Morgunblaðið - 31.08.2001, Blaðsíða 6
FRÉTTIR
6 FÖSTUDAGUR 31. ÁGÚST 2001 MORGUNBLAÐIÐ
KONA í Reykjavík fær ekki bætt tjón
sem hún telur sig hafa orðið fyrir
vegna rangrar stærðarskráningar
íbúðar sinnar hjá Fasteignamati rík-
isins. Hún segir hvern vísa á annan og
líkir ástandinu við skrifræðismartröð.
Tapið segir hún tilfinnanlegt og að
fyrir liggi lögfræðiálit þar sem það er
metið á 950 þúsund krónur.
Konan keypti íbúðina, sem er í
blokk í Breiðholti, árið 1995 á 6,8
milljónir og seldi hana aftur á 6,2
milljónir 1997 en í millitíðinni lét hún
sjálf vita af rangri stærðarskráningu
íbúðarinnar. „Það getur hver sem er
lent í þessu og merkilegt að fá ekki
bætt mistök sem verða hjá opinber-
um aðilum,“ sagði hún.
Fer heiðarlega að
Stærðarmunurinn uppgötvaðist
þegar konan furðaði sig á að fjögurra
herbergja íbúð í blokkinni sem var til
sölu var auglýst jafn stór hennar, sem
var þriggja herbergja. „Auðvitað lít-
ur maður ekki fram hjá svona löguðu.
Ég fer bara heiðarlega að, en í þessu
tilviki virðist heiðarleikinn ætla að
verða mér að falli,“ sagði konan. Í
upphafi leitaði hún til fasteignasöl-
unnar sem hafði milligöngu um söl-
una en fékk þau svör að fasteignasal-
an bæri ekki ábyrgð á upplýsingum
um stærð íbúða.
„Þeir vísuðu kröfunni bara frá og
sögðust ekkert geta gert, ég yrði bara
að fá mér lögmann,“ sagði konan og
bætti við að nú hafi bæst við sölutapið
lögfræðikostnaður sem hún hafi lagt í
og önnur gjöld er eignina vörðuðu.
Konan segir álit lögfræðinga sinna
að krafa sé fyrir hendi en óljóst á
hvern, t.a.m. sé ekki hægt að ganga
að fyrri eiganda því hann hafi selt
íbúðina í góðri trú og alla tíð borgað of
há fasteignagjöld.
Þó segir hún ljóst að brotið sé ekki
fyrnt gagnvart henni og samkvæmt
lögum hafi fólk 10 ár til að sækja mál
sitt. Konan segist jafnframt vera búin
að ganga úr skugga um að verktakinn
sem byggði íbúðina hafi skilað af sér
réttum stærðartölum þannig að klár-
lega hafi verið um að ræða mistök hjá
skrifstofu borgarverkfræðings.
Bótakröfum hafnað
Í bréfi lögmanns konunnar til
Fasteignamats ríkisins og bygging-
arfulltrúans í Reykjavík er upphæð
kröfunnar byggð á að íbúðin hafi
reynst 14 prósentum minni en talið
var og krafan því sama hlutfall af
upprunalegu kaupverði íbúðarinnar
sem var 6,8 milljónir króna.
„Svo virðist sem ástæðuna sé að
rekja til mistaka við skráningu upp-
lýsinga um stærð íbúðarinnar og að
þar hafi byggingarfulltrúinn í
Reykjavík og/eða Fasteignamat rík-
isins átt hlut að máli,“ segir einnig í
bréfinu.
Fasteignamat ríkisins hafnaði
bótakröfum á þeim forsendum að
mistökin lægju í upplýsingagjöf frá
byggingarfulltrúa til fasteignamats
árið 1978 og vísuðu máli sínu til
stuðnings í lög númer 6 frá árinu 2001
um skráningu og mat fasteigna þar
sem ábyrgð sveitarstjórna er tíund-
uð.
Sjöfn Kristjánsdóttir, aðstoðar-
maður borgarlögmanns, taldi það
skjóta skökku við að vísa í ný lög sem
tækju gildi löngu eftir að meint brot
ætti sér stað. Í svarbréfi hennar til
lögmanna konunnar segir að viðskipti
einkaaðila með fasteignir séu borg-
arsjóði óviðkomandi.
