Morgunblaðið - 29.05.2002, Blaðsíða 4

FRÉTTIR
4 MIÐVIKUDAGUR 29. MAÍ 2002 MORGUNBLAÐIÐ
DAVÍÐ Oddsson forsætisráðherra
segir að undirritun samnings um
samstarf Nató-ríkjanna og Rúss-
lands í Róm í gær marki tímamót.
Hann segist telja að samningurinn
auðveldi Rússum að fallast á
stækkun Atlantshafsbandalagsins
til austurs.
„Þarna var verið að formbinda
mjög mikilvægar ákvarðanir. Það
er ánægjuefni að verulegur hluti
af þeirri vinnu sem lögð var til
grundvallar þessum lokaákvörðun-
um var lagður í Reykjavík. Það
kom fram í ræðu aðalfram-
kvæmdastjóra Nató að megin-
ákvarðanirnar hefðu verið teknar í
Reykjavík þó að hin formlega und-
irskrift væri í Róm og samning-
urinn yrði kenndur við Róm.“
Davíð sagði að þó að búið væri
að formfesta þetta samstarf Nató
og Rússlands væri ekki síður mik-
ilvægt að vel tækist til við að þróa
samstarfið á næstu árum. Í Rúss-
landi væri rótgróin tortryggni út í
Atlantshafsbandalagið og þess
væri ekki að vænta að sú tor-
tryggni hyrfi á einni nóttu. Þess
vegna væri mikilvægt að Rússar
skynjuðu að það væri einlægur
vilji Nató-þjóðanna að Rússland
yrði þátttakandi í mikilvægum
ákvörðunum. Samningurinn gerði
ráð fyrir að Rússar yrðu ekki þátt-
takendur í öllum ákvörðunum sem
teknar yrðu á vettvangi Nató, en
áhrif þeirra á starf Nató yrðu hins
vegar veruleg. Davíð sagðist sann-
færður um að Rússar myndu
leitast við að nýta sér þá mögu-
leika sem í þessu nýja samstarfi
fælust. Jafnframt kvaðst hann
vonast eftir að samningurinn auð-
veldaði Rússum að fallast á stækk-
un Atlantshafsbandalagsins til
austurs.
Leiðtogar ríkjanna sem sóttu
fundinn fluttu stutt ávörp á fund-
inum.
„Tilgangur Rómarfundarins er
tvíþættur. Annars vegar er á fund-
inum staðfestur sögulegur samn-
ingur milli Nató og Rússlands og
hins vegar heita 20 ríki, sem eru
staðráðin í því að byggja á lögum
og lýðræði, að berjast gegn hvers
konar hryðjuverkum sem beinast
gegn friðelskandi þjóðum eða gegn
borgurum þeirra. Stofnendur Nató
leyfðu sér ekki þann munað að
dreyma um slíkt, en áratugum
saman hékk hættan á allsherjar-
stríði yfir þeim eins og martröð.
Þeir hefðu hins vegar örugglega
fagnað þeirri staðfestu sem við
erum ákveðin í að sýna gagnvart
hryðjuverkahópum og einstak-
lingum eða ríkjum sem reyna að
aðstoða hryðjuverkamenn í að
fremja sín vondu verk,“ sagði Dav-
íð í ávarpi sínu á fundinum.
Samstarfið þarf að
vera innihaldsríkt
Halldór Ásgrímsson utanríkis-
ráðherra, sem einnig sat fundinn,
sagði að á fundinum hefði verið
formlega staðfest það sem samið
hefði verið um á Nató-fundinum í
Reykjavík fyrr í þessum mánuði.
Menn hefðu síðan á fundinum rætt
um framtíðina og hvernig hægt
yrði að þróa þetta nýja samstarf.
Fundurinn var stuttur. Þjóðar-
leiðtogarnir fluttu stutt ávörp, en
síðan áttu þjóðarleiðtogarnir há-
degisverðarfund og utanríkisráð-
herrarnir áttu annan fund.
„Á fundi okkar var rætt um
framtíðina og hvernig þetta sam-
starf myndi þróast á næstunni.
Menn voru sammála um að það
yrði að vera innihaldsríkt. Það er
þegar farin í gang vinna til að und-
irbúa það,“ sagði Halldór.
Samningurinn þýðir m.a. að
Rússar verða með skrifstofu í höf-
uðstöðvum Nató í Brussel. „Rúss-
ar fá áhrif á gang mála að því er
varðar ákveðna málaflokka sem
eru í þessum samningi og þjóð-
irnar sitja þar á jöfnum grundvelli.
