Morgunblaðið - 16.04.2004, Blaðsíða 16
VIÐSKIPTI/ATHAFNALÍF
16 FÖSTUDAGUR 16. APRÍL 2004 MORGUNBLAÐIÐ
SAMHLIÐA innflutningur á lyfjum, þ.e. innflutn-
ingur lyfja á vegum annarra en umboðsaðila, hefur
ekki verið skoðaður hjá lyfsölukeðjunum tveimur,
Lyfju hf. og Lyfjum & heilsu hf., en hvorugt fyr-
irtækið flytur inn lyf.
Ingi Guðjónsson framkvæmdastjóri Lyfju, seg-
ir að samhliða innflutningur á lyfjum verði örugg-
lega skoðaður, ef það geti verið leið til að ná niður
verði.
„Við erum mjög meðvituð um þann möguleika
að fara út í samhliða innflutning, sérstaklega með
tilliti til þess að ég vil meina að við séum ekki að fá
þau kjör hjá okkar birgjum sem ætla mætti, miðað
við veltu og stærð Lyfju,“ segir Ingi. „Við erum
alltaf að leita leiða til að bæta okkar kjör hjá birgj-
um. Ef þetta er leið sem er möguleg fyrir okkur til
að ná niður verði þá munum við örugglega skoða
það.“
Lyfja er í 45% eigu Inga Guðjónssonar og Ró-
berts Melax, stofnenda fyrirtækisins, og í 55%
eigu Haga hf., sem áður hétu Baugur Ísland og
reka Hagkaup, Bónus og margar fleiri verslanir.
Ingólfur Garðarsson, markaðsstjóri Lyfja &
heilsu, segir að fyrirtækið stundi ekki innflutning
á lyfjum, og samhliða innflutningur hafi ekki kom-
ið til skoðunar hjá því.
Lyf & heilsa er í samstarfi við Kaupás, en fyrir
rúmu ári var gengið frá samstarfssamningi milli
fyrirtækjanna sem felur í sér að Lyf & heilsa mun
opna lyfjaverslanir í verslunarkjörnum þar sem
Kaupás rekur dagvöruverslanir.
Með samhliða innflutningi er átt við að þó svo að
umboðsaðili fyrir ákveðið lyf flytji það inn til lands,
þá geti hver sá sem hefur tilskilin leyfi keypt um-
rætt lyf annars staðar og flutt það inn og selt.
Ekki í samkeppni við sjálfa sig
Í nýlegri skýrslu Ríkisendurskoðunar um lyfja-
kostnað, notkun, verð og framboð lyfja á Íslandi,
kemur fram að innflutningur og dreifing lyfja hér
á landi er nær allur í höndum þriggja heildsölu- og
dreifingarfyrirtækja. Þetta eru Lyfjadreifing ehf.,
PharmaNor hf. og Austurbakki hf. Markaðshlut-
deild þessara þriggja fyrirtækja var samtals
99,9% á síðasta ári, en Lyfjadreifing og Pharma-
Nor, og aðilar í viðskiptum við þau, flytja inn og
dreifa yfir 90% lyfja sem eru á markaði hér á landi.
Hreggviður Jónsson, forstjóri PharmaNor, seg-
ir að fyrirtækið geti eðli máls samkvæmt ekki
stundað samhliða innflutning á lyfjum. Pharma-
Nor væri þá að fara út í samkeppni við sjálft sig,
því samhliða innflutningur gangi út á að skrá sama
lyfið á markað tvisvar sinnum. Það gengi ekki upp
gagnvart þeim lyfjaframleiðendum sem Pharma-
Nor er umboðsaðili fyrir.
Fyrirtækið Lyfjaver flutti inn það 0,1% lyfja
sem innflutningsfyrirtækin þrjú, Lyfjadreifing,
PharmaNor og Austurbakki fluttu ekki inn. Eins
og fram kom í Morgunblaðinu í gær er sá samhliða
innflutningur lyfja, sem nú er hér á landi, í hönd-
um Lyfjavers. Fyrirtækið flytur nú inn samtals 11
lyf undir 27 vörunúmerum en vinnur að því að
auka framboðið í um 100 lyf.
