Morgunblaðið - 17.10.2004, Blaðsíða 18

18 SUNDAY 17. OCTOBER 2004 MORGUNBLAÐIÐ
Erna Gísladóttir hefur starf-að hjá B&L síðan 1987 oger nú forstjóri fyrirtækis-ins. Hún er dóttir GíslaGuðmundssonar, núver-
andi stjórnarformanns fyrirtækisins
en að auki starfar sonur hans og
bróðir Ernu, Guðmundur, sem mark-
aðsstjóri hjá B&L.
Sögu fyrirtækisins má rekja til
Þorskastríðsins við Breta 1953. Erna
segir að átökin við Breta hafi valdið
því að utanríkisverslun Íslendinga
beindist að miklu leyti til Sovétríkj-
anna sálugu nánast í formi vöru-
skipta. Sovétmenn keyptu sjávaraf-
urðir af Íslendingum en óskuðu þess í
staðinn að Íslendingar keyptu af
þeim iðnaðarvöru auk olíu.
„Þetta varð til þess að allir bif-
reiðainnflytjendur þess tíma tóku sig
saman og stofnuðu Bifreiðar og land-
búnaðarvélar. Fljótlega kvarnaðist
þó úr hópnum og fyrirtækið hefur
síðan verið í eigu einnar og sömu fjöl-
skyldunnar.
Fyrirtækið var nánast eingöngu
með vörur frá Sovétríkjunum fram til
1992, að undanskildum vélsleðum frá
Arctic Cat, en hefur reyndar aldrei
flutt inn landbúnaðarvélar, sem þó er
seinni hlutinn í nafni þess. Í upphafi
var ætlunin sú að flytja jafnt inn bif-
reiðar og landbúnaðarvörur en strax
þróaðist þetta eingöngu út í bílainn-
flutning og hefur verið það síðan,“
segir Erna.
Tekið við umboði fyrir Hyundai
Miklar breytingar urðu á fyrirtæk-
inu árið 1992 þegar það tók við um-
boði fyrir Hyundai bíla frá Kóreu. Á
þeim tíma hófst mikil endurmenntun
hjá starfsmönnum fyrirtækisins og
breytingar innan þess auk þess sem
ímynd þess breyttist. Fram að þess-
um tíma hafði fyrirtækið eingöngu
verslað með rússneska bíla, þ.e.a.s.
Moscowitch, Pobeda, Gaz, Volga og
Lada. Lada varð söluhæsta merkið
og náði því meira að segja að verða
söluhæsti bíllinn á Íslandi 1987.
„Við höfum gengið í gegnum mikl-
ar sveiflur á þessum tíma. Eitt árið
seldum við um 50 bíla en mest um
2.000 bíla á einu ári. Sveiflur af þessu
tagi eru lýsandi fyrir íslenska bíla-
markaðinn.“
BMW og Renault bætast við
Í janúar 1995 tók B&L jafnframt
við umboði fyrir BMW og Renault af
Bílaumboðinu. Auk þess bættist í
kjölfarið við umboð fyrir Land Rover
eftir að BMW eignaðist það fyrir-
tæki. Land Rover hefur síðan skipt
um eigendur á ný og er komið undir
handarjaðar Ford en íslenska um-
boðið er ennþá hjá B&L.
„Við erum því með breiða línu af
bílum og getum boðið öllum eitthvað
sem hentar. Það hefur verið okkar
markmið að geta veitt einstaklingum
alhliða þjónustu en einnig erum við
með fyrirtækjaþjónustu og margvís-
legar lausnir í tengslum við það.“
Enn ein tímamótin í sögu B&L
urðu fyrir fimm árum þegar það flutti
alla sína starfsemi úr fjórum húsum
við Ármúla og Suðurlandsbraut und-
ir eitt þak í nýbyggingu sem fyrir-
tækið lét reisa fyrir sig á Grjóthálsi.
Þar starfa nú um eitt hundrað
manns. Fyrirtækið velti á síðasta ári
um fimm milljörðum kr. og veltan
stefnir í að verða sex milljarðar á
þessu ári. Söluaukning á nýjum bíl-
um það sem af er þessu ári er nálægt
18% og hefur söluaukning B&L verið
í takt við þá aukningu. Erna segir að
fyrirtækið stefni í að skila ágætum
hagnaði á þessu ári.
„Þegar við horfum til framtíðar
sjáum við að ýmsar breytingar eru að
verða á markaðnum og á þessum
tímamótum horfum við fram
á veginn og reynum að rýna í
hvað framtíðin ber í skauti
sér. Tækifærum til fjár-
mögnunar hefur fjölgað mik-
ið á síðustu árum og misser-
um og menn geta farið
margar ólíkar leiðir til þess
að eignast bíla. Ég held að
það sama verði upp á ten-
ingnum hvað varðar þjón-
ustuþáttinn. Viðskiptavinir
munu í framtíðinni geta valið
þjónustustigið eftir því hvað
hverjum og einum hentar.
Með rekstrarleigubílunum
var bryddað upp á því að við-
skiptavinir geta valið mikla
þjónustu eða minni þjónustu.
Rekstrarleigan hefur breytt
eðli starfseminnar í grund-
vallaratriðum. Rekstrarleig-
an auðveldar fólki að skipta
um bíl og nú eru ekki lengur
til staðar þær háu greiðslur
sem oft þurfti að reiða af
hendi þegar skipt var yfir í
nýrri bíl. Viðskiptavinurinn
þarf ekki að hafa áhyggjur af afföll-
um heldur greiðir mánaðarlegar
greiðslur fyrir afnot af bíl og þjón-
ustu,“ segir Erna.
