Morgunblaðið - 20.04.2002, Blaðsíða 12

FRÉTTIR
12 LAUGARDAGUR 20. APRÍL 2002 MORGUNBLAÐIÐ
ÞAÐ var engin lognmolla yfir vinnustaða-
fundi frambjóðenda Sjálfstæðisflokksins í
Húsasmiðjunni á miðvikudag þar sem sköp-
uðust líflegar umræður og ýmis kosningalof-
orð voru gefin. Fjórir frambjóðendur Sjálf-
stæðisflokksins mættu í mötuneyti Húsa-
smiðjunnar, Björn Bjarnason, borgarstjóra-
efni flokksins, Hanna Birna Kristjánsdóttir,
sem skipar 4. sætið, Guðlaugur Þór Þórðar-
son, í 5. sæti og Gísli Marteinn Baldursson,
7. sæti.
Sjálfstæðismenn sögðust vilja taka á fjár-
málum borgarinnar með öðrum hætti en
hingað til hefur verið gert. Stöðva skulda-
söfnun og greiða niður skuldir. Þeir lofuðu
að lækka fasteignaskatt á eldri borgara og
afnema holræsaskattinn.
Fasteignaskattur á eldri borgara
lækkaður á næsta ári
Úr salnum komu efasemdir um að staðið
yrði við þessi loforð, en Björn sagði að fast-
eignaskattur á eldri borgara yrði lækkaður
strax á næsta ári, næði flokkurinn meiri-
hluta, og holræsaskatturinn yrði lækkaður í
áföngum. Hann sagði skuldir borgarinnar
aukast um 9 milljónir króna á degi hverjum.
Þeirri óheillaþróun þurfi að snúa við. Fjölga
þyrfti íbúum í borginni og laða að fyrirtæki.
Þannig mætti auka tekjustofn borgarinnar.
Björn sagði það stefnu flokksins að koma
til móts við barnafjölskyldur og börn með
áherslu á málefni leik- og grunnskólans og
eldri borgara með eflingu hjúkrunarþjón-
ustu og uppbyggingu hjúkrunarrýma.
Bogi Þór Siguroddsson, forstjóri Húsa-
smiðjunnar, sagði að allir sem eru í rekstri
viti að til að spara, þurfi að skera niður og
þá þurfi að taka erfiðar ákvarðanir. Hann
spurði hvernig flokkurinn ætlaði að ná því
að lækka skatta, ná tökum á skuldasöfnun
borgarinnar og bæta þjónustuna á sama
tíma. Björn sagði að ekki væri hægt að
halda áfram á sömu braut og láta skuldirnar
aukast og aukast. Hann sagði að sjálfstæð-
ismenn hefðu ekki látið 1.700 milljónir í
Línu.Net og farið í aðrar fjárfestingar sem
hann taldi óskynsamlegar hefðu þeir verið í
meirihluta.
Breyttar áherslur í fjármálum
Annar starfsmaður sagði að það hljóti að
þurfa að skera niður. „Sumt er forgangs-
röðun, annað er niðurskurður. Við ætlum að
byrja á því að selja Línu.Net,“ sagði Björn.
„Er það ekki verðlaust fyrirtæki?“ var kall-
að úr salnum. „Það kemur þá í ljós. Við ætl-
um að taka á stjórnkerfi borgarinnar, við
teljum að þar hafi skipulagið orðið það mikið
að hægt er að spara,“ svaraði Björn. Hann
sagði borgina fá um 2,5 milljarða á ári á sig í
vöxtum og það þurfi að stöðva.
Guðlaugur Þór sagði engan vilja hjá R-
lista til að hagræða og að engin virðing væri
borin fyrir fjármunum borgarinnar. Sér-
fræðiaðstoð hafi t.d. ekki verið boðin út,
millistjórnendum hafi fjölgað mikið og alltaf
verði erfiðara fyrir íbúa að koma boðum til
ákvarðanatakenda. Hann sagði íbúa í ná-
grannasveitarfélögum Reykjavíkur vera
ánægðari með þjónustu sem sveitarfélagið
stendur fyrir en Reykvíkingar.
