Morgunblaðið - 05.07.2001, Blaðsíða 27
LISTIR
MORGUNBLAÐIÐ FIMMTUDAGUR 5. JÚLÍ 2001 27
SÆNSKI kórinn Erik Westberg Vokalensemble
kemur fram í tónleikaröðinni Sumarkvöld við org-
elið í Hallgrímskirkju í kvöld kl. 20.
Erik Westberg er kórstjóri sem fer ekki troðnar
slóðir í starfi sínu. Starf hans hefur borið hann til
Wollongong í Ástralíu og Sao Paulo í Brasilíu og um
víðan völl þar á milli, og hann stjórnar jafnt samísku
jojki sem kyrrahafskórsöng. Tvívegis hefur hann
verið sérlegur kórstjóri við afmæli kóngsins í
Tonga, en Tonga er ein af austustu eyjum Suður-
Kyrrahafsins og það land á jörðinni sem fyrst lítur
hvern nýjan dag. Erik Westberg hefur þó líka sinnt
hefðbundnum störfum kórstjóra og hefur reyndar
gert það á þann máta að eftir hefur verið tekið.
Hann er í röð fremstu kórstjóra Svía; lærði hjá
sjálfum Eric Ericson, og hefur stjórnað mörgum
bestu kórum Svía. Hann stofnaði eigin kór, Erik
Westberg Vokalensemble, árið 1993, og var hug-
mynd hans að skapa syngjandi hljóðfæri í háum
listrænum gæðaflokki. Kórfélagar eru 16, allt at-
vinnufólk í tónlist. Meðal þess sem kórinn syngur á
Sumarkvöldi við orgelið í kvöld er Biegga Luohte
frá 1998, eftir Jan Sandström, byggt á jojki sama-
prestsins Johans Märaks sem jojkar með kórnum.
Jojk er samískt og er aðferð til að tjá hugsanir sín-
ar. Það eru ekki bein orð heldur gefur það sálinni
flug í átt til hins guðdómlega. Jojk er jafngamalt
samískri menningu. Flest jojk á ævafornar rætur
og hefur varðveist kynslóð eftir kynslóð. Meðal ann-
arra verka á tónleikunum er Bachmessa 2001 eftir
ungt tónskáld, Erland Hildén. Kórinn syngur einn-
ig Festival Te Deum eftir Benjamin Britten, sænsk
kórverk og íslensk, þar á meðal Heyr himna smiður
eftir Þorkel Sigurbjörnsson. Organisti í för með
kórnum er Mattias Wagerlauk, en auk þess að leika
með kórnum ætlar hann að spinna á Klais-orgelið í
Hallgrímskirkju.
Jojkað og spunnið á
Sumarkvöldi við orgelið
Erik Westberg kórstjóri.