Morgunblaðið - 24.02.2005, Síða 18

18 FIMMTUDAGUR 24. FEBRÚAR 2005 MORGUNBLAÐIÐ
MINNSTAÐUR
Afhentu undirskriftalista | Bæjarstjórn
Fjarðabyggðar hefur verið afhentur und-
irskriftalisti með nöfnum rúmlega 400
Eskfirðinga sem mótmæla lokun bæjar-
skrifstofa Fjarðarbyggðar á Eskifirði. Það
voru þeir Friðrik Þorvaldsson, Hákon Sóf-
usson og Guðmundur Auðbjörnsson sem
afhentu Smára Geirssyni forseta bæj-
arstjórnar Fjarðabyggðar mótmælin. Á
fundi bæjarráðs 2. febrúar sl. var farið yf-
ir skipulag skrifstofuhalds hjá Fjarða-
byggð og samþykkt að starfsmenn á Eski-
firði hafi vinnuaðstöðu sína framvegis í
verslunarmiðstöðinni Molanum sem nú er
að rísa á Reyðarfirði.
  
Morgunblaðið/Kristín Ágústsdóttir
AUSTURLAND
HÖFUÐBORGARSVÆÐIÐ
Miðbærinn | Stórvirkar vinnuvélar hafa grafið djúp-
an skurð í gegnum Hljómskálagarðinn, en þar er
verið að grafa fyrir frárennsli fyrir regnvatn á nýrri
Hringbraut, og liggur skurðurinn að Skothúsvegi
þar sem frárennslið tengist niðurfallskerfi.
„Áður var þarna dælubrunnur sem er aflagður, og
nú er þetta gert með sjálfrennsli. En þá þurfti að
fara í gegnum Hljómskálagarðinn til þess að ná
þessu sjálfrennsli af Hringbrautinni, því þá þarf að
hafa halla á lögninni frá Hringbraut niður að Skot-
húsvegi,“ segir Höskuldur Tryggvason, deildarstjóri
framkvæmdasviðs Reykjavíkurborgar.
Höskuldur segir að valin hafi verið leið sér-
staklega með það í huga að raska sem minnstu af
markverðum gróðri sem þarna er, og gengið verði
vel frá öllu að framkvæmdum loknum. Tíu tré voru
tekin upp með rótum og verða gróðursett aftur.
Reiknað er með að jarðvinnu í garðinum ljúki um
miðjan mars, en þökulögn og gróðursetning gæti
dregist fram í apríl.
Morgunblaðið/Ómar
Grafið í garðinum Grafa þurfti skurð í gegnum Hljómskálagarðinn til að koma lögnum vegna
nýrrar Hringbrautar fyrir, og var valin leið í gegnum garðinn til að takmarka skaðann.
Grafið í gegnum
Hljómskálagarðinn
Egilsstaðir | Rauði kross Íslands
stendur fyrir námskeiði fyrir að-
standendur geðfatlaðra og áhuga-
menn um geðheilbrigðismál á Aust-
urlandi 25. og 26. febrúar nk.
Starf með geðfötluðum er eitt af
áhersluverkefnum Rauða krossins.
Þarfakönnun á síðasta ári leiddi í
ljós áhuga á námskeiði sem ætlað
er aðstandendum fólks með geð-
raskanir og öðru áhugafólki um
málefnið.
Meðal fyrirlesara á námskeiðinu
eru séra Birgir Ásgeirsson, Guð-
björg Sveinsdóttir geðhjúkr-
unarfræðingur, Salbjörg Bjarna-
dóttir geðhjúkrunarfræðingur,
Arndís Ósk Jónsdóttir frá Geðhjálp
og Margrét Ómarsdóttir, foreldri
einstaklings með geðraskanir.
Námskeiðið hefst kl. 18 föstudag-
inn 25. febrúar og því lýkur kl. 16 á
laugardeginum. Námskeiðið fer
fram í húsi Rauða krossins að Mið-
ási 1–5 á Egilsstöðum og er þátttak-
endum að kostnaðarlausu.
  
Námskeið fyrir
aðstandendur
geðfatlaðra
Tengivirkishús | Starfsmenn Keflavík-
urverktaka eru byrjaðir á grunni vænt-
anlegs tengivirkishúss Kárahnjúkavirkj-
unar í Fljótsdal, við op strengjaganganna
inn að spennasalnum í Valþjófsstaðarfjalli.
Tengivirkishúsið rís á vegum nýja orku-
dreifingarfyrirtækisins Landsnets og það-
an verður raforkan flutt til kaupandans,
Fjarðaáls, við Reyðarfjörð. Sömuleiðis
verður virkjunin tengd byggðalínu.Tengi-
virkishúsið verður önnur tveggja sýnilegra
bygginga Kárahnjúkavirkjunar í Fljótsdal,
hin er hlaðhúsið sem Fosskraft JV reisir við
munna aðkomuganganna. Vel viðrar til
byggingarvinnu í Fljótsdal um þessar
mundir og raunar er fátt sem minnir á há-
vetur þar um slóðir. Snjólaust er á láglendi
og varla hægt að tala um snjó til fjalla held-
ur. Landsvirkjun og Keflavíkurverktakar
undirrituðu framkvæmdasamninginn í
september 2004. Þar er kveðið á um að
verktakafyrirtækið byggi tengivirkishúsið
ásamt strengjastokki á milli gangamunna
og húss og annist jarðvinnu vegna lagn-
ingar strengs frá tengivirkinu undir Jök-
ulsá í Fljótsdal að tengistað við byggðalínu.