Starfsmaður sem býr í póstnúmerinu 108
sagði að hann væri að reyna að bæta skólann
í sínu hverfi og spurði hvort Reykjavík væri
hugsanlega orðin of stórt sveitarfélag. Björn
sagðist telja að færa þurfi skólana nær íbú-
um. Hann vildi skipta borginni upp í 4–5
svæði sem heyrðu undir mismunandi
fræðsluskrifstofur. Þannig gætu foreldrar
valið milli skólahverfa sem myndi skapa
samkeppni milli skóla og boðleiðir milli for-
eldra, kennara og skóla myndu styttast.
KR-ingar fái aðstöðu
til íþróttaiðkunar
Annar starfsmaður spurði um áherslur
Sjálfstæðisflokks í byggingarmálum. „Við
teljum að Geldinganes eigi að vera framtíð-
arbyggingarlandið í Reykjavík. Við sjáum
ekki að þróunin eigi að vera sú að byggt
verði uppi um holt og hæðir. Við viljum ekki
að Geldinganesið verði sprengt í loft upp og
flutt vestur í bæ. Það yrði meiriháttar um-
hverfisslys. Það er yfirlýst stefna R-listans
að Geldinganesið eigi að vera hafnarsvæði,
við teljum að þar megi byggja fyrir 8–10
þúsund manns,“ sagði Björn.
KR-ingur í salnum spurði hvers vegna
sjálfstæðismenn vilji ekki þétta byggð í
Vesturbæ með því að byggja á uppfyllingum
í Eiðisvík. Hanna Birna Kristjánsdóttir
sagðist telja að ekki væru forsendur fyrir
íbúabyggð þar. „Við teljum ekki forsendur
til að flytja Geldinganes frá Geldinganesi yf-
ir í Eiðisvík. Eins teljum við að umferð-
armannvirki og annað mæti ekki þeim kröf-
um sem þyrftu að vera til staðar. Þetta
hefur ekkert að gera með afstöðu okkar til
æfingasvæðis KR. Við höfum í gegnum tíð-
ina stutt vel við það íþróttafélag og styðjum
og skiljum óskir KR-inga um þetta svæði,“
sagði Hanna Birna.
Gísli Marteinn sagði að KR-ingar vilji
miklu frekar æfingasvæði við Ægisíðuna eða
í Vatnsmýrinni þegar flugvöllurinn fer að
hopa. „Get ég treyst því að Sjálfstæðisflokk-
urinn lofi okkur æfingasvæði í framtíðinni,“
spurði KR-ingurinn og játti Gísli Marteinn
því.
Björn Bjarnason sagði Sjálfstæðisflokkinn
vilja gera ráðstafanir til að fleira fólk geti
búið í miðbæ Reykjavíkur. Gísli Marteinn
sagði að byggja mætti upp í Skuggahverfi,
þar sem reyndar er búið að skipuleggja
byggð, eins mætti byggja á Slippsvæðinu og
Vatnsmýrinni. Hann sagði marga kaupmenn
við Laugaveg vilja rífa húsin sín, sem eru
friðuð, og byggja ný sem henti betur í versl-
unarrekstri og að flokkurinn vildi leyfa hús-
eigendum sem vilja að rífa húsin sín og
byggja ný.
Morgunblaðið/RAX
Líflegar umræður sköpuðust á vinnustaðafundi frambjóðenda Sjálfstæðisflokks í Húsa-
smiðjunni þar sem m.a. var rætt um fjármál borgarinnar, skattheimtu og skipulagsmál.
