Morgunblaðið - 21.01.1982, Blaðsíða 46

46
MORGUNBLAÐIÐ, FIMMTUDAGUR 21. JANÚAR 1982
• Ég er mjög óánægdur með þessa
niðurröðun, þegar ekkert stórverk-
efni er hjá landsliðinu, segir Ólafur
H., þjálfari Þróttar.
• Slakasta niðurröðun á móti sem
ég man eftir, segir Geir, þjálfari FH.
• Erfitt að stjórna þjálfun af ein-
hverju viti með svona niðurröðun,
segir Jóhann, þjálfari KR.
Þjálfarar 1. deildar
liðanna eru óánægðir með
niðurröðun íslandsmótsins
• Eitt af því sem mjög hefur verið
til umræðu hjá handknattleiks-
mönnum og þjálfurum í vetur er
niðurröðun mótanefndar HSÍ í I.
deild íslandsmótsins í handknatt-
leik. Nú um langt skeið hefur ekkert
verið leikið í 1. deild vegna verkefna
landsliðsins. Mótið er slitið í sundur
og bitnar það mjög á leikmönnum
liðanna svo og almennum áhuga
áhorfenda. Nú á þessu keppnistíma-
bili er ekkert stórt verkefni fram-
undan hjá landsliðinu í handknatt-
leik og því spurning hvort ekki hefði
verið hægt að skipuleggja mótið bet-
ur en gert var. Vissulega þarf lands-
líðið sinn tíma en spurning er hversu
miklu á að fórna. Hversu mikið á sá
undirbúningur að bitna á félagslið-
unum og leikmönnum þeirra? Þess
eru dæmi í yfirstandandi íslands-
móti að I. deildarlið nái varla að
leika tvo leiki á tveimur mánuðum.
Og engin verkefni eru fyrir liðin á
meðan. Væri ekki hægt að byrja bik-
arkeppnina til dæmis fyrr? Er ekki
kominn tími til þess að fara að fjölga
leikjum hjá I. deildarliðunum. Fá
jafnvel úrvalsdeild með sex liðum og
leika fjórar umferðir. Eða leika þrjár
umferðir í 1. deild. Einn leik á hlut-
lausum velli. Það myndi gera það að
verkum að leikmenn væru í meiri
leikæfingu og kæmi það þá lands-
liðsmönnum til góða. Hvað höfðu
þjálfarar I. deildarliðanna um málið
að segja? Mbl. innti nokkra þeirra
eftir áliti og fer það hér á eftir.
Þjálfari KR-inga, Jóhann Ingi
Gunnarsson fyrrum landsliðs-
þjálfari, hafði þetta um málið að
segja.
— Það er mjög erfitt að stjórna
þjálfun hjá 1. deildarliði af ein-
hverju viti þegar mót er jafnilla
skipulagt og raun ber vitni núna.
Svona framkvæmd er bara til að
drepa niður áhuga leikmanna og
áhorfenda. Það er orðið algert
skilyrði að afmarka betur ís-
landsmót og æfingar og keppni
landsliðs.
Landslið verður að fá sinn tíma
en það má ekki bitna svona illilega
á félagsliðunum. Frumskilyrði er
að skipuleggja hlutina betur. Þá
með leiki í Evrópukeppni í huga
líka. Nú eru leikmenn 1. deildar-
liðanna farnir að æfa svo mikið að
það verður að fara að fá þeim
fleiri verkefni. Skilyrðislaust á að
fjölga leikjum í deildinni. Jafn-
framt á að hafa tvo leiki á kvöldi.
Ekki einn. Það eykur aðsóknina að
leikjum.
Ólafur H. Jónsson, þjálfari
Þróttar, sagði: — Sem þjálfari er
ég mjög óánægður með þessa
niðurröðun. Það er alltof langt á
milli leikja. Nú um nokkurt skeið
hefur landsliðið ekkert verkefni en
ekki er spilað í 1. deild. Eitthvað
verður að gerast í þessum málum.
Það kæmi til greina að leika í
tveimur lotum. Gefa landsliðinu
tíma þar á milli. Þetta er búið að
vera vandamál um nokkurt skeið
en eins og í vetur, þegar landsliðið
hefur ekkert stórverkefni, þá má
ekki níðast svona illa á félögunum.
