Morgunblaðið - 20.02.2006, Blaðsíða 11

MORGUNBLAÐIÐ MÁNUDAGUR 20. FEBRÚAR 2006 11
FRÉTTIR
EYÞÓR Arnalds sigraði í
prófkjöri sjálfstæðismanna í
Árborg sem fram fór á laug-
ardaginn var. Hlaut hann
593 atkvæði í fyrsta sætið.
Þórunn Jóna Hauksdóttir
fékk 295 atkvæði í 1.–2. sæti
og Snorri Finnlaugsson 411
atkvæði í 1.–3. sæti. Alls
kusu 1.087 í prófkjörinu en
nýskráningar í Sjálfstæð-
isflokkinn voru á sjötta
hundrað.
„Ég er mjög ánægður með
þetta traust sem allur hóp-
urinn er að fá og ég sjálfur
persónulega. Þátttakan í
prófkjörinu er ótrúleg, fé-
lagaskráin hefur tvöfaldast
og við höfum mikinn byr í
seglunum. Listinn end-
urspeglar mikla breidd og
hefur mikla skírskotun til
Árborgarbúa,“ sagði Eyþór
Arnalds í samtali við frétta-
vefinn mbl.is.
Eyþór sagði mikla vinnu
framundan hjá sjálfstæð-
ismönnum. Nú eru þeir með
tvo af níu bæjarfulltrúum, en
Samfylkingin og Framsókn-
arflokkurinn eru í meirihluta
bæjarstjórnar. „Eitt var að
vinna og svo er að vinna og í
vor ætlum við að vinna,“
sagði Eyþór.
Eyþór Arnalds sigraði í Árborg
Ljósmynd/Guðmundur Karl
Þrjú efstu í prófkjörinu fagna sigri. F.v.: Þórunn Jóna Hauks-
dóttir, Eyþór Arnalds og Snorri Finnlaugsson.
JÓHANNES Bjarnason bæj-
arfulltrúi fékk fyrsta sæti í
prófkjöri Framsóknarflokks-
ins á Akureyri, sem haldið var
á laugardaginn. Jóhannes
fékk 296 atkvæði í 1. sæti,
Gerður Jónsdóttir bæjar-
fulltrúi 287 atkvæði í 1.–2.
sæti og Erla Þrándardóttir
fékk 272 atkvæði í 1.–3. sæti.
„Ég er bæði stoltur og
ánægður með minn árangur
og ekki síður með listann, sem
er geysilega sterkur,“ sagði
Jóhannes þegar úrslitin lágu
fyrir. „Ég óttast ekki and-
stæðingana, það sem verður
okkur erfiðast er staða flokks-
ins í landsmálunum sem er
langt undir því sem hann á
skilið. En við svörum því bara
með harðri kosningabaráttu.“
Jóhannes telur að það sé
viðurkenning fyrir störf
þeirra bæjarfulltrúanna í
bænum að þau Gerður hafi
orðið í tveimur efstu sætun-
um. Gerður Jónsdóttir sagði
úrslitin vera sigur kvenna.
Sex konur gáfu kost á sér í
prófkjörinu og þrjár þeirra
urðu á meðal sex efstu, Gerð-
ur og nýliðarnir Erla Þránd-
ardóttir og Petrea Ósk Sig-
urðardóttir sem varð í 6. sæti.
Framsóknarflokkurinn á
nú þrjá bæjarfulltrúa af 11 í
bæjarstjórn Akureyrar.
Flokkurinn myndar meiri-
hluta með Sjálfstæðisflokki.
Morgunblaðið/Skapti Hallgrímsson
Bæjarfulltrúinn Jóhannes Bjarnason, til vinstri, klappar fyrir
nýliðanum Erlingi Kristjánssyni sem varð í fjórða sæti. Við
hlið Erlings er eiginkona Jóhannesar, Kristín Hilmarsdóttir.
Jóhannes efstur í prófkjöri
Framsóknar á Akureyri
BJÖRN Þorri Viktorsson, formaður
Félags fasteignasala, segir hið háa
verð á einbýlishúsalóðum í landi Úlf-
arsárdals hafa komið sér nokkuð á
óvart. Þannig sé verðið nokkuð
hærra en almennt gerist í lóðaútboð-
um en einstaka lóðir hafi þó verið að
seljast á hærra verði.
