Golf á Íslandi - 01.10.2011, Blaðsíða 8

Leikhraði
Leikhraði er orðinn verulegt vandamál á mörgum golfvöllum hér á landi og reyndar
erlendis líka. Hér þykir það orðið eðlilegt að 18 holu hringur taki 5-6 klukkustundir.
Allir eru sammála um að það sé alltof langur tími fyrir golfhring. En hvað er til ráða?
Á nokkrum golfvöllum á Bretlandi er eingöngu leyft að leika tveimur boltum í holli,
tveir og tveir kylfingar með einn bolta leika saman gegn öðru liði eða þá að tveir stakir
leika sinn hvorn boltann. Þannig tekur ekki nema um 3 klst. að leika 18 holur. Sumir
eru aðeins mildari með þetta og leyfa fjóra bolta í holli bara hluta dagsins.
Þetta er erfitt mál á mest sóttu golfvöllunum á höfuðborgarsvæðinu á háannatíma.
Þar er verið að koma til móts við félganna um að komast í golf þegar félagarnir í
klúbbnum eru kannski 3 þúsund og vellirnir í eigu klúbbsins aðeins tveir. En kannski
er hægt að finna leið. Tveir spila hraðar en þrír eða fjórir og því væri hægt að koma
fleiri slíkum hópum inn á völlinn og hringurinn tæki ekki heila eilífð. Fyrirmyndirnar,
atvinnumennirnir sem við horfum á í sjónvarpinu eru vissulega ekki góðar. Það er orðið
verulegt vandamál hvað kylfingar taka langan tíma. Og það gerist hér heima á sama
tíma og punktakeppni er allsráðandi. Þá leyfist kylfingum að taka upp boltann ef þeir
eru búnir með mörg högg og geta ekki lengur fengið punkt á holuna. En gera það í lang
fæstum tilfellum. Fjarlægðamælar virðast ekki hafa flýtt leik, síður en svo. Sumir eru
alltof lengi að mæla. Áður fyrr litu þeir á 100 eða 150 m mælinguna og skutu svo í hug-
anum á lengd. Ákváðu þannig kylfuna. Víst er að ástæðurnar eru margvíslegar en það er
ljóst að taka þarf á þessu vandamáli fyrr en síðar.
Sumarið hefur gengið vel á heildina litið enda veðurfar mjög gott sunnan- og vestan-
lands en verra fyrir austan og norðan. Mótahald hefur verið gríðarlega viðamikið
og gróskan enn í íþróttinni hér á landi á meðan ekki er sömu sögu að segja víða
erlendis. Hér er ekki hægt að sleppa því að minnast á árangur Ólafs Björns Lofts-
sonar á Wyndham mótinu á PGA mótaröðinni. Hann var einkar ánægjulegur þó svo
að kappinn hafi verið hársbreidd frá því að komast í gegnum niðurskurðinn. Ólafur
sýndi að það er styttra í atvinnumannadrauminn en marga grunar. Það væri frábært
fyrir íþróttina hér á landi ef einhver okkar kylfinga ynni sér þátttökurétt á PGA eða
Evrópumótaröðina. Birgir Leifur og Ólafur Björn hafa sýnt að þetta er hægt þótt erfitt
sé. Vonandi verður þessi frammistaða Ólafs í sumar til þess að GSÍ og fleiri aðilar hugi
að því hvernig megi styðja við okkar bestu kylfinga svo þeir eigi auðveldara með að ná
þessu markmiði. Það er hagur fyrir íþróttina hér á landi því afreksfólkið á stóran þátt í
því að ungmenni velji golf sem sína framtíðaríþrótt.
Að venju fjöllum við um stærstu mót sumarins í haustblaðinu, Íslandsmótin,
sveitakeppnir og fleiri stór mót. Þó nokkuð sé liðið frá sumum mótanna er verið að
huga að sögulega þættinum í útgáfu Golfs á Íslandi. Í því sambandi má nefna að verið
er að vinna að sögu íþróttarinnar á Íslandi og verður hún gefin út á 70 ára afmæli GSÍ á
næsta ári.
Njótum haustsins og notum góðu dagana til golfiðkunar.
Páll Ketilsson, ritstjóri.
www.askrift.is er viðurkenndur söluaðili áskrifta á Íslandi
NÚ GETUR ÞÚ FENGIÐ ÖLL HELSTU
GOLFBLÖÐIN Í ÁSKRIFT
MISSIR EKKI AF EINTAKI
FÆRÐ BLAÐIÐ SENT HEIM AÐ DYRUM
SPARAÐU ALLT AÐ 49%
R I T STJÓRA
pistill
8