Framkvæmdastjóri Lyfju hf. um samhliða innflutning á lyfjum
Örugglega skoðað ef
hægt er að lækka verð
BYGGINGARFRAMKVÆMDIR
við nýtt prentsmiðjuhús Árvakurs
hf., útgáfufélags Morgunblaðsins,
í Hádegismóum norðan Rauða-
vatns ganga vel. Nýja húsið er
um 7.500 fermetrar að stærð og
er nú að mestu fokhelt. Uppsetn-
ing prentvélar og annars vélbún-
aðar er hafin og fyrirhugað er að
Morgunblaðið verði prentað í
nýrri prentvél um mánaðamót
september, október í haust. Flyst
þá starfsemi prentsmiðjunnar í
Hádegismóa, en áfram verða aðr-
ar deildir blaðsins með aðsetur í
Kringlunni 1.
Guðbrandur Magnússon, fram-
leiðslustjóri Morgunblaðsins, seg-
ir að ekki hafi verið tekin
ákvörðun um nýtingu gamla
prentsmiðjuhússins í Kringlunni
eða lóðar sem Morgunblaðið á
þar ónýtta.
„Með nýrri prentvél aukast
litamöguleikar og afkastageta, en
einnig rekstraröryggi. Prentgæði
munu einnig aukast til muna. Þá
verður mögulegt í nýrri prent-
smiðju að hefta og skera blöð,
sem áður hefur þurft að kaupa
að, einnig verður mögulegt að
gefa út blöð í litlu tímaritsbroti,“
segir Guðbrandur. „Búnaður til
innskota á auglýsinga- og kynn-
ingarefni verður afkastameiri en
nú er og nýir möguleikar í mark-
aðssetningu munu bjóðast auglýs-
endum.“
Guðbrandur segir að þrátt fyr-
ir að prentsmiðjan í Hádegis-
móum sé í jaðri Reykjavíkur þá
sé staðsetningin afar heppileg
með hliðsjón af dreifileiðum,
beinar leiðir liggi til allra átta.
ÞG-verktakar hafa með hönd-
um byggingu prentsmiðjuhússins
í Hádegismóum og munu skila því
fullbúnu.
Morgunblaðið/Árni Sæberg
Ný prentsmiðja í Hádegismóum
MILESTONE Import Export
Ltd., félag í eigu systkinanna Karls
Wernerssonar, Steingríms Wern-
erssonar og Ingunnar Werners-
dóttur, hefur aukið hlut sinn í Ís-
landsbanka um 3,5%. Eignarhlutur
félagsins í bankanum eftir kaupin
er 12,28%, en var 8,78% fyrir þau.
Frá þessu var greint í tilkynningu
til Kauphallar Íslands í gær.
Fjöldi hluta í viðskiptunum er
350 milljónir, gengið 8,34 og kaup-
verðið því liðlega 2,9 milljarðar
króna.
Karl Wernersson sagði í samtali
við Morgunblaðið í gær að þessi
fjárfestingarákvörðun hefði verið
tekin á svipuðum grunni og þegar
Milestone bætti við sig 3% í Ís-
landsbanka í febrúar síðastliðnum.
„Við álítum að bankinn sé mjög
góður fjárfestingarkostur, og vild-
um fylgja þeim ávinningi, sem við
höfum haft hingað til, betur eftir
með því að fjárfesta enn meira,“
sagði Karl.
Ætla má að Milestone Import
Export Ltd. sé stærsti hluthafinn í
Íslandsbanka eftir þessi viðskipti.