Áhrif þeirra verða því mun meiri
en áður,“ sagði Halldór.
Davíð Oddsson forsætisráðherra um leiðtogafund NATO í Róm
Auðveldar Rússum að
fallast á stækkun NATO
Reuters
Silvio Berlusconi, forsætisráðherra Ítalíu (t.v.), ræðir við Davíð Oddsson forsætisráðherra og George Robert-
son lávarð, framkvæmdastjóra Atlantshafsbandalagsins, á fundinum í Róm í gær.
RÚMENARNIR 17 sem sóttu um
pólitískt hæli hér á landi og tveir
samlandar þeirra lögðu seinni-
partinn í gær af stað austur á
Seyðisfjörð. Þeir munu fara með
Norrænu á fimmtudag, áleiðis til
Hanstholm á Jótlandi en eftir því
sem næst verður komist fóru þeir
um borð í ferjuna þar.
Hópurinn sem sótti um pólitískt
hæli hér á landi kom til landsins
með Norrænu á fimmtudag. Voru
þau á þremur sendiferðabílum
sem eru þó ekki skráðir fyrir svo
marga farþega. Þeir sem ekki
komust í bílana fengu far með lít-
illi rútu sem lögreglan í Reykja-
vík útvegaði.
Georg Kr. Lárusson, forstjóri
Útlendingaeftirlitsins, segir að
Rúmenarnir hafi getað framvísað
persónuskilríkjum en þegar þeir
gáfu sig fyrst fram við lögreglu
sögðust þeir engin skilríki hafa.
Þeir sóttu um hæli sem pólitískir
flóttamenn en drógu síðan allir
umsóknir sínar til baka.
Þar sem fólkið hafði hvorki
fjármuni til framfærslu eða far-
areyri lendir sá kostnaður á ýms-
um opinberum aðilum auk Rauða
krossins. Fólkið gaf sig fram í
Reykjavík og því þarf Fé-
lagsþjónustan í Reykjavík að
greiða mestan hluta ferða-
kostnaðarins, um 400.000 krónur
að sögn Georgs. Þá greiðir lög-
reglan í Reykjavík, ríkislög-
reglustjóri og Útlendingaeftirlit
hluta en útlagður kostnaður
vegna ferða er líklega um ein
milljón króna. Er þá ótaldur ann-
ar kostnaður, s.s. við rannsókn-
arvinnu lögreglu og uppihald
fólksins. Smyril line, sem rekur
Norrænu, hefur þó veitt mikinn
afslátt af ferð Rúmenanna til
Hanstholm.
Rúmenarnir tveir sem slógust í
hóp hinna 17 á tjaldstæðinu í
Laugardal eru á leið til Þýska-
lands þar sem þeir eru búsettir en
ekki liggja fyrir upplýsingar um
áfangastað hinna.
Fulltrúi Útlendingaeftirlitsins
fylgir hópnum til Seyðisfjarðar.
Ætlunin er að hann haldi stutt
námskeið fyrir lögregluna á Seyð-
isfirði og verði með þeim við af-
greiðslu á ferjunni á fimmtudag.
Rúmen-
arnir lagð-
ir af stað
austur
Morgunblaðið/Sverrir
Krakkarnir brugðu á leik áður en Rúmenarnir lögðu af stað áleiðis til
Seyðisfjarðar. Þaðan halda þeir með Norrænu til Hanstholm á Jótlandi.
ANTON Helgason, formaður kjör-
stjórnar í Bolungarvík, sagðist bú-
ast við að fá gögn í dag, miðvikudag,
sem taka af allan vafa um meinta
farsímanotkun umboðsmanna K- og
D-lista meðan á kjörfundi stóð á
laugardag. Bjóst Anton við að fá út-
skrift símafyrirtækja um símanotk-
un milli klukkan 21 og 22 á kjördag,
annarsvegar frá tveimur mönnum
K-lista Bæjarmálafélags Bolungar-
víkur og og einum manni D-lista
Sjálfstæðisflokks, en taldi þó úti-
lokað að skilaboðum hafi verið kom-
ið áleiðis í gegnum farsíma úr taln-
ingarherbergi í því markmiði að
smala kjósendum á kjörstað.
Það voru fulltrúar Bæjarmála-
félags Bolungarvíkur sem fóru fram
á það við kjörstjórn, að kannað yrði
hvort umboðsmenn hefðu verið með
farsíma á sér í talningarherberginu.