Frambjóðendur Sjálfstæðisflokks
á vinnustaðafundi í Húsasmiðjunni
Vilja breyttar
áherslur í fjármál-
um borgarinnar
INGIBJÖRG Sólrún Gísladóttir borgarstjóri
og Dagur B. Eggertsson, frambjóðendur á
lista R-listans til borgarstjórnar, óskuðu sér-
staklega eftir óþægilegum og erfiðum spurn-
ingum þegar þau heimsóttu starfsmenn Sam-
skipa í mötuneyti fyrirtækisins í gær.
Atvinnulíf í borginni í framtíðinni var talsvert
til umræðu, löggæsla og skipulagsmál.
Borgarstjóri sagði Reykjavík ekki eiga í
samkeppni við önnur sveitarfélög um heldur
við útlönd.
„Til að Reykjavík geti keppt við útlönd þurfa
lífsgæði að vera með því besta sem gerist á
Vesturlöndum, það er á grundvelli lífsgæða
sem við keppum. Fólk þarf að vilja búa hérna,
eiga hér sín börn og ala þau upp og hér þurfa
fyrirtæki að vilja setjast að. Þess vegna eru
það lífsgæðin sem skipta öllu máli og að því
munum við vinna á næsta kjörtímabili,“ sagði
hún.
Nauðsynlegt að tryggja höfninni
stækkunarmöguleika
Dagur, sem er í 7. sæti listans, sagði fimm
atriði einkum skipta máli um hvort komandi
kynslóðir muni velja að búa í Reykjavík í fram-
tíðinni eða annars staðar í heiminum. Öflugt og
metnaðarfullt skólastarf, framsækið atvinnulíf
með spennandi atvinnutækifærum, alþjóðleg-
ur borgarbragur, nútímalegir stjórnunarhætt-
ir og góð og skilvirk þjónusta.
Hann sagði sóknarfærin í atvinnumálum
gríðarleg, nefndi aukinn ferðamannastraum og
uppbyggingu hátækni- og þekkingariðnaðar í
Vatnsmýrinni. „Ef við ætlum að hafa alvöru at-
vinnulíf og útflutningsiðnað má ekki gleyma
höfninni og þróunarmöguleikum hennar,“
sagði Dagur. Borgin hafi sagst reiðubúin að
fara í samningaviðræður við sveitarfélögin í
kring til að leita sameiginlegra lausna til að
höfn framtíðarinnar þurfi ekki að vera í Geld-
inganesi. En meðan þær viðræður séu ekki
hafnar verði að tryggja höfninni stækkunar-
möguleika vegna þess hvað Reykjavík hafi
gríðarlega möguleika sem umferðarmiðstöð
norðursins í framtíðinni. Hann sagði að ekki sé
verið að hugsa til 5 eða 10 ára, heldur 50. Sjálf-
stæðismenn hafa lýst sig mjög mótfallna hafn-
argerð í Geldinganesi og vilja reisa þar íbúa-
byggð. „Þetta er eitt af því sem tekist verður á
um hvort atvinnulíf sé eitthvað sem óhreinki
byggðina eða hvort það sé hluti af því að hugsa
til framtíðar og þess hvernig borg við viljum
byggja upp.“
Starfsmaður í salnum spurði um lóðaúthlut-
anir og hvort áfram yrði notast við sama fyr-
irkomulag og tíðkast hefur. Ingibjörg sagði
tvenns konar fyrirkomulag notað við lóðaút-
hlutun. Verktakafyrirtæki taki þátt í gegnum
útboð en einstaklingar kaupi lóðir á föstu verði.
Hún sagðist ekki eiga von á því að breyting
yrði á úthlutunarreglum og sagði útboð til fyr-
irtækja forsendu þess að land borgarinnar nýt-
ist betur. Þeir sem kaupi úr sér gengin mann-
virki og rífi til að byggja ný hús í þeirra stað
geti ekki keppt ef borgin úthluti á sama tíma
lóðum á niðurgreiddu verði í útjarðri borgar-
innar.