Með fyrirvara um samþykki
Fjármálaeftirlitsins
Viðskiptin eru gerð með fram-
virkum samningi, sem er á gjald-
daga 15. júlí 2004, en það er
Straumur Fjárfestingarbanki hf.
sem fjármagnar kaupin. Þau eru
jafnframt gerð með fyrirvara um
samþykki Fjármálaeftirlitsins
vegna ákvæða laga um virka eign-
arhluti í fjármálafyrirtækjum.
Í 40. grein laga nr. 161/2002 um
fjármálafyrirtæki segir að aðilar
sem hyggjast eignast virkan eign-
arhlut í fjármálafyrirtæki skuli
leita samþykkis Fjármálaeftirlits-
ins fyrir fram. Með virkum eign-
arhlut er átt við beina eða óbeina
hlutdeild í fyrirtæki sem nemur
10% eða meira af eigin fé, stofnfé
eða atkvæðisrétti, eða aðra hlut-
deild sem gerir kleift að hafa veru-
leg áhrif á stjórnun viðkomandi
fyrirtækis.
Lokaverð hlutabréfa í Íslands-
banka í Kauphöll Íslands var 8,50 í
gær.
Wernersbörn með rúm
12% í Íslandsbanka
● NAFN Baugs Group var nefnt 339
sinnum í brezka viðskiptablaðinu The
Financial Times
síðastliðna 12
mánuði, sam-
kvæmt lauslegri
athugun Verzl-
unarráðs Ís-
lands.
„Ekki er langt
síðan að það taldist til tíðinda hér-
lendis ef Ísland eða íslensk fyrirtæki
voru nefnd í erlendum viðskipta-
tímaritum. Nú er slík umfjöllun orðið
daglegt brauð,“ segir í pistli á vef
Verzlunarráðsins.
Þannig bendir VÍ á að Pharmaco
hafi verið getið 11 sinnum í danska
viðskiptablaðinu Børsen á síðustu tólf
mánuðum og Baugur tvívegis. Þá var
Kaupþing nefnt 85 sinnum í sænska
viðskiptablaðinu Dagens Industri.
Talsverð umfjöllun var um deCODE
Genetics í dagblöðum á borð við Wall
Street Journal í Bandaríkjunum.
„Umfjöllun um íslensk fyrirtæki í er-
lendum fjölmiðlum er mikil landkynn-
ing. Að sumu leyti má án efa fullyrða
að útrásarfyrirtækin hafi smám sam-
an verið að læra á erlendu pressuna
en þýðingarmest er án efa sú stað-
reynd að fyrirtækjunum hefur vegnað
vel erlendis,“ segir á vef Verzl-
unarráðs. Það kemur jafnframt fram
að VÍ muni á næstu mánuðum, í sam-
ráði við hin ýmsu millilandaráð og aðr-
ar þær stofnanir sem fjalla um þessi
mál hérlendis, skoða hvernig megi
nýta þessi auknu tækifæri til að
stuðla að meiri áhuga erlendra fjár-
festa og fyrirtækja á því að vinna með
íslenskum fyrirtækjum eða fjárfesta í
þeim.
Baugur nefndur
339 sinnum í FT
● TÆKNIVAL hefur hlotið viður-
kenningu Cisco Systems vegna sér-
þekkingar á þráðlausum stað-
arnetum en
slíkum kerfum fer
fjölgandi hér á
landi sem annars
staðar. Við-
urkenningin –
Cisco Wireless
LAN Specialized Partner – er veitt
samstarfsfyrirtækjum sem skara
fram úr á þessu sviði, að því er
fram kemur í tilkynningu frá Tækni-
vali.
