Morgunblaðið - 23.07.2003, Blaðsíða 18

SUÐURNES
18 MIÐVIKUDAGUR 23. JÚLÍ 2003 MORGUNBLAÐIÐ
UNGLINGARNIR í vinnuskóla Vatnsleysu-
strandarhrepps hafa skorað á vegamálastjóra
að láta lækka hámarkshraða á Vatnsleysu-
strandarvegi úr 90 í 60 til 70 km. Benda þau á
slysahættu auk þess sem fjöldi fugla farist á
hverjum degi í umferðinni.
Vatnsleysustrandarvegur er mjór og krók-
óttur. Umferðarhraði er ekki sérstaklega
merktur á Vatnsleysustrandarvegi frá Vogum
að Reykjanesbraut við Kúagerði sem þýðir að
hámarkshraði er 90 km eins og á öðrum þjóð-
vegum. Þetta virtist koma ýmsum íbúum á
óvart síðastliðinn vetur þegar vakin var at-
hygli á þessu enda telja margir að vegurinn
henti ekki til aksturs á svo miklum hraða.
Hreppsnefndin óskaði eftir því að hámarks-
hraðinn yrði lækkaður í 70 km en þeim óskum
hefur ekki verið sinnt.
Fuglshræ eins og hráviði
Nú hafa unglingarnir í vinnuskólanum lagt
sitt af mörkum með áskorun til vega-
málastjóra og samgönguráðuneytis. Liðlega
30 ungmenni skrifa undir áskorunina. Þau
segjast oft eiga leið þarna um, bæði gangandi
og hjólandi, og ofbjóði hraðinn. Segja þau að
hræ af fuglum liggi eins og hráviði á og við
veginn og þar séu einnig krappar og blindar
beygjur með augljósri slysahættu.
Rannveig Eyþórsdóttur, flokksstjóri í ung-
lingavinnunni, hefur verið með börnunum við
ræktunar- og hreinsunarstörf víða á strönd-
inni og hún segir að þeim blöskri að sjá hversu
margir fuglar drepist á vegum. Áætlar hún að
50 fuglar farist á degi hverjum, mest kríuung-
ar. Segir hún að það geti verið erfitt fyrir við-
kvæmar sálir að horfa upp á hauga af dauðum
fugli og ekki sé gott að beina ferðafólki þarna
um, hvað þá hjólandi eins og til standi þegar
búið verður að tvöfalda Reykjanesbrautina.
Varúðarskilti þar sem athygli vegfarenda er
vakin á varplöndum hafa verið sett upp á
verstu stöðunum en það dugar ekki til, að sögn
Rannveigar. Þó er greinilegt að margir öku-
menn hægja á þar sem mest er um fugl á veg-
inum. Rannveig treystir sér ekki til að láta
vinnuskólann hreinsa veginn en hún segist
hafa orðið vör við að gamall maður fari þarna
stundum um, taki fuglshræin og urði við veg-
inn. Kristján Baldursson, tækni- og umhverf-
isstjóri Vatnsleysustrandarhrepps, segir nauð-
synlegt að lækka hámarkshraðann vegna
slysahættu og varplanda og telur hann ein-
kennilegt að óskir hreppsnefndar um það hafi
ekki fengið betri undirtektir. Kristján hafði
samband við vegamálastjóra í framhaldi af
áskorun vinnuskólans. Segist hann hafa fengið
þau svör að málið væri flókið og heyrði að ekki
öllu leyti undir samgönguyfirvöld heldur einn-
ig dómsmálaráðuneytið. Í framhaldi af því
hafði hann samband við Björn Bjarnason
dómsmálaráðherra og hefur nú skrifað ráðu-
neytinu bréf með formlegri ósk um lækkun há-
markshraðans. Vonast hann til að það verði til
að koma málinu á hreyfingu.
Kindur á veginum
Rannveig vekur einnig athygli á því að þótt
lausaganga búfjár sé bönnuð hafi borið á því að
kindur hafi sést á Vatnsleysustrandarvegi og
einnig á Reykjanesbraut. Telur hún að um 20
kindur séu á þessum slóðum. Starfsmenn
Vatnsleysustrandarhrepps reyndu að smala
fénu í rétt en kindurnar eru ljónstyggar. Að-
eins tókst að ná einni kind og kom í ljós að hún
er úr Grindavík. Telur Rannveig að féð sé það-
an og nú hafa bæjaryfirvöld í Grindavík verið
látin vita.
Slysahætta og fugladauði vegna hraðaksturs og tillitsleysis ökumanna á Vatnsleysustrandarvegi
Vinnuskólinn
vill láta lækka
hámarkshraða
Morgunblaðið/Helgi Bjarnason
Kristján Baldursson tækni- og umhverfisstjóri og flokksstjórarnir Rannveig Eyþórsdóttir og
Baldvin Baldvinsson ásamt unglingunum í vinnuskóla Vatnsleysustrandarhrepps.
Vatnsleysuströnd
Dauðir kríuungar og fleiri fuglategundir eru
víða á og við Vatnsleysustrandarveginn.