Ég er þeirrar skoðunar að það eigi
að fjölga leikjum í 1. deild. Fækka
liðum niður í sex og leika fjórar
umferðir.
Geir Hallsteinsson, þjálfari FH,
sagði. — Þetta er slakasta niður-
röðun í íslandsmóti sem ég man
eftir. Og oft hefur hún verið slök.
Það er mjög erfitt fyrir þjálfara
að halda leikmönnum sínum við
efnið þegar engin verkefni eru
fyrir hendi. Þá liggur það ljóst
fyrir að æfing þeirra verður ekki
eins góð. Það skortir leikæfingu.
Æfingaleikir skila aldrei eins
miklu og kappleikir, þó svo að þeir
hjálpi upp á sakirnar. Sem dæmi
um niðurröðunina má nefna að við
lékum við Þrótt um miðjan des-
ember en leikum síðan ekkert aft-
ur fyrr en 30. janúar. Þá aftur
gegn Þrótti.
Við verðum að fara að breyta
þessu. Mín skoðun er sú að fækka
eigi niður í sex lið í 1. deild og hafa
fjórar umferðir. Slíkt fyrirkomu-
lag yrði til bóta. En meðan við
gerum ekkert eigum við ekki von á
miklum framförum í íþróttinni.
Svo mörg voru nú orð þessara
þjálfara. Hér á síðunni má líka sjá
spjall við Birgi Björnsson, þjálf-
ara KA, en hann hefur manna
lengst verið við þjálfun og keppni í
handknattleik hér á landi.
— ÞR.
Körfuknattleikur
á mikilli uppleið
í Bretlandi núna
— þar leika 40 Bandaríkjamenn
KÖRFUKNATTLEIKUR hefur rutt
sér mjög til rúms í Englandi síðustu
'íu árin, eða síðan körfuknattleiks-
samband Englands var stofnað
keppnistímabilið 1972—73.
Síðustu 3 árin hefur aðsókn að
leikjum aukist um 50 prósent og
milli 2000 og 3000 manns horfa að
jafnaði á deildarleiki í körfuknatt-
leik. Þá er vitað með vissu, að
18.000 manns muni mæta á áhorf-
endapallana í Wembley-höllinni í
mars, þegar úrslitakeppnin fer þar
fram.
Rúmlega 40 Bandaríkjamenn
leika með enskum liðum og þéna
þeir allt að 15000 sterlingspund á
ári, auk þess sem þeim er séð fyrir
íbúð og bifreið. Þessir kappar gera
sitt til þess að auka vinsældir
íþróttarinnar alveg eins og á ís-
landi er bandarískir leikmenn
stigu hér sín fyrstu skref. Eng-
lendingarnir hafa hins vegar ráð á
að fá til sín betri leikmenn og allir
eru þeir fyrrverandi leikmenn með
bandarískum háskólaliðum. Að-
eins einn hefur leikið í NBA-
deildinni, Larry McKinney, sem
lék með Indiana Pacers.
Þetta er allt saman reyndar
nánast sem sandkorn við hliðina á
bandarísku atvinnumannadeild-
inni, en nýlega færðist enskur
körfuknattleikur nær atvinnu-
mennsku, er breska körfuknatt-
leikssambandið gerði stórgóðan
aurasamning við breska sjón-
varpsstöð sem gefur þúsundir
punda í aðra hönd. Gerir það
enska sambandinu kleift að gera
miklar úrbætur, því víða er pottur
brotinn þrátt fyrir hinar miklu og
skyndilegu vinsældir íþróttarinn-
ar. Sérstaklega eru húsakynni
þau, þar sem körfuknattleikirnir
fara fram, bágborin. Þetta eru að
vísu yfirleitt prýðileg hús, en að-
eins örfá taka fleiri áhorfendur en
3000 og er áhuginn orðinn slíkur,
að það er hreinlega of lítið ...
Köriuknattlelkur
....................... ^
Rðrhiknattielkur
l.... .... ...
Portúgal
Portúgal sigraði Grikkland í vin-
áttulandsleik í knattspyrnu í gær
dag, leikurinn fór fram í Aþenu. An-
astopolus skoraði fyrir Grikki og
náði forystunni á 24. mínútu, en
raarkaskorarinn mikli Oliveira jafn-
aði á 43. mínútu og skoraði síðan
sigurmarkið á 77. mínútu.