„Viðurkenning sem þessi felur í
sér mikla gæðavottun fyrir Tækni-
val,“ segir Sigurður Gunnar Giss-
urarson viðskiptastjóri Tæknivals í
tilkynningu. „Cisco vottar með við-
urkenningu að fyrirtæki uppfylli til-
tekin skilyrði um menntun og þjón-
ustustig. Tæknival hefur lengi haft
á að skipa sérfræðingum í Cisco-
búnaði og með þessari endurnýjun
verðum við áfram í fremstu röð.“
Tæknival fær viður-
kenningu Cisco
ÞETTA HELST …
VIÐSKIPTI
RÚMLEGA fjórðungur veltuhæstu
fyrirtækja landsins hyggst fjárfesta
meira í ár en í fyrra. Þetta kemur
fram í könnun IMG Gallup, sem sagt
var frá í Vefriti fjármálaráðuneytis-
ins í gær. Könnunin var framkvæmd
15. febrúar til 9. mars. Fram kom
m.a. að 26% aðspurðra hyggjast fjár-
festa meira í ár en árið 2003, 26%
minna en 48% álíka mikið.
„Fyrirtæki er starfa á sviði flutn-
inga og ferðaþjónustu hyggjast auka
hlutfallslega mest fjárfestingarút-
gjöld sín á þessu ári eða um 146%.
Fjármála- og tryggingafyrirtæki
hyggjast auka fjárfestingu um 20% í
ár og opinber fyrirtæki og stofnanir
um 14,3%. Fyrirtæki er starfa á sviði
verslunar og þjónustu hyggjast auka
fjárfestingu sína um 10,5%, iðnaðar-
og framleiðslufyrirtæki um 5,7% en
samkvæmt könnuninni verða óveru-
legar breytingar milli ára hjá ráð-
gjafar- og þjónustufyrirtækjum. Í
könnuninni kom hins vegar fram að
sjávarútvegsfyrirtækin hyggjast
draga úr fjárfestingum sínum í ár
eða um þriðjung miðað við árið
2003,“ segir í Vefritinu. Könnunin
náði til 400 veltuhæstu fyrirtækja
landsins og var svarhlutfallið 79,5%.
Fyrirtæki
hyggjast
auka fjár-
festingu
Sala M&S
dregst saman
● SALA dróst saman á síðasta fjórð-
ungi reikningsársins hjá bresku
verslanakeðjunni Marks & Spencer,
að því er segir í frétt Reuters-
fréttastofunnar. Samdrátturinn var
5,2% í annarri vöru en matvöru, sem
er mun verri niðurstaða en grein-
endur á markaði höfðu spáð. Sala
matvöru hefur dregist saman um
1,4% það sem af er ári, en búist
hafði verið við 2% vexti.
Gengi hlutabréfa M&S lækkaði í
gærmorgun um 5% við þessi tíðindi.
Fyrirtækið hefur ekki bætt mark-
aðshlutdeild sína í fimmtán mánuði,
en þar áður hafði hlutdeildin aukist
um 1%. Markaðshlutdeildin er nú
11%, sem er 2% minni hlutdeild en í
lok síðasta áratugar.
Sala Big
Food Group
stendur í stað
SALA í verslunum bresku verslana-
keðjunnar Big Food Group (BFG)
stóð í stað á fjórða fjórðungi reikn-
ingsársins, mælt í sölu hverrar versl-
unar fyrir sig, að því er segir í frétt
Reuters-fréttastofunnar. Þar kemur
fram að samkeppni á markaðnum
fari vaxandi, en að keðjan telji sig
muni ná markmiðum um sölu fyrir
árið í heild. Haft er eftir Bill Grims-
ey, forstjóra BFG, að bætt framlegð
og mikið kostnaðaraðhald myndi
gera fyrirtækinu kleift að standa
undir væntingum.
Gengi BFG hefur lækkað úr um
180 pensum í febrúar í rúmlega 130
pens nú.
Baugur Group á rúm 22% í BFG
og gengistap hans frá því í febrúar er
því umtalsvert. Baugur hefur þó
hagnast um marga milljarða á fjár-
festingunni því hann keypti þegar
gengið var mun lægra en það er nú,
m.a. stóran hlut á genginu 38 pens.
♦♦♦