Fréttablaðið - 21.08.2004, Blaðsíða 40

28 21. ágúst 2004 LAUGARDAGUR
„Mér líður mjög vel á Akureyri.
Þetta er notalegur bær, rólegur og
góður og það verður mikið úr tím-
anum. Svo er veðrið afskaplega
gott. Akureyringar hafa löngum
verið grunaðir um að ljúga til um
veðrið en ég get staðfest orð þeirra
þess efnis að veðrið er alltaf mjög
gott.“
Þetta er ekki í fyrsta sinn sem
Magnús Geir gegnir embætti leik-
hússtjóra. Hann sinnti slíku starfi
hjá Leikfélagi Íslands í sex ár og
býr því að talsverðri reynslu í þeim
efnum. Hann segir störfin þó ólík.
„Þetta er allt annað umhverfi. LA
hefur ákveðnum skyldum að gegna
en LÍ hafði ekki aðrar skyldur en
það valdi sér sjálft. Hér er líka
mikil saga sem þarf að virða.“ Róð-
ur LA hefur verið þungur undan-
farin ár, fjárhagurinn bágborinn og
ýmis vandamál uppi á borðum.
Magnúsi finnst það spennandi
áskorun að hefja félagið til vegs og
virðingar á ný. „Það er gaman að
vera með í að þróa félagið upp á
nýtt og færa það til nútímans.
Grunnurinn í leikhúsi er hins vegar
alltaf sá sami, að finna góð leikrit
og listamenn og skapa sýningu sem
hreyfir við fólki.“
Magnús Geir hafði ekki verið
lengi í starfi þegar hann sagði upp
fólki sem sumt hvert hafði starfað
árum saman hjá LA. Þrátt fyrir
eðlilegt sárindi sem af því hlutust
telur hann flesta hafa skilið þá ráð-
stöfun. „Ég held að flestir séu sam-
mála um að nauðsynlegt hafi verið
að taka á ýmsum málum. Dæmið
gekk einfaldlega ekki upp. Uppi
voru deilur vegna ráðningar for-
vera míns, skuldirnar voru miklar
og einnig voru skiptar skoðanir um
listrænar áherslur. Áður fyrr voru
umsvifin meiri og félagið bar fleira
starfsfólk en skipulagið var úr sér
gengið. Það var nauðsynlegt að
hagræða og gera starfsemina
sveigjanlegri. Vissulega var erfitt
að segja upp góðu fólki en ég held
að flestir hafi skilið hvatann að
baki. Þetta snerist ekki um að fólk-
ið væri hæft heldur breytingar á
skipulagi.“
Menningin þarf opinberan
stuðning
Leikfélag Akureyrar nýtur
fjárframlaga frá ríki og bæ en
sækir sér einnig styrki og stuðn-
ing til atvinnulífsins. Þetta er í
raun í fyrsta sinn sem fyrirtæki
styrkja félagið og gera þau það
með myndarlegum hætti. Magnús
velkist hins vegar ekki í vafa um
ágæti þess að hið opinbera styðji
við listina. „Ég tel að menning sé
þjóðinni mjög mikilvæg. Listalífið
getur ekki staðið algerlega á eigin
fótum í fámenninu hér, það hefur
sýnt sig bæði í leikhúsinu og öðr-
um greinum. Samfélög sem ætla
að standa með reisn og spegla sig
í eigin menningu verða að styðja
við bakið á menningarlífinu. Leik-
félag Akureyrar er mjög mikil-
vægt íbúum Eyjafjarðarsvæðis-
ins og raunar norðausturhluta
landsins. Það er nauðsynlegt að
þeir geti sótt alvöru menningar-
viðburði sem gefa því besta sem
gerist annars staðar á landinu, og
jafnvel erlendis, ekkert eftir.“
Magnús Geir mun ekki ein-
göngu stýra því mikla fleyi sem
Leikfélag Akureyrar er, hann ætl-
ar líka að leikstýra, enda lærður í
þeim fræðum. „Ég er leikhúsmað-
ur af lífi og sál og hef áhuga á öllu
sem tengist leikhúsi, þar með talið
stjórnun. Hins vegar hef ég gríð-
arlega gaman af að leikstýra og
þykir raunar fátt skemmtilegra. Í
samningi mínum og leikhúsráðs-
ins er skýrt kveðið á um að auk