Jafnframt segir: „Þrátt fyrir að
gerð hafi verið mistök á skrifstofu
byggingarfulltrúa við upplýsingagjöf
til Fasteignamats ríkisins á árinu
1978 fellir það atriði ekki bótaskyldu
á borgarsjóð vegna viðskipta umbj.
yðar með ofangreinda íbúð. Auk þess
er skaðabótakrafa vegna þess atviks,
hafi hún átt sér einhverja stoð, fyrnd
fyrir mörgum árum.“
Sveitarfélög ábyrg
fyrir skráningu
Sjöfn sagði aðspurð að bótakröf-
unni sem lögmaður konunnar sendi
hefði verið í nokkru ábótavant því
hvergi hefði komið fram hvort tjón
hefði raunverulega átt sér stað og
engar upplýsingar um hvort konan
hefði selt íbúð sína og þá á hvaða
verði. Hún segir að sé raunveruleg
bótakrafa fyrir hendi snúi málið frek-
ar að Fasteignamati ríkisins.
„Skráning fer fram þar en ekki hjá
byggingarfulltrúa. Þeir höfðu sínar
eigin aðferðir við skráningu og iðu-
lega án samráðs og upplýsinga frá
viðkomandi byggingarfulltrúa,“ sagði
hún.
Ólafur Theódórsson, svæðisstjóri
hjá Fasteignamati ríkisins, segir
sveitarfélög alfarið bera ábyrgð á
upplýsingum í fasteignaskrá og þann-
ig hafi það líka verið í lögum um
skráningu og mat fasteigna frá 1976.
„Við breytum aldrei stærðum sem
fram koma í tilkynningum frá sveit-
arfélögum. Ef þarf að koma til breyt-
ing þá fáum við nýja tilkynningu frá
sveitarfélagi, þannig hefur það verið
alla tíð,“ sagði hann.
Algjör óvissa um næstu skref
Konan segist hafa fengið staðfest
hjá lögmönnum sínum að ekki væri
rétt að miða fyrningu við árið 1978,
þegar stærð íbúðarinnar var skráð,
heldur árin 1994, 1995 og 1996 því
fasteignin hafi verið rangt metin í
fasteignaskrám sem tóku gildi fyrsta
desember þau ár, enda hafi hún feng-
ið leiðréttingu fasteignagjalda fyrir
þessi ár.
Konan segist vera í algjörri óvissu
um næstu skref. Hún hefur íhugað að
leita til umboðsmanns Alþingis en
hefur eftir lögmönnum sínum að allar
aðrar leiðir þurfi að vera fullreyndar
áður en það er gert.
„En ég get ekki árum saman staðið
straum af kostnaði vegna mistaka
þessara opinberu aðila sem eiga að
hafa eftirlit með fasteignaskráningu í
landinu,“ sagði hún og sagðist ekki
efast um að ríki og borg hefðu orðið
fljót til að heimta sinn skerf hefði hún
hagnast á sölu íbúðar sinnar í stað
þess að tapa á henni.
Kona fær ekki bætt tjón vegna rangrar stærðarskráningar íbúðar hjá Fasteignamati ríkisins
Telur óbætt sölutap
nema tæpri milljón
VINNA við fyrsta áfanga af
þremur við bílapall við Smáralind
stendur nú yfir, en pallurinn
verður í heild 9.000 m² og rúmar
338 bíla. Við verkið vinna rösk-
lega 60 manns og reiknað er með
tæplega 1000 rúmmetrum af
steypu og 66 km af stálköplum í
pallinn.
Lóðafrágangur við Smáralind
er í fullum gangi og hafa 20-25
manns lagt hellur síðustu daga.
Reiknað er með um 10.000m² í
hellulagnir og 70.000 m² í malbik
við Smáralind.
Morgunblaðið/Þorkell
Vinna við að steypa fyrsta áfanga bílapalls við Smáralind var í fullum gangi í gær.
Bílapallur steyptur við Smáralind
TOLLGÆSLAN á Keflavíkurflug-
velli hefur orðið talsvert vör við að
fólk sem er að koma úr utanlands-
ferðum hafi loftbyssur í fórum sín-
um. Loftbyssur eru seldar víða í sól-
arlöndum og er nokkuð um að
foreldrar kaupi slíkar byssur handa
börnum sínum til að leika sér með.
Geir Jón Þórisson, yfirlögreglu-
þjónn í Reykjavík, segist líta alvar-
legum augum á að foreldrar geri
slíkt, en það varðar við vopnalög að
eiga og nota loftbyssu án skotvopna-
heimildar. Tollgæslan hefur gert all-
ar byssur sem hún hefur fundið upp-
tækar og sent málin til sýslumanns
til meðferðar.
Fimm börn hlutu áverka
Á miðvikudag skaut fimmtán ára
drengur úr loftbyssu á fimm skóla-
systkini sín á skólalóð Engjaskóla í
Grafarvogi. Kúlur úr byssunni fóru í
nokkra nemendur og hlutu allir
áverka, þó ekki alvarlega, að sögn
Hildar Hafstað, skólastjóra Engja-
skóla. Hún segir að litlar blöðrur hafi
myndast á húðinni þar sem var skot-
ið og að einn drengur í fjórða bekk
hafi fengið skot í höfuðið, þar sem
húð hafi losnað frá.
