Golf á Íslandi - 01.10.2011, Blaðsíða 25

brenndi hins vegar af úr púttinu sem virtist vera
formsatriði. Í kjölfarið kom reiðarslag á 14. holu þegar
hann fékk skolla eftir að hafa slegið teighöggi sínu
í brautarglompu. Í kjölfarið var hann nú einu höggi
frá því að tryggja sig áfram í gegnum niðurskurðinn
og aðeins fjórar holur eftir. 15. holan virtist vera hið
fullkomna tækifæri til að vinna hið mikilvæga högg
til baka en slæmt teighögg varð til þess að Ólafur
þurfti þrjú högg til að komast inn á flöt og tvípúttaði
svo fyrir pari. Nú var ljóst að Ólafur yrði að vinna eitt
högg til baka á einni af þremur síðustu holunum til
að tryggja sig áfram. Pressan var á Ólafi sem kom
sér í fuglafæri á öllum þremur holunum en ekki vildi
boltinn niður þrátt fyrir góðar tilraunir á 16. og 17.
holu.
Ólafur lék seinni hringinn á 70 höggum og samtals á
tveimur höggum undir pari. Hann varð einu höggi frá
því að komast í gegnum niðurskurðinn.
Í raun var það grátleg niðurstaða fyrir Ólaf að komast
ekki áfram því hann sló gríðarlega vel í mótinu og á
öðrum degi hefði hann líklega flogið í gegnum niður-
skurðinn. Að venju er stutta spilið sterkasta hlið Ólafs
en í Wyndham mótinu voru púttin hreinlega ekki
að detta. Púttafjöldinn segir líka sína sögu enda var
Ólafur með yfir 30 pútt á báðum hringjum. Það var
hins vegar hrein unun að fylgjast með okkar manni
í mótinu sem tók mótlætinu á 18. flöt að loknum
öðrum hring með bros á vör. Frammistaða hans í
mótinu fyllir von í brjósti íslenskra golfáhugamanna
að nú styttist í að við eignumst kylfing í fremstu
röð og að við séum sífellt að nálgast stærstu þjóðir
heims í þessari vinsælu íþrótt.
Ólafur stóð sig einnig frábærlega í viðtölum við
bandarísku fjölmiðlapressuna í mótinu og líklega
eru talsvert fleiri golfáhugamenn í Bandaríkjunum
sem nú kannast við Ísland eftir frammistöðu Ólafs í
Greensboro.
„Þetta var ótrúleg upplifun og ég naut þess til hins
ýtrasta að keppa í þessu móti. Það er frábær til-
finning að leika á meðal bestu kylfinga heims og
ég lærði mikið á þessari viku,“ segir Ólafur Björn
Loftsson þegar hann er beðinn að líta til baka á
þessa ótrúlegu viku þegar hann lék ásamt mörgum
af bestu kylfingum heims. Þessi 24 ára kylfingur úr
Nesklúbbnum vann sig inn í hug og hjörtu íslensku
þjóðarinnar með frábærri frammistöðu í Wyndham
mótinu á PGA-mótaröðinni og var grátlega nálægt
því að komast í gegnum niðurskurðinn í mótinu. Í
viðtali við Golf á Íslandi segist Ólafur ætla að leggja
allt í sölurnar til að upplifa atvinnudrauminn að
loknu háskólanámi.
„Ég var mjög nálægt því að komast áfram en ég sé
ekki eftir neinu. Ég spilaði mjög vel en stundum þá
vilja púttin hreinlega ekki detta. Það er alltaf hægt
að segja ‚ef og hefði‘ í golfi en að sjálfsögðu hefði
verið mjög gaman að setja niður nokkur af þessum
góðu fuglafærum á öðrum hring og jafnvel blanda
sér í baráttuna um sigurinn í mótinu,“ segir Ólafur
sem er mjög sáttur með frammistöðu sína í mótinu.
„Ég var að spila yfirvegað og gott golf. Það vantaði
aðeins herslumunninn að ég næði að klára dæmið
aðeins betur. Ég var að pútta vel þótt að púttin
væru ekki að detta, sérstaklega á seinni hringnum.
Það voru margir jákvæðir þættir sem ég get tekið úr
mótinu og mun byggja ofan á í fyrir framtíðina.
„Á heima á meðal þeirra bestu“
Frammistaða Ólafs í mótinu var frábær. Hann sló
boltann einkar vel og kom sér í fjölda fuglafæra.
Hann segist vera með mikið sjálfstraust eftir mótið.
„Sigurinn í Cardinal mótinu og frammistaða mín
í Wyndham mótinu hefur gefið mér aukið sjálfs-
traust. Ég hef mikla trú á því sem ég er að gera og
er sannfærður um að ég eigi heima á meðal bestu
kylfinga heims. Mér leið vel í kringum þessa kappa
og þessi vika á bara eftir að styrkja trú mína og
auka sjálfstraustið. Ég geri mér grein fyrir því að
leiðin er löng og ströng en ég er tilbúinn að leggja
allt í sölurnar til að upplifa drauminn,“ segir Ólafur
sem fékk gríðarlega athyli erlendra golffjölmiðla í
mótinu sem að eigin sögn kom honum á óvart.
„Það kom mér svolítið á óvart hversu mikla athygli
ég fékk á meðan á mótinu stóð. Ég er bara himin-
lifandi með að geta hjálpað til við að koma landi
og þjóð enn frekar á kortið í golfheiminum. Ég fékk
meiri athygli í Charlotte háskólanum eftir mótið
sem var mjög gaman þó ég gengi ekki svo langt að
segja að ég væri eins og rokkstjarna í skólanum,“
segir Ólafur léttur í lund.
„Þátttaka mín í þessu móti opnar margar dyr en dag-
skráin mín er mjög þétt í vetur með Charlotte há-
skólanum þannig að ég mun einbeita mér að þeim
verkefnum. Ég skoða þó alla möguleika vel en strax
þegar ég útskrifast í vor þá þarf ég að taka ákvarð-
anir og ég hlakka mikið til þess. Ég geri miklar kröfur
og er sannfærður um að ég muni halda áfram að
bæta mig og ná góðum árangri. Ég hef mikla trú á
liðinu okkar í háskólagolfinu og býst við mjög góðu
lokaári.“
„Ætla að leggja allt í sölurnar
fyrir atvinnudrauminn“
Fréttamaður Golf
Channel tók viðtal
við Ólaf Björn.
Stöðin sýndi frá
mótinu .
25