Knattspyrna
Birgir Björnsson þjálfari KA:
„Ekki mjög heppilegt að slíta mótið í sundur
en landsliðió verður að fá tíma til æfinga“
BIKGIR Björnsson hefur
lengi staðið í eldlínunni í
handboltanum hér á landi,
bæði sem leikmaður og þjálf-
ari. Nú þjálfar hann sem
kunnugt er 1. deildarlið KA á
Akureyri.
Hvað finnst þér um niður-
röðun leikja í íslandsmótinu í
vetur, finnst þér mótið slitið of
mikið í sundur til að gefa
landsliðinu tíma?
— Þetta er að sjálfsögðu
ekki heppilegt, en landsliðið
verður að fá tíma. Þetta
kemur niður á öllum liðun-
um og ekki síst okkur hér
fyrir norðan, þar sem erfitt
er að fá æfingaleiki hér. Eg
vorkenni liðunum fyrir
sunnan alls ekkert, því þau
geta leikið æfingaleiki nán-
ast þegar þau vilja. Annars
finnst mér að nýta mætti
þennan tíma með því að
setja bikarkeppnina í gang
fyrr. Þá gætu þau mörgu lið
leikið sem ekki hafa neina
landsliðsmenn í sínum röð-
um.
— Þrátt fyrir að engin
sérstök verkefni liggi fyrir
hjá landsliðinu á næstunni,
verður það að fá tækifæri til
samæfinga á hverjum vetri.
Það verður að skapa lands-
liðinu viðunandi aðstöðu, en
ég skal ekki segja um hvort
þetta sé heppilegasta leiðin.
Þá finnst mér að skilyrðis-
laust eigi að taka þátt í þeim
„túrneringum" erlendis sem
möguleiki er á nú í vetur og
þá ráðum við ekki alltaf
hvenær það er. Landsmótin
eru leikin með hléum í
mörgum löndum, t.d. leika
Rússar sitt mót í þrem hlut-
um til hagræðingar fyrir
landsliðið.
Er íslenska landsliðið nú
„gott !andslið“?
— Ég tel, að landsliðið sé
mjög efnilegt, við eigum
óhemjumikið af efnilegum
leikmönnum. Ég held, að
sjaldan eða aldrei hafi kom-
ið svo margir góðir upp í
einu. Venjulega hafa ekki
komið nema einn og einn
mjög góður á hverju ári, en
nú hefur þar orðið breyting
á.
Er rétt að miða við leikina
við Danina um daginn, var
þetta ekki lélegt danskt lands-
lið?
— Það fór ekkert á milli
mála að okkar lið var mun
betra en það danska. Árang-
ur Dananna hafði ekki verið
góður áður en þeir komu
hingað og þeim hefur heldur
ekki gengið vel síðan. í sam-
bandi við árangurinn í leikj-
unum við A-Þjóðverjana er
ekki hægt annað en að vera
ánægður. Mér kom það þó á
óvart hve mikið var um mis-
tök á báða bóga í þeim leikj-
um og á ég þá sérstaklega
við hve mikið var um rangar
sendingar. En eins og ég
sagði áðan, þá tel ég íslenska
liðið mjög efnilegt og það er
möguleiki á að það verði
mjög gott í framtíðinni,
jafnvel það besta sem við
höfum átt.
Nú hefur þú verið landsliðs-
þjálfari. Var þjálfun liðsins þá
hagað eins og nú?
— Það var nú upp og
ofan. HSÍ gerði t.d. mikið
tilkall til leikmanna árið
1976, áð.ur en við fórum til
Austurríkis og sigruðum þar
i B-keppni heimsmeistara-
keppninnar.
Hvcnær hefur íslenskt
landslið verið best?
— Við höfum oft á tíðum
átt mjög góð landslið, eins
og t.d. þegar Geir Hall-
steinsson og Ólafur H.
Jónsson voru upp á sitt
besta. Segja má, að við höf-
um átt mjög gott landslið
síðan 1961, að vísu með
lægðum á milli, en besta
landslið okkar tel ég vera
liðið sem náði sjötta sæti á
HM 1961, það hefur a.m.k.
náð bestum árangri allra
liða í þeirri keppni.
— sh.