Verkinu skal ljúka að fullu fyrir júlílok
2006. Frá þessu greinir á vefnum kara-
hnjukar.is.
Reyðarfjörður | „Við leggjum afar
mikið upp úr öryggismálum hér og
þetta hefur gengið ótrúlega vel,“
segir Anna Margrét Kornelíus-
dóttir, öryggisfulltrúi á byggingar-
svæði álvers Fjarðaáls Alcoa á
Reyðarfirði.
„Hversu vel þetta gengur sýnir
sig til dæmis í því að frá því að ég
hóf hér störf 15. september sl. hafa
engin fjarveruslys orðið á svæðinu.
Það eru þó engin vettlingatök í
gangi því hér eru á milli 5 og 6 tonn
af jarðvegi flutt á hverri einustu
vakt. Menn eru duglegir að minna
hver annan á að vera með hjálm-
ana, hlífðargleraugun og annan ör-
yggisbúnað.“
Anna Margrét segir íslenska
starfsmenn á svæðinu hafa verið
nokkuð neikvæða í byrjun og þeim
þótt fulllangt gengið í öryggiskröf-
um. „Svona er þetta hér og það er
ekki spurning að okkar öryggis-
kröfur eru fordæmisgefandi fyrir
önnur verktakafyrirtæki hér á
landi. Við höfum verið með nokkra
einstaklinga við störf hér, sem hafa
hætt og stofnað eigin fyrirtæki og
þeir láta sömu öryggisreglur gilda
hjá sér. Þetta er því besta mál.“
Breitt undir vinnuvélar
Anna tekur sem dæmi um ör-
yggiskröfur að breiddur sé dúkur
undir þær vinnuvélar sem standa
kyrrar í meira en tvo sólarhringa,
menn moki strax upp ef spilliefni
fari í jörð og setji í þar til gerðan
spilliefnagám og að í hverju tæki sé
spilliefnabúnaður til nota ef eitt-
hvað kemur upp á. „Það sem
mönnum þótti fáránlegast til að
byrja með var að þeir máttu ekki
hoppa ofan af tækjunum, en það er
náttúrlega bara lógískt, menn eiga
ekki að þurfa að fótbrjóta sig.“
Starfsmenn fá munnlega áminn-
ingu fyrir öryggisbrot í fyrsta sinn,
skriflega áminningu í annað skipti
og öryggisfulltrúi eða verkstjóri
ræðir við viðkomandi og við þriðja
brot er mönnum vísað úr vinnu.
„Það fara allir á öryggisnámskeið
þegar þeir mæta á svæðið og það
er mjög skýrt að ef þú vilt ekki
vinna eftir þessum reglum geturðu
bara unnið annars staðar.“ Anna
segir lítið um áminningar og eng-
inn hafi verið rekinn frá því að hún
hóf störf.
Þetta er í fyrsta sinn sem Anna
sinnir starfi öryggisfulltrúa, en
hún er langt komin í verkfræði-
námi.
Fjarveruslys fátíð hjá Bechtel
Fjöldi fjarveruslysa (slys á
vinnustað sem hefur þær afleiðing-
ar að starfsmaður tapar vinnudegi)
hjá Bechtel, ef miðað er við 200
þúsund vinnustundir er 0,13, eða 1
af hverjum 769 starfsmönnum. Hjá
Alcoa slasast 1 af hverjum 1.429
starfsmönnum (0,07) sé miðað við
sömu forsendur, en íslenskt lands-
meðaltal er 0,91, eða 1 af hverjum
110 starfsmönnum. Í mannvirkja-
gerð hérlendis slasast 1 af hverjum
68 starfsmönnum og er hlutfallið
1,47. Upplýsingarnar eru fengnar
frá Alcoa, Bechtel og Inpro.
Morgunblaðið/Steinunn Ásmundsdóttir
Engar tilslakanir Verkfræðineminn Anna Margrét Kornelíusdóttir
er öryggisvörður á álverssvæðinu og lætur vel af því starfi.
Öryggiskröfurnar
fordæmisgefandi
Forstjóri Fjarðaáls á útkikki
Hér er kirfilega merkt á hurðinni
að engar tröppur séu utan dyra.
Fuglaljóð | Fimm og sex ára
nemendur leikskólans Bjarkatúns
á Djúpavogi hafa verið að setja
saman ljóð um fugla. Svo dæmi sé
tekið um ljóðagerðina í Bjarkatúni
orti hún Sabrína Ljóð um fuglinn
minn: Fuglinn minn á heima við
sjó / Hann syngur fallega söngva
um vorið / Mér finnst vænt um
hann / og mér finnst hann fallegur
og skemmtilegur / Af því að hann
er fuglinn minn.