„ÞETTA er eins og að aka í gegnum
húsdýragarð á níutíu kílómetra hraða,“
segir Jónína Guðrún Eysteinsdóttir sem
skrifaði undir áskorun um lækkun há-
markshraðans á Vatnsleysustrandar-
vegi eins og önnur ungmenni í vinnu-
flokki hreppsins.
Hún segir að það sé leiðinlegt að sjá
fuglshræin á veginum og sóðalegt. Hún
er að skrifa grein um málið og vonast til
að umræðan veki vegfarendur til um-
hugsunar og hægi á þeim. Hún segir að
varúðarskiltin hafi takmarkaða þýð-
ingu, fuglarnir séu svo víða. Þau hafi
svipaða þýðingu og að setja aðvörun á
botn djúpu laugarinnar um hvað hún sé
djúp.
Þá segist Jónína hafa heyrt að sumir
gerðu sér það að leik að aka niður fugla,
safna stigum með því að keyra á sem
flesta. Það eru viðstaddir sammála um
að sé ljótt að heyra.
Eins og að aka
í gegnum
húsdýragarð
VÍSINDAMENN frá Hafrann-
sóknastofnun tóku í gær sýni úr
hvalnum sem rak á land á Fitjum
við Sandgerði um helgina og gerðu
á honum nauðsynlegar rannsóknir.
Hræinu verður sökkt í hafið.
Staðfestu vísindamennirnir, Þor-
valdur Gunnlaugsson og Sverrir
Daníel Halldórsson, að um væri að
ræða hrefnutarf. Sögðu að hann
væri ungur en orðinn kynþroska.
Mældist hann 7,4 metrar á lengd.
Hrefnan er búin að vera að velkj-
ast í sjónum í nokkrum tíma,
kannski tíu daga–hálfan mánuð, og
er því farin að lykta illa. Ekki
hindraði það þó þá félaga í að
bragða á kjötinu.
Hafrannsóknastofnun fær til-
kynningar um þrjár sjóreknar
hrefnur eða svo á hverju ári en alls
tíu til fimmtán hvali.
Vísindamennirnir mæla með að
hræið verði dregið á haf út og sökkt
og hyggst Reynir Sveinsson í
Fræðasetrinu reyna að fá Björg-
unarsveitina Sigurvon til að gera
það við fyrsta tækifæri.
Morgunblaðið/Reynir Sveinsson
Þorvaldur tekur sýni en Sverrir Daníel gengur frá áhöldunum.
Hrefnunni verður
sökkt í hafið
Sandgerði
SJÓMANNA- og vélstjóra-
félag Grindavíkur á í við-
ræðum um leigu á veitinga-
stofunni Vör til nýs
rekstraraðila.
Forsvarsmenn Sjómanna-
og vélstjórafélags Grindavíkur
fóru fram á hækkun á leigu
fyrir veitingastofuna hjá nú-
verandi rekstraraðila. Sam-
kvæmt upplýsingum skrifstofu
félagsins var veitingamannin-
um gefinn þriggja mánaða
frestur til að gera gagntilboð
en þar sem það hafi ekki borist
hafi reksturinn verið auglýstur
frá og með 1. ágúst næstkom-
andi.
Fjögur tilboð bárust og voru
þau öll ásættanleg, að sögn
forsvarsmanns félagsins. Nú-
verandi rekstraraðili var með-
al þeirra sem lögðu inn tilboð
en stjórnin ákvað að taka til-
boði annars aðila gegn því að
hann legði fram nauðsynlegar
tryggingar.
Í Vör er veitingasala í sal
sem tekur 120 til 150 manns.
Auglýsa rekstur veit-
ingastofunnar Varar
Rætt við
nýjan
rekstrar-
aðila
Grindavík
SIGURVEIG Þorleifsdóttir er lista-
maður júlímánaðar í Reykjanesbæ.
Mynd eftir hana er sýnd í Kjarna,
Hafnargötu 57 í Keflavík, en með
þessu framtaki eru myndlist-
armenn í Félagi myndlistarmanna í
Reykjanesbæ kynntir einn af öðr-
um.
Sigurveig Þorleifsdóttir er fædd
14. febrúar 1933 að Naustahvammi
í Norðfirði. Hún flutti á Suðurnesin
árið 1954 og hefur búið í Reykja-
nesbæ frá árinu 1971. Sigurveig
hefur stundað list sína frá æsku og
sótt myndlistarnámskeið sem hald-
in hafa verið í Reykjanesbæ. Henn-
ar helsti leiðbeinandi var Margrét
Jónsdóttir.
Sigurveig tók þátt í nemendasýn-
ingu Baðstofunnar, félags áhuga-
manna um myndlist, árið 1990. Hún
hefur einnig haldið þrjár einkasýn-
ingar. Sú fyrsta, sem var nokkurs
konar yfirlitssýning á verkum
hennar, var haldin í Svarta pakk-
húsinu í Reykjanesbæ á árinu 2001.
Sumarið 2002 sýndi hún í Gríms-
nesinu og á Neskaupstað.
Sigurveig Þorleifsdóttir við málverkið sem sýnt er í Kjarna í júlímánuði.
Myndlistarmaður
mánaðarins kynntur
Reykjanesbær