„Ég tel sjálfur að þetta séu góðar
lóðir til framtíðar [...] og hafi ým-
islegt við sig til lengri tíma litið. Hins
vegar á ég ekki von á því að almenna
verðið á sérbýlishúsum sé svona
gríðarlega hátt,“ segir Björn Þorri
og bendir á sölu lóða í Arnarneslandi
í Garðabæ til samanburðar. Þar selj-
ist einstaka lóð á mjög háu verði en
meðaltalið sé ekki svo hátt og í því
tilviki sem hér um ræðir.
„Það getur verið að menn séu að
misreikna hina raunverulegu eftir-
spurn líkt og gerðist í Grafarholti.
Þar gerðu byggingarmenn ráð fyrir
að verðið yrði hærra og eftirspurnin
meiri en raun varð á og því urðu
margir illa úti.“
Björn Þorri
segir að þetta geti
átt sér stað aftur.
Þannig sé mark-
aðurinn ekki í
eina átt um alla
framtíð. Hækk-
anirnar séu
dregnar áfram af
efnahagslegum
stöðugleika og
þeim góða kaup-
mætti sem nú er í landinu en það sé í
raun meginforsendan fyrir því að
fasteignaverð haldist stöðugt.
„Það er mikið að
gerast í lóðamálum“
„Byggingarmenn veðja á að það
verði áfram hátt verð og hækkandi á
sérbýli. Ef þetta er orðið eðlilegt
verð [um 20 milljónir fyrir einbýlis-
húsalóð] er það talsvert hærra en áð-
ur hefur sést. Menn hljóta þá að
reikna með hærra verði í framtíðinni
en það ræðst af markaðsástandinu á
hverjum tíma.“
Að mati Björns Þorra er verðið á
einbýlishúsalóðunum í landi Úlfars-
árdals nokkuð hátt að teknu tilliti til
þeirra framkvæmda sem nú eru í
farvatninu á höfuðborgarsvæðinu. Í
því sambandi sé hægt að líta til
Norðlingaholts, Úlfarsárdals og
Mosfellssveitar, þar sem gert er ráð
fyrir lóðum í Leirvogstungu, Helga-
felli og Blikastaðalandi. Þá sé aukið
framboð á lóðum í Garðabæ í
Arnarneslandi og Urriðaholti. Auk
þessa eigi mikil uppbygging sér stað
í Hafnarfirði og Kópavogi en lóðir
séu einnig lausar á Seltjarnarnesi.
„Það er mikið að gerast í lóðamál-
um og heilmikið fram undan. Það er
ekki eins og það sé ekkert framboð.“
Björn Þorri segir að þegar lóðum
sé úthlutað eða um þær dregið
myndist ekkert markaðsverð. Það sé
hins vegar hægt að finna markaðs-
verð þegar efnt er til útboðs.
„Í úthlutunum eða happdrætti eru
menn ekki að leita að markaðsverði.
Að því leytinu til er grundvallarmun-
ur á þessum aðferðum,“ segir Björn
Þorri en hann telur að skortur á lóð-
um og svokallað lóðabrask sé fráleitt
eina ástæðan fyrir háu fasteigna-
verði í Reykjavík.
Telur verð einbýlishúsalóða í Úlfarsárdal nokkuð hátt að teknu tilliti til framkvæmda á höfuðborgarsvæðinu
Hærra verð en
almennt gerist
Eftir Þóri Júlíusson
thorirj@mbl.is
Björn Þorri
Viktorsson
ALFREÐ Þorsteinsson, forseti
borgarstjórnar, segir það vel koma
til greina að endurskoða útboð á
lóðum í landi
Úlfarsárdals í
ljósi þess að sami
aðili hafi átt
hæsta tilboðið í
39 af 40 einbýlis-
húsalóðum á
svæðinu.
Í samtali við
Morgunblaðið í
gær sagði Alfreð
að þessi nið-
urstaða væri í algerri andstöðu við
það sem lagt var upp með með út-
boðinu. Þannig hafi ásetningur
borgaryfirvalda staðið til þess að
einstakar fjölskyldur gætu boðið í
lóðirnar en ekki að einn aðili,
verktaki, gæti keypt þær allar.
„Það verður farið yfir þetta mál
í vikunni og það skoðað hvaða leið-
ir eru færar. Þannig þarf það ekki
að vera endanleg niðurstaða að
þessi einstaklingur sem átti hæstu
tilboðin fái lóðirnar.“
Spurður um ágæti þeirrar að-
ferðar sem notuð var sagði Alfreð
að lóðaúthlutanir væru ávallt erf-
iðar og væru gagnrýndar án tillits
til þeirrar aðferðar sem notuð væri
hverju sinni.