Lykilatriði að miðborgin þrífist sem
miðstöð verslunar og þjónustu
Spurt var um hvar Sundabrautinni væri ætl-
aður staður. Borgarstjóri sagði ríkið vilja fara
innri leið eftir strandlengjunni en að borgin
vilji fara þvert yfir sundið um brú eða göng
sem sé dýrara. Borgin vilji að Sundabraut
tengi Grafarvogshverfi við Sæbraut, til að
styrkja miðbæinn, í stað þess að Sundabraut
tengi Grafarvogshverfið við Reykjanesbraut
og þaðan Smárann í Kópavogi.
Ingibjörg sagði að búið væri að fjárfesta
gríðarlega í miðborg Reykjavíkur og borgar-
stjórn yrði að gæta hagsmuna þeirra sem hafa
fjárfest í borginni. „Það er algjört lykilatriði að
miðborg Reykjavíkur þrífist sem miðstöð
verslunar og þjónustu, stjórnsýslu og menn-
ingar. Ekki bara fyrir borgina, heldur fyrir allt
höfuðborgarsvæðið. Ef miðborg Reykjavíkur
nær ekki því hlutverki verða ekki bara Reyk-
víkingar fátækari, heldur allt svæðið.“
Einn starfsmanna spurði um stefnu R-
listans hvað löggæslu og súlustaði varðar.
Borgarstjóri sagði að borgin væri búin að vera
í stöðugum viðræðum við lögregluna í Reykja-
vík og dómsmálaráðherra um eflingu löggæslu
án árangurs. Ingibjörg sagði lögregluna undir-
mannaða, hún hafi 290 stöðugildi en þyrfti að
vera með 340 svo viðunandi væri.
„Við viljum gjarnan fara í viðræður um að
taka löggæsluna yfir og þá gætum við stjórnað
því hvernig þessi mannskapur er,“ sagði Ingi-
björg. Starfsmaðurinn sem vakti máls á lög-
gæslumálum spurði um önnur ráð. Borgar-
stjóri sagði lögregluna afskaplega mikilvæga,
sérstaklega í hverfunum. Lögreglan geti þann-
ig tengst samfélaginu betur, kynnst ungling-
unum í hverfinu og unnið forvarnarstarf, t.d.
gegn veggjakroti.
Hvað súlustaðina varðar sagði Ingibjörg það
almenna reglu að þeir verði ekki í borginni
nema undir sérstökum ákvæðum og ekki í
miðbæ Reykjavíkur. Þeir sem þegar séu
komnir til sögunnar verði þó áfram.
Höfuðborgarstjórn komið á fót
Aðspurð sagði Ingibjörg illmögulegt að sam-
eina sveitarfélögin á höfuðborgarsvæðinu og
sagði óæskilegt að hafa eitt stórt sveitarfélag í
landinu og tugi lítilla. Hún sagðist þó hafa
áhuga á að komið yrði á fót höfuðborgarstjórn
sem færi einungis með stór mál eins og um-
ferðarkerfið, skipulagsmál, landnotkun, rekst-
ur sameiginlegra svæða, holræsi, veitur og
sorp.
Spurt var um nýtt fyrirkomulag á sorphirðu.
Borgarstjóri sagði stefnt að því að þeir sem
flokki sorp sitt borgi minna fyrir sorphirðu en
aðrir. Ingibjörg sagði að 20 nýjum móttöku-
stöðvum ætti að bæta við áður en breyting-
arnar taka gildi og kom fram að hámarksvega-
lengd frá heimilum borgarbúa í næstu
flokkunarstöð eigi að vera einn kílómetri.
Morgunblaðið/Ásdís
Borgarstjóri sagði Reykjavíkurborg eiga í samkeppni við útlönd, keppt væri á grundvelli
lífsgæða og því yrði unnið að því að bæta lífskjörin á næsta kjörtímabili.
Frambjóðendur R-lista á fundi
með starfsmönnum Samskipa
Reykjavík keppir
við útlönd á grund-
velli lífsgæða