Þá yrkir Kamilla Marín ljóð
með sama heiti: Fuglinn minn á
heima í hreiðri / Hann syngur fal-
lega um ungana sína / Hann er
vinur minn / Mér finnst vænt um
hann.
Það er ekki laust við að kominn
sé vorhugur í börnin á Djúpavogi,
ef marka má þessi ljóðaskrif sem
birt eru á vefnum djupivogur.is.
Reykjavík | Um-
hverfisráð hefur
samþykkt reglur
um kattahald í
borginni, þar sem
m.a. er lögð sú
skylda á herðar
kattaeigenda að
gelda alla högna
sem eru sex mán-
aða og eldri og fá að ganga lausir.
Markmiðið með þessari samþykkt
um kattahald, sem og annarri sam-
þykkt um gæludýrahald almennt, er
að ná sátt um gæludýrahald í borg-
inni, að því er fram kemur í bókun
fulltrúa meirihluta R-lista í um-
hverfisráði. Sjálfstæðismenn í
ráðinu mótmæla kattasamþykktinni,
sem þeir segja að gangi of langt.
Auk þess að þurfa að gelda högna
sem ganga lausir er eigendum gert
skylt að örmerkja ketti eldri en fjög-
urra mánaða og skrá nafn og kenni-
tölu eiganda hjá Umhverfis- og heil-
brigðisstofu Reykjavíkur og láta
kettina bera hálsól með upplýs-
ingum um eiganda. Einnig er þess
krafist að kettir fari í ormahreinsun
árlega. Sérstaklega er fjallað um
kattahald í fjölbýlishúsum í regl-
unum og það bannað ef það sann-
arlega veldur eða viðheldur sjúk-
dómum hjá íbúum.
Starfsmenn Umhverfis- og heil-
brigðisstofu Reykjavíkur er sam-
kvæmt samþykktinni heimilt að
fanga í búr ketti sem eru ómerktir,
þegar kvartað er undan köttum og
sé köttur innandyra hjá nágranna í
leyfisleysi. Eru þá kettirnir geymdir
í eina viku frá handsömun, en sé
þeirra ekki vitjað að þeim tíma lokn-
um eru þeir seldir eða svæfðir.
Hyggist eigandi sækja kött sem hef-
ur verið fangaður ber honum að
greiða gjöld vegna handsömunar,
fóðurs, vistunar og örmerkingar.
Reglur um kattahald
samþykktar
Miðbærinn | Tillögu meirihlutans í
skipulagsráði Reykjavíkur um að
stofnaður verði rýnihópur, sem
fjalla muni um útlit nýbygginga,
viðbygginga og breytinga á húsum
við Laugaveginn, var frestað á
fundi ráðsins í gær að beiðni
minnihlutans sem vildi tíma til að
kynna sér tillöguna.
Í tillögunni er lagt til að fimm
manna hópur gefi ráðinu umsögn
um einstök uppbyggingaráform við
Laugaveginn, m.a. með tilliti til
þess hvernig tillögurnar falla að
byggðinni við götuna. Fulltrúar í
hópnum verða tilnefndir af arki-
tektadeild Listaháskóla Íslands,
byggingarlistadeild Listasafns
Reykjavíkur, hverfisráðs miðborg-
arinnar, skipulagsfulltrúa og bygg-
ingarfulltrúa. Gert er ráð fyrir því
að hópurinn starfi í þrjú ár og að
þeim tíma liðnum verði lagt mat á
störf hópsins og fyrirkomulag.
„Ég held að það séu mjög fáir
sem eru þeirrar skoðunar að það
megi engu breyta við Laugaveg-
inn, en ég held að það séu mjög
margir þeirrar skoðunar að það
þurfi að fara mjög varlega og bera
virðingu fyrir umhverfinu þarna og
tryggja að það verði staðið vel að
þeirri uppbyggingu sem verður,“
segir Dagur B. Eggertsson, for-
maður skipulagsráðs.
Vantraust skiljanlegt
Í greinargerð með tillögunni
segir m.a. að markmiðið með deili-
skipulagi Laugavegarins sé að efla
hann, en um leið að varðveita sér-
kenni hans. Því sé talið eðlilegt að
slíkur rýnihópur sé stofnaður til að
vera skipulagsráði til stuðnings við
mat á útliti bygginga. Þannig megi
tryggja að uppbygging næstu ára
falli vel að umhverfi sínu.
Dagur segist vonast til þess að
rýnihópurinn verði til þess að
koma til móts við gagnrýnisraddir
og ná sátt um uppbygginguna við
Laugaveginn. Hann segir skiljan-
legt að menn vantreysti borgaryf-
irvöldum til að meta hvernig bygg-
ingar falla að nánasta umhverfi,
enda auðvelt að finna dæmi úr sög-
unni um byggingar sem geri það
ekki. „Ég neita því ekki að það er
verið að reyna að mæta þessum
röddum vegna þess að við viljum
standa vel að þessu, skipulagið
byggist á væntumþykju og metn-
aði fyrir hönd miðborgarinnar,“
segir Dagur.
Vilja rýnihóp fyrir Laugaveginn