Hildur segir að dómgreindarleysi
piltsins og þess sem átti byssuna sé
um að kenna og að þeir hafi ekki átt-
að sig á því að þeir væru með hættu-
legt vopn í höndunum. Hún segist
líta alvarlegum augum á málið og að
tekið verði á þessu máli á uppbyggi-
legan hátt. Lögreglan er nú með
málið í rannsókn.
„Mér finnst aðalatriðið vera að við
fullorðna fólkið lærum af þessu
máli,“ segir Hildur. Hún segir það
mikið dómgreindarleysi af foreldr-
um að gefa börnum sínum slíkar
byssur. „Við þurfum öll að taka
höndum saman og leiðbeina börnum
okkar. Þetta er ekki leikfang og get-
ur verið stórhættulegt,“ segir hún.
Geir Jón hvetur foreldra sem hafa
flutt loftbyssur til landsins að henda
þeim, eða koma með þær á lögreglu-
stöðina. Hann segir að það hafi verið
töluvert um að loftbyssueign sé til-
kynnt til lögreglu. Hann segir að
notkun á töluvert kraftmiklum loft-
byssum hafi aukist, en loftbyssan
sem skotið var úr í Grafarvogi var
með þeim kraftminni, að sögn Hild-
ar.
Geir Jón segir þetta vera grafal-
varlegt þar sem fólk geti slasast al-
varlega fái það skot úr loftbyssu í
sig, sérstaklega fari skotið í augað.
Geir Jón segir að dæmi séu um að
börn allt niður í 13 ára eigi loftbyssu.
Foreldrar kaupa oft loft-
byssur handa börnum
Fimmtán ára drengur skaut á skólasystkini sín úr loftbyssu
HEILDARFJÖLDI fíkniefna-
brota samkvæmt málaskrá lög-
reglunnar árið 2000 var 781 en
þetta kemur fram í nýrri árs-
skýrslu embættis ríkislögreglu-
stjóra. Að sögn Guðmundar Guð-
jónssonar yfirlögregluþjóns var
lagt hald á fíkniefni eða áhöld til
neyslu þeirra í 619 málum og alls
voru 639 einstaklingar kærðir
vegna fíkniefnamála.
„Það hefur aðallega orðið veru-
leg aukning í haldlagningu e-töfl-
unnar. Að vísu skýrist það af því
að á síðasta ári fundust 22.000 e-
töflur en reynt var að smygla
14.000 töflum frá Hollandi til
Bandaríkjanna með viðkomu á
Íslandi og var efnið því ekki ætlað
á markað hérlendis,“ segir Guð-
mundur. Hann telur að meira
magn af e-töflum sé í umferð hér
á Íslandi nú heldur en síðustu ár,
til dæmis hafi verið lagt hald á
mun meira af töflum á fyrri hluta
þessa árs en var á sama tímabili í
fyrra.
„Ég held að hér sé um sam-
verkandi þætti að ræða. Lögregl-
an og tollgæslan hafa náð meiri
árangri í að koma upp um fíkni-
efnamál, en einnig má ætla að það
hafi verið meira flutt inn af þess-
um efnum,“ segir hann og bendir
til samanburðar á að samkvæmt
skýrslum frá Interpol komi fram
að frá árinu 1997 hafi orðið 850
prósenta aukning í haldlagningu
e-taflna í heiminum.
Mikil aukning
í amfetamíni
Guðmundur segir að lagt hafi
verið hald á rúmlega hundrað
prósent meira af amfetamíni í
fyrra heldur en árið á undan, en
haldlagt amfetamín var rúm tíu
þúsund grömm. Magn kókaíns
var mjög svipað á milli ára en
töluvert minna fannst af
kannabisefnum og LSD á árinu
2000 en 1999.
Aðspurður hvaðan efnin koma
segir hann að Danmörk standi
upp úr í kannabisefnum. Um 55
prósent allra kannabisefna sem
lagt var hald á á landamærum
komi frá Danmörku og hafi það
sama verið uppi á teningnum árið
1999. Í fyrra fylgdi Holland fast á
eftir Danmörku því tæp 35 pró-
sent kannabisefna komu þaðan.
Að sögn Guðmundar er mestur
innflutningur á e-töflum hingað
til lands frá Hollandi og þar á eft-
ir frá Bretlandi.
Hann bendir á að eingöngu sé
miðað við þau mál sem varða inn-
flutning beint en ekki heildar-
magn haldlagðra fíkniefna þegar
fundin er hlutdeild hvers lands.
Ástæðan sé sú að í þeim málum
einum liggi ljóst fyrir hvaðan efn-
in koma.
781 fíkniefnamál
kom til kasta lög-
reglu árið 2000