„Þegar menn fara þá leið að
draga um lóðirnar eins og gert var
með lóðirnar í Lambaseli fá við-
komandi ákveðin gæði langt undir
markaðsverði. Versta leiðin er hins
vegar sú að stjórnmálamenn séu
sjálfir að úthluta lóðum eins og í
Kópavogi þar sem pólitíkusar út-
hluta vinum og vandamönnum lóð-
um [...]. Með útboðum fá menn hins
vegar hið rétta verð á þeirri vöru
sem verið er að bjóða.“
Að mati Alfreðs er ekki hjá því
komist að fara útboðsleiðina ef rétt
verð á að fást fyrir lóðirnar enda
sé sú leið langheilbrigðust. Þrátt
fyrir það verði að huga að því að
hver aðili fái ekki meira en eina
lóð.
Í andstöðu við
það sem lagt
var upp með
Alfreð
Þorsteinsson
STEINUNN Valdís Óskarsdóttir,
borgarstjóri í Reykjavík, segir að
þeirri niðurstöðu, að einn og sami
einstaklingurinn,
sem er verktaki,
hafi átt hæsta til-
boðið í 39 af 40
einbýlis-
húsalóðum sem
boðnar voru út í
landi Úlfars-
ársdals, verði
ekki unað.
„Markmiðið
með þessari að-
ferðarfræði er að
gefa einstaklingum kost á því að
byggja yfir sig og sína fjölskyldu.
Það er því ljóst að þessi niðurstaða
gengur gegn markmiðum útboðs-
reglnanna,“ segir Steinunn Valdís
en hún telur einsýnt að borgaryf-
irvöld fari eftir þeim fyrirvörum
sem er að finna í útboðsskilmál-
unum.
„Við munum að sjálfsögðu nota
okkur þessa fyrirvara. Til þess höf-
um við fulla heimild ef markmiðum
útboðsins er ekki náð en þeim er
ekki náð með þessu.“
Þrátt fyrir að niðurstaða útboðs-
ins hafi ekki verið í samræmi við
þau markmið sem að var stefnt tel-
ur Steinunn Valdís að það hafi ekki
misheppnast.
„Að mínu mati eru tvær réttlátar
aðferðir við að ráðstafa lóðum.
Annars vegar að ákveða fast verð
og draga úr potti líkt og gert var
með lóðirnar í Lambaseli og hins
vegar að selja þær og láta mark-
aðinn ráða. Þessar aðferðir hafa
borgaryfirvöld notað jöfnum hönd-
um. Það sá hins vegar enginn fyrir
að nákvæmlega þessi staða gæti
komið upp [...]. Kannski má segja
að menn hafi ekki haft hugmynda-
flug til að ætla að einstaklingur
myndi bjóða tuttugu milljónir í all-
ar einbýlishúsalóðirnar.“
„Gengur
gegn mark-
miðum útboðs-
reglnanna“
Steinunn Valdís
Óskarsdóttir
ÁRNI Þór Sigurðsson, oddviti Vinstri-grænna í borg-
arstjórn, segir að sú aðferð Reykjavíkurborgar að efna
til útboðs við úthlutun einbýlis- og parhúsalóða í landi
Úlfarsárdals hafi beðið skipbrot.
„Það var óheppilegt að gera þetta með þessum hætti
en peningarnir réðu hvernig fór. Þessir skilmálar voru
samþykktir með þremur atkvæðum í borgarráði þann-
ig að það má segja að fyrir þeim hafi ekki verið meiri-
hlutastuðningur.“
Árni telur einboðið að leitað verði leiða til að úthluta
lóðunum á nýjan leik og þá í samræmi við þau sjón-
armið sem hann hefur áður sett fram um að dregið
verði úr umsóknum og lóðirnar seldar á föstu verði.
„Það er ljóst að þetta hefur misheppnast þegar það
er lagt upp með það að bygging-
arrétturinn skuli seldur til ein-
staklinga en það reynist hins vegar
mögulegt að einn byggingaverktaki
bjóði í eigin nafni í allar lóðirnar sem
einstaklingur. Ekki ætlar hann að
búa í þrjátíu og níu húsum,“ sagði
Árni Þór en hann á von á því að mál-
ið verði tekið fyrir í borgarstjórn eða
borgarráði í vikunni.
„Í útboðsskilmálunum er gerður
fyrirvari um samþykki borgarinnar.
Það verður eflaust farið rækilega yfir það hvort unnt
sé að hafna tilboðunum og fara í ferlið á nýjan leik.“
Telur útboðið misheppnað
Árni Þór
Sigurðsson