Sagði Sveinn Bernóduson hjá K-
lista að kvittur þess efnis hefði kom-
ið upp og því hefði hann beðið Anton
um að kanna málið hjá umboðs-
mönnunum þremur til að kveða nið-
ur kvittinn. Sagði hann að fyrst upp-
lýst hafi verið að þrír umboðsmenn
hafi haft síma, þurfi í framhaldinu
að taka af allan vafa um hugsanlega
notkun.
Anton sagði að sér þætti sjálfsagt
að kanna málið til hlítar svo hægt
yrði að hreinsa fulltrúa kjörstjórnar
og flokkanna af slíkum áburði.
Hann sagðist hafa bannað notkun
farsíma meðan á kjörfundi stóð í
kosningunum um síðustu helgi, en
farsímar sem slíkir munu þó ekki
vera bannaðir á kjörfundi. „Þeir
voru sjö í talningarherberginu um
klukkan 21, þrír frá kjörstjórn og
tveir frá hvorum lista. Þrír farsímar
voru í herberginu en það er nánast
útilokað að þeir hafi verið notaðir.
Þá gerðu fulltrúar listanna engar
athugasemdir við framkvæmd kjör-
fundar meðan á honum stóð,“ sagði
Anton.
Sjálfstæðismenn eru áfram með
hreinan meirihluta í bæjarstjórn
Bolungarvíkur að loknum kosning-
um. Varpa þurfti hlutkesti til að úr-
skurða hvort D-listi sjálfstæðis-
manna eða K-listi Bæjarmálafélags
Bolungarvíkur fengi meirihluta en
framboðin hlutu bæði 296 atkvæði.
Talið var þrívegis áður en gripið var
til hlutkestisins, en samkvæmt því
fær Sjálfstæðisflokkur fjóra bæjar-
fulltrúa og K-listi þrjá.
Býst við
gögnum
um meinta
farsíma-
notkun
FRAMKVÆMDASTJÓRI
fataframleiðandans Stussy inc.
í Bandaríkjunum var meðal
þeirra sem gaf skýrslu í Hér-
aðsdómi Reykjavíkur í gær. Þá
fór fram aðalmeðferð yfir ís-
lenskum kaupsýslumanni sem
ákærður er fyrir að selja fals-
aða Stussy stuttermaboli hér á
landi en um er að ræða dýra
merkjavöru.
Einnig voru teknar skýrslur í
gegnum síma af framkvæmda-
stjóra Stussy í Ástralíu, fram-
kvæmdastjóra fyrirtækis í
Singapúr sem dreifir Stussy-
vörunum í Asíu og loks manni í
Hong Kong sem tengist fyrr-
nefndum viðskiptum. Tveir
aðrir gáfu skýrslu fyrir dómi í
gær auk sakborningsins sem
neitar sök.
Í ákæru sem efnahagsbrota-
deild ríkislögreglustjóra gefur
út, segir að kaupsýslumaðurinn
hafi selt Baugi hf. 901 stutt-
ermabol sem merktur var
Stussy, þrátt fyrir að hann hafi
vitað að rannsókn sem gerð var
á bolunum nokkru áður hafi
leitt í ljós að þeir voru falsaðir.
Fram-
kvæmda-
stjóri
Stussy gaf
skýrslu
ÁKVEÐIÐ hefur verið að Fjarða-
listinn og Framsóknarflokkurinn
hefji formlegar viðræður í dag um
myndun meirihluta í bæjarstjórn
Fjarðabyggðar að sögn Smára
Geirssonar, efsta manns á Fjarða-
listanum. Ákvörðun um þetta var
tekin í gær. „Ég vona að menn
klári þetta sem allra fyrst,“ sagði
Smári í samtali við Morgunblaðið.
Gerir hann jafnvel ráð fyrir að við-
ræðunum ljúki í kvöld.
Fjarðalistinn tapaði meirihluta
sínum í kosningunum á laugardag
og fékk fjóra af níu bæjarfulltrúum.
Sjálfstæðisflokkurinn fékk tvo,
Framsóknarflokkurinn tvo og Bið-
listinn einn. Smári segir að eftir
kosningar hafi þreifingar byrjað á
milli stjórnmálafylkinga í Fjarða-
byggð, „þvers og kruss“ eins og
hann orðar það, en eins og fyrr seg-
ir ætla Fjarðalistinn og framsókn-
armenn að reyna að mynda meiri-
hluta í bænum.
Ræða samstarf
Fjarðalista og
Framsóknar-
flokks
♦ ♦ ♦