ábyrgðar á leikhúsinu og list-
rænnar stjórnunar þess skuli ég
vera virkur leikstjóri. Skipulags-
breytingarnar gera ráð fyrir að ég
geti leikstýrt einni til tveimur
sýningum á hverju ári. Daglegur
rekstur hvílir svo að miklu leyti á
herðum framkvæmdastjóra.“
Eitt helsta hlutverk leikhús-
stjóra er að ákveða verkefnaskrá
hvers leikárs og segist Magnús
hafa afskaplega gaman af að lesa
leikrit og velja þeim leikstjóra. En
er hann einráður í LA? „Nei, það
er ég nú ekki. Ég er ráðinn af leik-
húsráði, sem hafði ákveðnar hug-
myndir um starfsemina, raunar
mjög svipaðar hugmyndir og ég
sjálfur. Ráðið hefur sýnt mér mik-
ið traust og þegar ljóst varð hvert
skyldi stefna afhenti það mér leik-
húsið til að stjórna því. Svo hef ég
frábært fólk með mér, ekki síst
framkvæmdastjórann Ingibjörgu
Ösp Stefánsdóttur, og við vinnum
náið saman. Eðli leikhúss er hins
vegar þannig að þar þarf að vera
einn sem stjórnar og ber ábyrgð-
ina. Ég geri það og það á enginn að
fara í grafgötur með það.“
Ekki hrifinn af
gáfumannaleikhúsi
Enginn efast um ríkan áhuga
Magnúsar Geirs á leikhúsi og
kornungur starfrækti hann leikfé-
lag sem vakti mikla athygli. En
hvað einkennir gott leikhús?
„Gott leikhús er leikhús sem
snertir fólk á einhvern hátt. Sum
verk eru hugsuð með það fyrir
augum að kæta fólk og fá það til
að hlæja. Önnur verk fá okkur til
að standa á öndinni eða sjá hlutina
í nýju ljósi. Mér finnst að leikhús
eigi að vera tilfinningaþrungið og
að áhorfendur skynji að sýningin
skipti leikarana og aðra listamenn
máli. Þannig hrífast áhorfendur
með. Sjálfur er ég ekki hrifinn af
gáfumannaleikhúsi þar sem fólk
mætir með nefið upp í loft og
horfir úr fjarlægð á það sem fyrir
augu ber. Ég vona að Leikfélag
Akureyrar snerti við fólki, við
höfum í það minnsta valið verk
sem eru tilfinningaþrungin hvert
á sinn hátt.“
Leikhússókn Íslendinga er
mikill, meiri en gengur og gerist
meðal flestra þjóða. Leikhúsmenn
sakna þó ungs fólks á áhorfenda-
bekkjunum og Magnús Geir legg-
ur ríka áherslu á að fá það í leik-
húsið í vetur. „Við ætlum að reyna
að ná til fólks á aldrinum 12 til 25
ára en sá hópur hefur almennt
verið afskiptur í leikhúsi. Fólk fer
sem börn með foreldrum sínum á
barnasýningar og kemur svo ekki
aftur fyrr en það er orðið eldra og
hefur komið sér fyrir í lífinu. Það
blasir við að verkin þurfa að höfða
til ungs fólks, án þess þó að þau
séu sérstök unglingaverk. Slíkt er
raunar algjört tabú, þetta þarf að
vera alvöru leikhús og hafa alvöru
erindi. Við vitum að ungt fólk vill
fara í leikhús en það hefur ekki
ráð á því. Við fengum því Lands-
bankann, einn sjö máttarstólpa fé-
lagsins, til að niðurgreiða áskrift-
arkort fyrir 25 ára og yngri sem
gildir á fjórar sýningar. Kortið
kostar 3.250 krónur og leik-
húsmiðinn er því á bíóverði. Ég er
mjög stoltur af að leikfélagið geti,
í samtarfi við bankann, boðið upp
á þetta og vona og trúi að ungt
fólk á Akureyri verði stærri hluti
gesta okkar en verið hefur.“
Magnús nefnir líka að öllum
krökkum í gagnfræðaskólum Ak-
ureyrar og nágrennis verði boðið
á eina leiksýningu í vetur auk
þess sem boðið verður upp á leik-
list sem valgrein í skólum bæjar-
ins. Allt miðar þetta að því að ala
upp leikhúsgesti framtíðarinnar.