Grænir skattar í stað vörugjalda
Hún segir að upp undir helmingur
allra bílaviðskipta sé nú í formi bíla-
lána af þessu tagi og fari það vaxandi.
Vissulega sé þetta form til þess fallið
að auka stöðugleika í rekstri bílaum-
boðanna. Vextir fari lækkandi af bíla-
lánum og samkeppni sé að skapast á
þessum markaði. „Ég held að sam-
keppnin eigi eftir aukast enn frekar á
þessu sviði því viðskiptavinir í rekstr-
ar- og einkaleigu hafa reynst einstak-
lega skilvísir og góðir greiðendur.
Bíllinn er ein af föstum þörf-
um hér á landi; vegalengdir
eru miklar og umhverfið er
með þeim hætti að flestir
verða að hafa bíl á heim-
ilinu.“
Erna, sem jafnframt er
formaður Bílgreinasam-
bands Íslands, man tímana
tvenna í viðskiptaumhverf-
inu. „Fyrir ekki svo mörgum
árum voru sjö vörugjalds-
flokkar yfir bíla eftir vélar-
stærð þeirra, en eru nú
komnir niður í tvo. Við erum
að vona að þeim fækki enn
frekar en þetta er samt mikil
breyting frá því að vörugjald
á innflutta bíla var allt að
70%.“
Hún segir að til lengri
tíma sé eðlilegt að fella niður
aðflutningsgjöld á bíla og
taka þess í stað upp svo-
nefnda græna skatta, þ.e.a.s.
að greitt verði í samræmi við
notkunina en ekki kaup á bíl.
„Mér finnst eðlilegt að þeir
sem kjósa að vera á eyðslufrekum bíl-
um, sem menga meira og slíta vegum
meira, greiði meira fyrir notkunina
en þeir sem kjósa eyðsluminni bíla.
Þessi umræða hefur komið upp öðru
hvoru en því má ekki gleyma að
tekjur ríkisins af bílgreininni og öllu
henni tengdu eru afar miklar og þess
vegna er mjög viðkvæmt að hreyfa
mikið við kerfinu eins og það er. Ég
tel að það sé ekki grundvöllur til þess
að taka upp græna skatta og leggja
þá ofan á þær álögur sem fyrir eru.“
B&L hefur einnig unnið að gæða-
stjórnun innan fyrirtækisins og verið
er að undirbúa að taka upp gæða-
stjórnunarkerfi frá BMW. „Þetta er
alþjóðlegt gæðastjórnunarkerfi sem
er til staðar hjá flestum BMW inn-
flutningsaðilum í heiminum. Nýja
kerfið mun straumlínulaga allt starf
hjá okkur og við ætlum að nýta það
yfir öll merkin sem við erum með og
fengum sérstaka heimild til þess hjá
BMW. Um er að ræða staðla í vinnu-
ferlum og mælingar sem henta fyr-
irtæki sem er í svona rekstri.“
Sveiflur í bílasölunni
B&L hefur ekki síður en aðrir bíla-
innflytjendur búið við miklar sveiflur
í sölu á nýjum bílum. 2001 varð t.d.
samdráttur í sölu á nýjum bílum um
45%. Þessi misserin er hins vegar líf-
leg bílasala og kveðst Erna ekki bú-
ast við samdrætti fyrr en á árinu
2007. „Ég held að við sjáum ekki aft-
ur samdráttarskeið eins og árið 2001
en þróunin í gengismálum er fljót að
hafa áhrif á þessa grein. Bílgreinin
hefur tekið sig mikið á í gengismál-
um. Mörg fyrirtæki hafa gengis-
tryggt sig og sömuleiðis hafa menn
lært sína lexíu varðandi notuðu bíl-
ana. Eftir uppganginn árið 2000 áttu
öll umboðin stóran flota af notuðum
bílum. Það sem hefur breyst í þeirri
uppsveiflu sem núna stendur yfir er
að birgðasöfnun á notuðum bílum
hefur ekki átt sér stað. Ástæðan er sú
að uppítökuverðið er réttara sem aft-
ur eykur söluhæfni notaðra bíla.
Þetta er ákaflega jákvætt og ýtir
undir betra rekstrarumhverfi í grein-
inni.“
Hún segir að það hafi tíðkast að
bílaumboðin yfirbyðu hvert annað og
hefðu verið farin að kaupa notaða bíla
inn á hærra verði en hægt var að selja
þá aftur á. „Ég held að margir hafi
lært mikið af þessu í síðustu upp-
sveiflu enda var tapið í greininni þá
gríðarlegt.“
B&L hefur nánast alla tíð verið í
eigu sömu fjölskyldunnar. Guðmund-
ur Gíslason, einn af stofnendum Bif-
reiða og landbúnaðarvéla, er hættur
störfum fyrir allnokkru en kemur
reglulega í fyrirtækið og heilsar upp
á fólkið. „Það er gott að leita til afa ef
eitthvað sérstakt kemur upp á.
Pabbi, Gísli Guðmundsson, er starf-
andi stjórnarformaður og við höfum
því góðan brunn að sækja í.“
Fjölskyldufyrirtæki í 50 ár
Um þessar mundir eru 50
ár liðin frá því fyrirtækið
Bifreiðar og landbún-
aðarvélar var stofnað og
er saga og tilurð þess
nokkuð sérstæð.
Morgunblaðið/Kristinn
Erna Gísladóttir, forstjóri B&L.
B&L fluttu í nýtt húsnæði á Grjóthálsi fyrir fimm árum.
B&L hafa umboð fyrir BMW, Land Rover, Renault og Hyundai.
gugu@mbl.is