Morgunblaðið - 19.10.2003, Síða 27

Ingólfur teiknaði blýantsskissur í
A4-stærð af bókinni allri á tveimur
mánuðum á síðasta ári. Þær skissur
þurfti að hreinteikna með blýanti,
bleki og pensli, helmingi stærri en
fyrstu skissurnar svo auðveldara
væri að vinna öll smáatriði. Myndirn-
ar voru svo skannaðar inn í tölvu og
þá var hægt að taka til við að lita þær
og setja textann inn á þær. Þetta
ferli, frá hreinteikningu og þar til
tilbúin síða lá fyrir, tók að meðaltali
tvo daga.
Embla Ýr flatlitaði margar síðanna
í tölvu, en flatlitun er það kallað þeg-
ar litir eru settir inn án nokkurs
skugga eða litbrigða. Ingólfur valdi
litina, Embla Ýr flatlitaði og Ingólfur
tók svo aftur við og fullvann litunina,
til dæmis með því að setja inn skugga
og ná þannig fram dýpt í myndunum.
Texti bókarinnar varð til um leið og
Ingólfur rissaði upp fyrstu skissur.
Embla Ýr segir að þarna sé auðvitað
ekki um textann úr Njálu að ræða,
því vegna þessa knappa forms hafi
þurft að gera breytingar og stytting-
ar. Textinn hafi þurft að vera á nú-
tíma íslensku, sem allir lesendur bók-
arinnar gætu skilið. „Þetta hefði
orðið vond myndasaga ef við hefðum
haldið okkur við texta Njálu,“ segir
hún. „Bókin geymir endursögn Njálu
í myndasöguformi. Hún er ekki
myndskreyting við söguna alla.“
Með pólitík í andlitinu
Ingólfur segir að hann hafi ekki
haft ákveðnar fyrirmyndir í huga
þegar hann mótaði útlit söguhetj-
anna. „Þær verða til í höfðinu á mér.“
Í bókinni virðist Snorri goði þó
merkilega líkur Össuri Skarphéðins-
syni. „Mér hefur verið bent á þetta,“
segir Ingólfur, „en ég hafði hann nú
ekki í huga. Stjórnmálamenn eru allt-
af stjórnmálamenn. Snorri goði er
kannski bara svona pólitískur í fram-
an. En í Njálu er ýmsar vísbendingar
að finna um útlit persónanna. Til
dæmis kemur fram að hár og skegg
sviðnaði af Kára og það gerist líka í
myndasögunni.“
Ein persóna í bókinni á sér lifandi
fyrirmynd. Það er Björn bóndi í
Mörk, sem er byggður á skopteikn-
ingum Ingólfs af vinnufélaga. „Þeir
eru ekkert líkir að öðru leyti,“ segir
Ingólfur og líklega eins gott að taka
það fram, því bóndinn í Njálu er raup-
söm gunga, þótt hann vilji gjarnan
láta gott af sér leiða.
Sýn tveggja lesenda á söguna
Blóðregn á að höfða til lesenda á
öllum aldri. „Við bjuggum til sögu
sem við vildum lesa sjálf. Þetta er bók
fyrir börn og fyrir fólk sem las Prins
Valiant í bernsku og er enn að lesa
myndasögur, 40 árum síðar. Við meg-
um ekki vanmeta hve margir eru vel
myndlæsir. Vonandi geta unnendur
Njálu haft gaman af bókinni, en við
erum líka að reyna að kveikja áhuga
þeirra sem aldrei hafa litið í söguna.
Titillinn, Blóðregn, virkar kannski
fráhrindandi á einhverja, en það
verður að hafa í huga að við gerð
myndasögu sem byggist á Njálu er
ekki hægt að komast hjá því að skýra
frá bardögum og mannvígum. Höf-
undur Njálu notar skopskyn til að
draga versta broddinn úr þessum at-
riðum og við gerum það líka, án þess
að fara út í einhvern fíflagang.“
Embla Ýr og Ingólfur Örn eru þeg-
ar búin að gera drög að handriti
næstu bókar. „Sú bók byrjar á brúð-
kaupi Höskuldar Hvítanesgoða og
endar á brennunni. Áherslan flyst þá
frá Kára, sem er hetjan í Blóðregni,
en Skarphéðinn verður hetjan í
næstu bók. Þá verður persóna Marð-
ar líka skýrari. Vonandi verður þetta
eins konar leynilögreglusaga. Ein-
hvers staðar í upphafi leynast atburð-
ir, sem komu þessari atburðarás af
stað. Við ætlum að rekja okkur aftur
að þeim atburðum og sjá hvar þessi
vítahringur víga og hefnda hefst.
Sagan er svo flókin að við fyrsta lest-
ur skilja menn ef til vill ekki orsaka-
samhengið. Reyndar eru skoðanir á
því hvað fór úrskeiðis nánast jafn
margar og lesendur. Við erum tveir
lesendur með okkar sýn á söguna.“
Framboð á íslenskum myndasög-
um hefur ekki verið mikið og í raun
segjast þau Embla og Ingólfur renna
blint í sjóinn með Blóðregn. „Það var
djörf ákvörðun hjá Máli og menningu
að gefa bókina út. Þar á bæ vita menn
að vísu að stór hópur fólks les mynda-
sögur og bara tímaspursmál hvenær
ráðist yrði í útgáfu sem höfðar til al-
mennings. Við vonum að lesendur
taki Blóðregni vel, svo við getum
haldið áfram með bókaflokkinn.
Þetta er skemmtilegasta verkefni
sem við höfum ráðist í.“
rsv@mbl.is
Í upphafi bókarinnar hleypur Kári Sölmundarson út úr logandi húsunum á Bergþórshvoli. Föt hans eru í ljósum logum, hár
og skegg sviðið. Hann á harma að hefna, því í brennunni fórust vinir hans og fjölskylda, þar á meðal barnungur sonur.
TENGLAR
.....................................................
www.njalusogur.is.
MORGUNBLAÐIÐ SUNNUDAGUR 19. OKTÓBER 2003 27
VEÐUR mbl.is