Ég á mér draum
Magnús Geir var ráðinn til
Leikfélags Akureyrar til þriggja
ára og hefur, eins og fram hefur
komið, metnaðarfull áform um að
gera LA að kraftmiklu og áhuga-
verðu leikhúsi. Hann sér framtíð-
ina í skýru ljósi. „Ég á mér þann
draum að Leikfélag Akureyrar
verði, eins og það hefur oft verið,
frábært leikhús sem gefi því
besta sem gerist á Íslandi og ann-
ars staðar í Evrópu ekkert eftir.
Ég á mér þann draum að áhorf-
endur flykkist í leikhúsið, að lista-
menn þrái að koma og vinna á
Akureyri og að okkur takist að
auka erlent samstarf. Ég á mér
þann draum að leikhúsið verði eitt
af helstu aðdráttaröflum Akur-
eyrarbæjar og að fólk komi hing-
að til að fara á skíði, í sund, út að
borða og á sýningu hjá LA.“
bjorn@frettabladid.is
Magnús Geir um leikritin í vetur:
Spennandi, krefjandi, hjartnæmt, djarft, fyndið
Svik
Samstarfsverkefni LA, Sagnar og Á
senunni. Eftir Harold Pinter. Leikarar
eru Ingvar E. Sigurðsson, Jóhanna Vig-
dís Arnardóttir og Felix Bergsson og
Edda Heiðrún Backman stígur sín fyrstu
skref á leikstjórnarbrautinni. „Með
bestu verkum Pinters, afar vel skrifað.
Fjallar um klassískan ástarþríhyrning og
er flutt aftur á bak. Hefst á að ástarsam-
bandi er slitið og síðan er sagan rakin
aftur. Áhorfendur vita meira en persón-
urnar. Ótrúlega spennandi. Ég skal hund-
ur heita ef þetta heillar ekki leikhús-
gesti.“
Ausa og Stólarnir
Samstarfsverkefni LA og LR. María
Reyndal leikstýrir og leikarar eru Ilmur
Kristjánsdóttir, Guðrún Ásmundsdóttir,
Þráinn Karlsson og Skúli Gautason.
„Þetta eru tvö verk, Ausa er eftir Lee
Hall og fjallar um 9 ára einhverfa stúlku
sem greinist með krabbamein. Í verkinu
kynnumst við vangaveltum hennar um
lífið og tilveruna. Stólarnir eru eftir Eu-
gene Ionesco og segir af geggjuðum
gamalmennum. Bæði verkin eru krefj-
andi og í senn húmorísk og dramatísk.“
Óliver
Magnús Geir leikstýrir, ekki hefur
verið ráðið í helstu hlutverk. „Þetta er
saga sem allir þekkja. Einn rómaðasti og
vinsælasti söngleikur allra tíma. Sagan
er hjartnæm, spennandi og fyndin og
lögin eru hvert öðru betra. Fimmtán
hljóðfæraleikarar úr Sinfóníuhljómsveit
Norðurlands annast tónlistarflutning.
Við leggjum mikið í þessa uppsetningu.
Senn hefst leitin að barnastjörnunum
þremur.“
Pakkið á móti
Agnar Jón Egilsson leikstýrir þessu
verki Henry Adams. „Fjallar um heiminn
eftir 11. september og segir af litlum
karli sem allt í einu dregst inn í veröld
sem við fylgjumst með í fréttunum.
Hans einkamál verða að heimsmálum og
heimsmálin að hans einkamálum. Þetta
er flugbeitt, djarft og drep fyndið verk.
Skrifað af pólitískri ranghugsun.“
Gestasýningar
Brim. Sýning Vesturports. Hárið. Sýn-
ingin úr Austurbæ. Koddamaðurinn.
Sýning Þjóðleikhússins. Ærandi þögn.
Erlendur leikhópur. ■ FR
ÉT
TA
B
LA
Ð
IÐ
/G
VA
Leikhúsmaður
af lífi og sál
Magnús Geir Þórðarson var ráðinn leikhússtjóri Leikfélags Akureyrar í mars
og varði vori og sumri í endurskipulagningu starfseminnar, stefnumótun
félagsins og undirbúning fyrsta leikársins. Hann er bjartsýnn á góðan og
skemmtilegan leikhúsvetur og ber Akureyringum vel söguna.
40-41 (28-29) Helgarefni 20.8.2004 15:03 Page 2