1996
var ég í stjórn Fimleikasambandsins. Árið 1996 var fyrirséð að það yrðu
breytingar á stjórn og þá var ég fengin til að taka að mér starf fram-
kvæmdastjóra. Því starfi gegndi ég til 2007.“
Anna hóf störf hjá Evrópu unga fólksins árið 2007. Síðar varð verkefnið
að Erasmus+ áætluninni. Hér er hún með Ólafi Árnasyni sem stýrði verk-
efninu fyrsta árið áður en Anna tók við.
Anna og Kristján Elvar Yngvason voru gerð að heiðursfélögum UMFÍ á sam-
bandsþingi UMFÍ í október 2021.